மத்திய கிழக்கில் அமெரிக்காவிற்கும் ஈரானுக்கும் இடையே நிலவி வரும் போரில், ஈரான் சீனாவிடமிருந்து ரகசியமாக வாங்கிய உளவுச் செயற்கைக்கோளைப் பயன்படுத்தி அமெரிக்க ராணுவத் தளங்களைத் துல்லியமாகக் குறிவைத்துத் தாக்கியுள்ளதாக 'ஃபைனான்சியல் டைம்ஸ்' (Financial Times) இதழ் வெளியிட்டுள்ள புலனாய்வு அறிக்கை உலக அரசியலில் பெரும் பரபரப்பை ஏற்படுத்தியுள்ளது. ஈரானியப் புரட்சிகர காவல் படையின் (IRGC) கசிந்த ராணுவ ஆவணங்களின் அடிப்படையில் இந்தத் தகவல்கள் வெளியாகியுள்ளன.

ரகசிய கொள்முதல்: 2024-ஆம் ஆண்டின் இறுதியில், சீனா விண்ணில் ஏவிய TEE-01B என்ற உளவுச் செயற்கைக்கோளை சுமார் 36.6 மில்லியன் டாலர் (சீன யுவான் மதிப்பில்) கொடுத்து ஈரான் ரகசியமாக வாங்கியுள்ளது. இது விண்ணிலேயே வைத்து கைமாற்றப்படும் 'இன்-ஆர்பிட் டெலிவரி' (In-orbit delivery) முறையில் வாங்கப்பட்டது.

அதிநவீனத் துல்லியம்: இந்தச் செயற்கைக்கோள் அரை மீட்டர் (0.5m) வரை துல்லியமாகப் படமெடுக்கும் திறன் கொண்டது. இதன் மூலம் அமெரிக்க ராணுவத் தளங்களில் உள்ள போர் விமானங்கள் மற்றும் வாகனங்களை ஈரானால் துல்லியமாகக் கண்காணிக்க முடிந்தது.

தாக்கப்பட்ட தளங்கள்: சவுதி அரேபியாவின் இளவரசர் சுல்தான் விமானத் தளம், ஜோர்டானின் முவாஃபக் சால்டி தளம், பஹ்ரைன் மற்றும் ஈராக் ஆகிய இடங்களில் உள்ள அமெரிக்கத் தளங்களைத் தாக்குவதற்கு முன்னும் பின்னும் இந்தச் செயற்கைக்கோள் மூலம் ஈரான் உளவு பார்த்துள்ளது.

அமெரிக்கா உறுதி: கடந்த மார்ச் 14-ஆம் தேதி சவுதி அரேபிய தளத்தில் அமெரிக்க விமானங்கள் தாக்கப்பட்டதை அதிபர் டொனால்ட் ட்ரம்ப் உறுதி செய்திருந்தது குறிப்பிடத்தக்கது.

சர்வதேசப் பதற்றம்:

இந்த விவகாரம் குறித்துச் சீன வெளியுறவு அமைச்சகம் அளித்துள்ள விளக்கத்தில், "இது முற்றிலும் உண்மைக்குப் புறம்பான தகவல் மற்றும் திட்டமிடப்பட்ட வதந்தி" என்று மறுத்துள்ளது. இருப்பினும், சீனா ஈரானுக்கு ராணுவ ரீதியாக உதவி செய்வது உறுதியானால், சீனப் பொருட்கள் மீது 50 சதவீத வரி (Tariff) விதிக்கப்படும் என்று அமெரிக்க அதிபர் ட்ரம்ப் எச்சரிக்கை விடுத்துள்ளார்.