OTT தளங்களுக்கு கடும் எச்சரிக்கை விடுத்த மத்திய அரசு!

இந்தியா-பாகிஸ்தான் இடையே நிலவும் போர் பதற்றத்தைத் தொடர்ந்து, பாகிஸ்தானில் தயாரிக்கப்பட்ட திரைப்படங்கள், தொடர்கள், பாடல்கள் உள்ளிட்ட அனைத்து வகையான உள்ளடக்கங்களையும் இந்தியா முழுவதும் இயங்கும் OTT தளங்களில் இருந்து அகற்ற மத்திய அரசு உத்தரவு பிறப்பித்துள்ளது.

இதற்கான உத்தரவை மத்திய தகவல் மற்றும் ஒளிபரப்பு அமைச்சகம் நேரடியாக விடுத்துள்ளது. குறிப்பாக, பாகிஸ்தானின் ஆதரவில் உருவான, தற்காலிகமாகவோ அல்லது நிலையாகவோ இந்தியர்களுக்கு ஒளிபரப்பாகும் அனைத்து வடிவங்களும் *நாடளாவிய ரீதியில் தடைசெய்யப்பட வேண்டும்* எனவும் குறிப்பிடப்பட்டுள்ளது.

பாகிஸ்தானின் நிலைமைகள், நிலைப்பாடுகள் மற்றும் தீவிரவாத ஆதரவு தொடர்பான சிக்கல்களை நுட்பமாக கருத்தில் கொண்டு, தேசிய பாதுகாப்பு நலனுக்காகவே இந்த முடிவு எடுக்கப்பட்டுள்ளதாக கூறப்படுகிறது.

இதில், பாகிஸ்தானில் தயாரிக்கப்பட்ட திரைப்படங்கள் மற்றும் தொடர்களை தங்களது தளங்களில் இருந்து உடனடியாக நீக்காமல் இருந்தால், உரிய சட்ட நடவடிக்கை எடுக்கப்படும் என மத்திய அரசு எச்சரித்துள்ளது.

இந்தியாவுக்கு எதிரான செயல்கள் குறித்து எந்தவிதமான வர்ணனையும் பரவ விடக்கூடாது என்ற முடிவில்தான், இந்த புதிய கட்டுப்பாடுகள் அமலுக்கு வந்துள்ளன.