சென்னை: ‘96’ திரைப்படத்தின் மூலம் தமிழ் சினிமாவில் கவனம் பெற்ற நடிகர் ஆதித்யா பாஸ்கர் கதாநாயகனாக நடித்துள்ள புதிய திரைப்படத்திற்கு ‘லவ் அண்ட் வார்’ எனப் பெயரிடப்பட்டுள்ளது. இப்படத்தின் ஃபர்ஸ்ட் லுக் போஸ்டரை நடிகர்கள் ஜீவா மற்றும் ஆர்யா தங்களது சமூக வலைதளங்களில் வெளியிட்டு, படக்குழுவினருக்கு வாழ்த்து தெரிவித்துள்ளனர்.

அறிமுக இயக்குநர் ராஜ்குமார் ரங்கசாமி இயக்கியுள்ள இந்தப் படத்தில் ஆதித்யா பாஸ்கருடன் கௌரி கிஷன், கே. பாக்யராஜ், ரெடின் கிங்ஸ்லி, சரஸ் மேனன், ஜீவா ரவி, டி.எஸ்.ஆர்., நந்திதா ஸ்ரீகுமார் உள்ளிட்ட பலர் முக்கிய கதாபாத்திரங்களில் நடித்துள்ளனர்.

படத்திற்கு எல். ராமச்சந்திரன் ஒளிப்பதிவு செய்துள்ள நிலையில், எம்.எஸ். ஜோன்ஸ் ரூபர்ட் இசையமைத்துள்ளார். பரத் விக்ரமன் படத்தொகுப்பை கவனித்துள்ள இந்த திரைப்படத்தை ‘ஆர்ஜின் ஸ்டுடியோஸ்’ நிறுவனம் சார்பில் தயாரிப்பாளர் கண்ணா பாஸ்கர் தயாரித்துள்ளார்.

படம் குறித்து இயக்குநர் ராஜ்குமார் ரங்கசாமி கூறுகையில், சிறிய கருத்து வேறுபாடுகளை ஈகோ மற்றும் கோபத்தால் பெரிதாக்காமல் பேச்சுவார்த்தை மூலம் தீர்த்துக்கொள்ள வேண்டும் என்ற கருத்தை மையமாகக் கொண்டு கதை உருவாக்கப்பட்டுள்ளதாக தெரிவித்தார். குடும்பத்துடன் ரசிக்கும் வகையிலான ‘ஃபீல் குட்’ பொழுதுபோக்கு படமாக இது இருக்கும் என்றும், ரசிகர்கள் சிரிப்புடனும், பழைய நினைவுகளை மீட்டெடுத்தும் திரையரங்குகளை விட்டு வெளியேறுவார்கள் என்ற நம்பிக்கையையும் அவர் வெளிப்படுத்தினார்.

மேலும், ஆதித்யா பாஸ்கர் – கௌரி கிஷன் ஜோடியின் திரைவேதியியல் (Chemistry) ரசிகர்களை கவரும் வகையில் அமைந்துள்ளதாகவும் இயக்குநர் குறிப்பிட்டார்.

தற்போது படத்தின் அனைத்து பணிகளும் நிறைவடைந்து வெளியீட்டுக்குத் தயாராக உள்ள நிலையில், வெளியிடப்பட்டுள்ள ஃபர்ஸ்ட் லுக் போஸ்டர் சமூக வலைதளங்களில் நல்ல வரவேற்பைப் பெற்று வருகிறது.