இந்தியாவில் பாரம்பரியத் திருமண பந்தங்களுக்கு அப்பாற்பட்ட உறவுகளைத் தேடுபவர்களின் எண்ணிக்கை வியக்கத்தக்க வகையில் அதிகரித்து வருகிறது. பிரான்சைச் சேர்ந்த 'கிளீடன்' (Gleeden) என்ற திருமணத்தை மீறிய உறவுக்கான (Extramarital Dating) செயலி, இந்தியாவில் மட்டும் தற்போது 40 லட்சம் பயனர்களைக் கடந்துள்ளதாகப் புதிய புள்ளிவிவரங்கள் தெரிவிக்கின்றன. இது இந்திய நகரப்புறச் சமூகக் கட்டமைப்பில் ஏற்பட்டுள்ள மிகப்பெரிய மாற்றத்தைப் பிரதிபலிக்கிறது.

பெங்களூரு, மும்பை மற்றும் கொல்கத்தா ஆகிய நகரங்கள் இந்தப் பட்டியலில் முதலிடத்தில் உள்ளன. குறிப்பாக, இந்தப் செயலியைப் பயன்படுத்துபவர்களில் 40 சதவீதம் பேர் பெண்கள் என்பது குறிப்பிடத்தக்கது. அவர்களில் பெரும்பாலானோர் நன்கு படித்த, உயர்பதவிகளில் இருக்கும் பெண்கள் எனத் தரவுகள் கூறுகின்றன. திருமண வாழ்க்கையில் ஏற்படும் சலிப்பு, துணையுடன் மனரீதியான நெருக்கம் இல்லாமை மற்றும் உணர்வுபூர்வமான தனிமை ஆகியவையே இத்தகைய செயலிகளை நோக்கி மக்கள் செல்வதற்குக் காரணமாகக் கூறப்படுகிறது.

தனிநபர் ரகசியம் (Privacy) மற்றும் பெண்களுக்கு முன்னுரிமை அளிக்கும் பாதுகாப்பு அம்சங்களே இச்செயலியின் வெற்றிக்கு முக்கியக் காரணமாகும். இந்தியக் கலாச்சாரத்தில் 'ஒருவனுக்கு ஒருத்தி' என்ற கோட்பாடு இன்றும் வலுவாக இருந்தாலும், நவீன டிஜிட்டல் யுகத்தில் தனிமனித சுதந்திரம் மற்றும் விருப்பங்களுக்கு முக்கியத்துவம் அளிக்கும் போக்கு அதிகரித்துள்ளது.

சமூகவியலாளர்களின் கூற்றுப்படி, இது வெறும் ஒரு செயலியின் வளர்ச்சி மட்டுமல்ல; இந்தியத் திருமண அமைப்பில் ஏற்பட்டுள்ள விரிசல்களின் அறிகுறியாகும். கள்ளக்காதல் அல்லது திருமணத்தை மீறிய உறவு என்பது ஒரு காலத்தில் மிகப்பெரிய சமூக இழுக்காகக் கருதப்பட்டது.

ஆனால் இன்று ரகசியமான டிஜிட்டல் தளங்கள் மூலம் அது ஒரு புதிய பரிமாணத்தை எட்டியுள்ளது. இத்தகைய மாற்றங்கள் எதிர்காலக் குடும்ப அமைப்பில் எத்தகைய தாக்கத்தை ஏற்படுத்தும் என்பது இப்போது ஒரு முக்கிய விவாதப் பொருளாகியுள்ளது. 40 லட்சம் பேர் என்ற இந்த எண்ணிக்கை, இந்தியச் சமூகம் தார்மீக ரீதியாக எங்கே போய்க்கொண்டிருக்கிறது என்ற கேள்வியையும் எழுப்பியுள்ளது.