இந்தியா மற்றும் இலங்கையில் விறுவிறுப்பாக நடைபெற்று வரும் 10-வது ஐசிசி டி20 உலகக் கோப்பைத் தொடர் அதன் உச்சகட்டத்தை எட்டியுள்ளது. ஏற்கனவே இங்கிலாந்து, மேற்கிந்தியத் தீவுகள் உட்பட 7 அணிகள் சூப்பர் 8 சுற்றுக்குத் தகுதி பெற்றுவிட்ட நிலையில், எஞ்சியிருக்கும் அந்த ஒரு இடத்தைப் பிடிக்க குரூப் ஏ பிரிவில் பாகிஸ்தான் மற்றும் அமெரிக்கா இடையே மல்லுக்கட்டு நிலவுகிறது.

குரூப் ஏ நிலவரம்: நமீபியா கையில் பாகிஸ்தான் தலைவிதி!
ஆரம்பத்தில் பாகிஸ்தான் எளிதாக முன்னேறும் என எதிர்பார்க்கப்பட்டது. ஆனால், முதல் இரு வெற்றிகளுக்குப் பிறகு இந்தியாவிடம் 61 ரன்கள் வித்தியாசத்தில் வாங்கிய அடி, பாகிஸ்தானின் ரன் ரேட்டை (-0.403) பாதாளத்திற்குத் தள்ளியுள்ளது.

தற்போது அமெரிக்க அணி 4 புள்ளிகளுடன், சிறந்த நெட் ரன் ரேட்டில் (+0.788) இரண்டாவது இடத்தில் உள்ளது. நாளை (பிப். 18) கொழும்பில் நமீபியாவுக்கு எதிராக நடைபெறும் போட்டியில் பாகிஸ்தான் வென்றால் மட்டுமே 6 புள்ளிகளுடன் நிம்மதியாகச் சூப்பர் 8-க்குள் நுழைய முடியும். ஒருவேளை பாகிஸ்தான் தோற்றால், அமெரிக்கா ரன் ரேட் அடிப்படையில் முன்னேறிவிடும். சுருக்கமாகச் சொன்னால், பாகிஸ்தானின் தலைவிதி நமீபியா கையில்!

பாகிஸ்தானின் பலவீனம்: பேட்டிங் சொதப்பலும் அப்ரிடியின் ரன் மழையும்!
சல்மான் அலி அகா தலைமையிலான பாகிஸ்தான் அணியில் பேட்டிங் வரிசை பெரும் கவலையை அளிக்கிறது:

நம்பிக்கை நட்சத்திரங்கள்: ஷாகிப்ஸதா ஃபர்ஹான் மற்றும் சைம் ஆயுப் மட்டுமே ஓரளவு ஆறுதல் தருகின்றனர்.

கேப்டன் சொதப்பல்: கேப்டன் அகா இதுவரை ஒரு போட்டியிலும் சோபிக்கவில்லை. இந்தியாவுக்கு எதிரான ஆட்டத்தில் உஸ்மான் கானைத் தவிர மற்ற அனைவரும் 'பெவிலியன்' திரும்பவே அவசரம் காட்டினர்.

பந்துவீச்சு கவலை: பிரதான வேகப்பந்துவீச்சாளர் ஷாகின் ஷா அப்ரிடி இந்தியாவுக்கு எதிராக 2 ஓவர்களில் 31 ரன்களை வாரிக்கொடுத்தார். பவர்பிளே ஓவர்களில் அவர் விக்கெட்டுகளை வீழ்த்தத் தவறினால், நமீபியா பாகிஸ்தானைத் திணறடிக்க வாய்ப்புள்ளது.

நமீபியாவின் 'ஸ்பாய்லர்' திட்டம்!
தொடரிலிருந்து நமீபியா வெளியேறிவிட்டாலும், அவர்கள் அசோசியேட் நாடுகளின் 'அதிர்ச்சி வைத்தியத்தை' பாகிஸ்தானுக்கு அளிக்கக் காத்திருக்கின்றனர். குறிப்பாக, கேப்டன் கெர்ஹார்டு எராஸ்மஸ் இந்தியாவுக்கு எதிராக 4 விக்கெட்டுகளை வீழ்த்தி மிரட்டினார்.

அவரது மாறுபட்ட பந்துவீச்சு யுக்திகள் பாகிஸ்தானின் தடுமாறும் பேட்டர்களுக்கு சிம்ம சொப்பனமாக அமையலாம். மேலும், ஜேஜே ஸ்மட்ஸ் மற்றும் லோரன் ஸ்டீன்காம்ப் போன்ற வீரர்கள் நமீபியாவுக்குப் பலம் சேர்க்கின்றனர்.

பாகிஸ்தான் தனது சூப்பர் 8 கனவைத் தக்கவைக்குமா அல்லது நமீபியா முட்டுக்கட்டை போடுமா? கொழும்பு மைதானத்தில் நாளை விடை தெரியும்!