ராஜஸ்தானில் இடைவிடாத கனமழை பல்வேறு மாவட்டங்களில் பெரும் பாதிப்பை ஏற்படுத்தியுள்ளது. கடந்த 24 மணி நேரத்தில் மாநிலத்தில் அதிகபட்சமாக 254 மில்லிமீட்டர் மழை பதிவாகியுள்ளதாக ஜெய்ப்பூர் வானிலை ஆய்வு மையம் தெரிவித்தது. கனமழையால் தாழ்வான பகுதிகள் நீரில் மூழ்க, வீடுகள் மற்றும் சாலைகள் கடுமையாக பாதிக்கப்பட்டுள்ளன.

சவாய் மதோபூரின் பல்லிபர் பகுதியில் வீடுகள் வெள்ளத்தில் மூழ்கி, மக்கள் இடம்பெயர வேண்டிய நிலை ஏற்பட்டது. பில்வாராவின் பிஜோலியாவில் 170 மில்லிமீட்டர் மழை பெய்ததால் பஞ்சன்புரா அணை நிரம்பி, எரு நதி வெள்ளத்தில் கசிய ஆரம்பித்தது. கோட்டாவில், அதிகாலையில் தடுப்பணையின் மூன்று கதவுகள் திறக்கப்பட்டு 25,000 கனஅடி நீர் வெளியேற்றப்பட்டது. இதனால் கீழ்ப்பகுதி கிராமங்கள் நீரில் மூழ்கி, போக்குவரத்து துண்டிக்கப்பட்டது.

கனமழை காரணமாக உயிரிழப்புகளும் பதிவாகியுள்ளன. அஜ்மீரில் நண்பர்களுடன் அணைக்கு வந்த இளைஞர், நீந்தும்போது அடித்துச் செல்லப்பட்டு உயிரிழந்தார். ஜெய்ப்பூரின் சக்சு பகுதியில், தம்பதியினர் சென்ற இருசக்கர வாகனம் பெருக்கெடுத்த துந்த் ஆற்றில் அடித்துச் செல்லப்பட்டது. இதில் கணவர் காப்பாற்றப்பட்டாலும் மனைவி நீரில் மூழ்கி உயிரிழந்தார்.

தேசிய நெடுஞ்சாலை-552 இல் மண் மதகு இடிந்து விழுந்ததால் போக்குவரத்து முழுமையாக பாதிக்கப்பட்டது. பூண்டியின் கப்ரென் நகரில் காலனிகள் நீரில் மூழ்கி, கிராமப்புறங்களுக்கான சாலை தொடர்பு துண்டிக்கப்பட்டது.

வானிலை ஆய்வுமையம் உதய்பூர், துங்கர்பூர், பன்ஸ்வாரா மற்றும் பிரதாப்கர் மாவட்டங்களுக்கு ஆரஞ்சு எச்சரிக்கை விடுத்துள்ளது. அங்கு கனமழை முதல் மிக கனமழை பெய்யக்கூடும் என எச்சரிக்கப்பட்டுள்ளது. கிழக்கு ராஜஸ்தானின் பெரும்பாலான பகுதிகளிலும் மேற்கு மாவட்டங்களின் சில இடங்களிலும் மிதமான மழை தொடரும் என்று அறிவிக்கப்பட்டுள்ளது.