2026 டி20 உலகக்கோப்பை கிரிக்கெட் தொடர் வரும் பிப்ரவரி 9 முதல் மார்ச் 8 வரை இந்தியா மற்றும் இலங்கையில் நடைபெற உள்ளது. உலகின் 20 சிறந்த அணிகள் பங்கேற்கும் இந்த தொடரில், இந்தியா தங்கள் மண்ணில் மீண்டும் கோப்பையை தக்கவைக்குமா என்ற எதிர்பார்ப்பு ரசிகர்களிடையே அதிகரித்து வருகிறது.

இதற்கான முதற்கட்ட டிக்கெட் விற்பனை இரண்டு நாட்களுக்கு முன் ஆன்லைனில் துவங்கியது. அதற்கான விளம்பர படத்தை (Promotional Poster) ஐசிசி வெளியிட்டது. அந்த போஸ்டரில் இந்திய கேப்டன் சூர்யகுமார் யாதவ், ஆஸ்திரேலியாவின் மிட்செல் மார்ஷ், இங்கிலாந்தின் ஹாரி ப்ரூக், தென் ஆப்பிரிக்கா கேப்டன் ஐடன் மார்க்கம் மற்றும் இலங்கையின் தசுன் சனாக்கா ஆகியோர் இடம்பெற்றிருந்தனர்.

ஆனால் அந்த பட்டியலில் பாகிஸ்தான் கேப்டன் சல்மான் ஆகா இடம்பெறாதது பாகிஸ்தான் கிரிக்கெட் வாரியத்தை கடுமையாக சினங்க வைத்துள்ளது.

2025 ஆசியக் கோப்பையின் ஒளிபரப்பு உரிமை இந்திய நிறுவனம் ஒன்றிடம் இருந்தது. அப்போது கூட விளம்பரத்தில் பாகிஸ்தான் கேப்டனை சேர்க்காததால் சர்ச்சை வெடித்தது. பாகிஸ்தான் வாரியம் தலைவர் மோசின் நக்வி நேரடியாக தலையிட்டதால் கடைசி நேரத்தில் விளம்பரத்தில் அவரை இணைக்க ஒப்பந்தம் ஏற்பட்டது.அதே நிலைமை மீண்டும் தற்போது நிகழ்வதாக பாகிஸ்தான் குற்றம் சாட்டுகிறது.

இந்த முறை நேரடியாக ICC வெளியிட்ட விளம்பரத்தில் தங்கள் கேப்டன் புறக்கணிக்கப்பட்டுள்ளதால், அது இந்தியாவின் திட்டமிட்ட செயலாகவே பார்க்கப்படுவதாக பாகிஸ்தான் வாரியம் தெரிவிக்கிறது.

மேலும், தற்போது ICC தலைவர் ஜெய் ஷா என்பதால், இந்தியா தாக்கம் செலுத்தி தங்களை அவமானப்படுத்த முயல்கிறது என்ற துரோக சந்தேகத்தையும் அவர்கள் வெளிப்படுத்தியுள்ளனர்.

பாகிஸ்தான் வாரிய நிர்வாகி ஒருவர் பெயர் வெளியிட விரும்பாமல் கூறியதாவது:“சில மாதங்களுக்கு முன் ஆசியக் கோப்பையிலும் இதே பிரச்சனை. இம்முறை ஒளிபரப்பு நிறுவனத்துடன் அல்ல; நேரடியாக ICC உடன் தான் நாங்கள் இந்த பிரச்சனையை எதிர்கொள்கிறோம். எங்களுடைய கேப்டன் விளம்பரத்தில் இல்லாமலே டிக்கெட் அறிவிப்பு கொடுக்கப்பட்டுள்ளது. இது ஏற்றுக்கொள்ள முடியாதது.”

கிரிக்கெட்டில் தொடரும் இந்தியா–பாகிஸ்தான் அரசியல்-விளையாட்டு பதட்டம், 2026 உலகக்கோப்பை விளம்பரத்தாலும் மேலும் செழித்து வருவது தான் இன்றைய சூழல்.

இந்த விவகாரத்தில் ICC என்ன பதில் அளிக்கிறது என்பது ரசிகர்களால் ஆர்வமுடன் எதிர்பார்க்கப்படுகிறது.