மேற்குத் தொடர்ச்சி மலையின் இயற்கை செல்வங்களால் செழித்த நீலகிரி மாவட்டத்தின் முதுமலை தேசிய பூங்கா மற்றும் புலிகள் காப்பகம், பல்வேறு வனவிலங்குகளுக்கும் பறவைகளுக்கும் பாதுகாப்பான புகலிடமாக திகழ்ந்து வருகிறது.

புலிகள், யானைகள், கரடிகள், மான்கள் உள்ளிட்ட எண்ணற்ற உயிரினங்கள் இப்பகுதியின் இயற்கை வளத்தில் நம்பிக்கையுடன் வாழ்ந்து வருகின்றன என தெரிவிக்கப்பட்டுள்ளது.

ஆனால், கோடைக்காலத்தின் கடும் வெப்பம் தாக்கம் செலுத்தத் தொடங்கியுள்ள நிலையில், மேற்குத் தொடர்ச்சி மலையில் கடுமையான வறட்சி நிலை உருவாகியுள்ளது.

இதன் விளைவாக, ஆறுகள் மற்றும் நீர்நிலைகளில் நீர்வரத்து முற்றிலும் குறைந்து, பல பகுதிகளில் வறண்ட காட்சியாக மாறியுள்ளது. இதனால், தண்ணீர் இல்லாமல் விலங்குகளும் பறவைகளும் கடும் துயரத்தில் தவித்து வருகின்றன என தெரிவிக்கப்பட்டுள்ளது.

இந்த சூழலில், முதுமலை வனப்பகுதியில் கடந்த ஒரு வாரத்தில் மட்டும் மூன்று யானைகள் உயிரிழந்த சம்பவம் பெரும் கவலையை ஏற்படுத்தியுள்ளது.

ஏற்கனவே இரண்டு காட்டு யானைகள் உயிரிழந்த நிலையில், இன்று பொக்காபுரம் பகுதியில் சுமார் 45 வயது மதிக்கத்தக்க ஆண் காட்டு யானை சடலமாக கண்டெடுக்கப்பட்டுள்ளது.

சீகூர் மற்றும் ஆனைக்கட்டி போன்ற முக்கிய ஆறுகள் முற்றிலும் வறண்டுவிட்டதே இந்த துயரமான உயிரிழப்புகளுக்கான பிரதான காரணமாக இருக்கலாம் என தெரிவிக்கப்பட்டுள்ளது. இந்த நிலை, வனவிலங்குகளின் உயிர் பாதுகாப்பை கேள்விக்குறியாக்கும் வகையில் அமைந்துள்ளது எனவும் தெரிவிக்கப்பட்டுள்ளது.