இந்தியாவில் வரும் அக்டோபர் மாதம் நடைபெறும் 13 வது ஐசிசி ஒரு நாள் போட்டி உலக கோப்பை தொடருக்கான அட்டவணை வெளியிடப்பட்டுள்ளது. அதன்படி வரும் அக்டோபர் 5ம் தேதி தொடங்கும் உலகக் கோப்பை தொடரானது நவம்பர் 19ஆம் தேதி வரை நடைபெற உள்ளது. அக்டோபர் 5ஆம் தேதி நடைபெறும் முதல் போட்டியில் இங்கிலாந்து அணி நியூசிலாந்து அணியை அகமதாபாத்தில் எதிர்கொள்கிறது. 

இந்திய அணி தனது முதல் போட்டியை அக்டோபர் 8ம் தேதி ஆஸ்திரேலிய உடன் சென்னையில் விளையாட உள்ளது. அதனைத் தொடர்ந்து அக்டோபர் 11ஆம் தேதி டெல்லியில் ஆப்கானிஸ்தானுடனும், அக்டோபர் 15ஆம் தேதி அகமதாபாத்தில் பாகிஸ்தானுடனும், அக்டோபர் 19ஆம் தேதி புனேவில் பங்களாதேஷூடனும், அக்டோபர் 22 ஆம் தேதி தர்மசாலாவில் நியூசிலாந்துடனும், அக்டோபர் 29ஆம் தேதி லக்னோவில் இங்கிலாந்துடனும் பலப்பரீட்சை நடத்த உள்ளது.

மேலும் நவம்பர் 2ம் தேதி மும்பையில் குவாலிஃபயர் 2ல் தகுதி பெரும் அணியுடன் மோதுகிறது. நவம்பர் 5ஆம் தேதி கொல்கத்தாவில் தென்னாப்பிரிக்காவுடன் மோதும் இந்திய அணி தனது கடைசி லீக் போட்டியை பெங்களூருவில் நவம்பர் 11ஆம் தேதி குவாலிஃபயர் 1ல் தகுதி பெரும் அணியுடன் விளையாட உள்ளது.

மேலும் முதல் அரையிறுதி நவம்பர் 15 புதன்கிழமை மும்பையிலும், இரண்டாவது அரையிறுதி மறுநாள் கொல்கத்தாவில் நடைபெறும். இந்த இரண்டு அரையிறுதி போட்டிகளுக்கும் ரிசர்வ் நாள் ஒதுக்கப்பட்டுள்ளது. உலக கோப்பையின் இறுதி போட்டி நவம்பர் 19 ஆம் தேதி அகமதாபாத்தில் உள்ள நரேந்திர மோடி ஸ்டேடியத்தில் நடைபெற உள்ளது. இறுதி போட்டிக்கு நவம்பர் 20 ஆம் தேதி ரிசர்வ் நாளாக அறிவிக்கப்பட்டுள்ளது.

இந்த 3 நாக்-அவுட் போட்டிகளும் பகல்-இரவு போட்டிகளாக நடைபெறும். போட்டிகள் உள்ளூர் நேரப்படி பிற்பகல் 2:00 மணிக்கு தொடங்கும் என அறிவிக்கப்பட்டுள்ளது. இந்தியாவில் உள்ள மொத்தம் 10 மைதானங்களில் உலகக் கோப்பை தொடர் நடைபெற உள்ளது. அதன்படி ஹைதராபாத், அகமதாபாத், தர்மசாலா, டெல்லி, சென்னை, லக்னோ, புனே, பெங்களூரு, மும்பை மற்றும் கொல்கத்தா ஆகிய மைதானங்களில் நடைபெற உள்ளது. மேலும் ஹைதராபாத்தைத் தவிர கவுகாத்தி மற்றும் திருவனந்தபுரம் ஆகிய இடங்களில் செப்டம்பர் 29 முதல் அக்டோபர் 3 வரை பயிற்சி ஆட்டங்கள் நடைபெறுகின்றன.