மேற்காசியாவில் குறிப்பாக ஈரான் மீது அமெரிக்கா மற்றும் இஸ்ரேல் தொடுத்துள்ள போரின் காரணமாக, ஆஸ்திரேலியாவில் வரலாறு காணாத எரிபொருள் தட்டுப்பாடு ஏற்பட்டுள்ளது. சர்வதேச சந்தையில் கச்சா எண்ணெய் விலை விண்ணைத் முட்டியுள்ள நிலையில், ஆஸ்திரேலியப் பிரதமர் அந்தோணி அல்பானீஸ் நாட்டு மக்களுக்கு ஆற்றிய உரையில் சில அதிரடி நடவடிக்கைகளை அறிவித்துள்ளார்.

தற்போதைய நெருக்கடியைச் சமாளிக்க, பெட்ரோல் மற்றும் டீசல் மீதான எரிபொருள் வரி (Fuel Excise) பாதியாகக் குறைக்கப்பட்டுள்ளது. இதன் மூலம் ஒரு லிட்டருக்கு 26.3 காசுகள் வரை விலை குறையும் என எதிர்பார்க்கப்படுகிறது. இருப்பினும், ஹார்முஸ் ஜலசந்தி (Strait of Hormuz) முடக்கப்பட்டதால் கச்சா எண்ணெய் இறக்குமதியில் பெரும் சிக்கல் நீடிக்கிறது. இதனால், பொதுமக்கள் தங்களது தனிப்பட்ட வாகனங்களைப் பயன்படுத்துவதைக் குறைத்துக்கொண்டு, பேருந்து மற்றும் இரயில் போன்ற பொதுப் போக்குவரத்திற்கு (Public Transport) மாற வேண்டும் என்று பிரதமர் உருக்கமான வேண்டுகோள் விடுத்துள்ளார்.

இந்த எரிபொருள் நெருக்கடி காரணமாகப் பிரதமரின் பல முக்கிய வெளிநாட்டுப் பயணங்கள் ரத்து செய்யப்பட்டுள்ளன. நாட்டின் எரிசக்தி பாதுகாப்பை உறுதி செய்வதே இப்போதைய முதன்மை இலக்கு என்று அவர் தெரிவித்துள்ளார். இதற்கிடையில், விக்டோரியா மற்றும் டாஸ்மேனியா போன்ற மாகாணங்கள் பொதுமக்களின் சுமையைக் குறைக்கப் பொதுப் போக்குவரத்தை ஒரு மாத காலத்திற்கு முற்றிலும் இலவசமாக அறிவித்துள்ளன.

ஆஸ்திரேலியாவின் 90 சதவீத எரிபொருள் தேவை இறக்குமதியைச் சார்ந்தே இருப்பதால், இந்தப் போரின் தாக்கம் இன்னும் பல மாதங்களுக்கு நீடிக்கும் எனப் பொருளாதார நிபுணர்கள் எச்சரிக்கின்றனர். அத்தியாவசியப் பொருட்களின் விலை உயர்வைக் கட்டுப்படுத்தவும், போக்குவரத்துத் துறையைப் பாதுகாக்கவும் அரசு ஒரு பில்லியன் டாலர் மதிப்பிலான அவசரக் காலத் திட்டத்தையும் முன்னெடுத்துள்ளது. தனிநபர் ஒழுக்கமும், சிக்கனமான எரிபொருள் பயன்பாடுமே இந்த இக்கட்டான காலத்தைக் கடக்க உதவும் என்று ஆஸ்திரேலிய அரசு தெரிவித்துள்ளது.