டெல்லி தேசிய தலைநகர் பிராந்தியத்தில் (NCR) சுற்றித்திரியும் அனைத்து தெருநாய்களையும் எட்டு வாரங்களுக்குள் பிடித்து, காப்பகங்களில் அடைத்து பராமரிக்க வேண்டும் என்று உச்ச நீதிமன்றம் உத்தரவிட்டுள்ளது.

இந்த தீர்ப்பு நாடு முழுவதும் கவனம் ஈர்த்து, பரவலான விவாதத்தை தூண்டியுள்ளது. சிலர் பொதுமக்கள் பாதுகாப்புக்காக இந்த நடவடிக்கையை ஆதரிக்க, விலங்கு நல ஆர்வலர்கள் தெருநாய்களை அகற்றுவது தவறானது எனக் கண்டனம் தெரிவிக்கின்றனர்.

இந்தச் சூழலில், கேரளாவின் கொழிவெட்டும்வெலி பகுதியில் நடந்த ஒரு சம்பவம் மனித-விலங்கு பாசத்தை வெளிப்படுத்தியுள்ளது.

அங்கு 14 ஆண்டுகளாக மக்களோடு ஒற்றுமையாக வாழ்ந்த எல்தோ என்ற தெருநாய்க்கு, ஊர் மக்கள் நினைவுச்சின்னமாக சிலை அமைத்துள்ளனர்.

எல்தோ கிராமத்தின் அன்புக்குரிய உறுப்பினராக கருதப்பட்டதால், அதன் மரணத்திற்குப் பிறகு மக்கள் இந்தச் செயலின் மூலம் தங்கள் பாசத்தை வெளிப்படுத்தினர்.

சிறப்பாக, எல்தோக்கு பாலில் செய்யப்பட்ட கேக் மிகவும் பிடித்ததால், அப்பகுதியில் உள்ள ஒரு கடை, அந்த கேக்கிற்கு ‘எல்தோ கேக்’ எனப் பெயரிட்டுள்ளது.

இந்த சம்பவம், விலங்குகளும் மனிதர்களும் ஒரே சமூகத்தில் அன்பும் பராமரிப்பும் கொண்டு இணைந்து வாழ முடியும் என்பதை நினைவூட்டும் உருக்கமான எடுத்துக்காட்டாக மாறியுள்ளது.