அதிமுகவில் மூத்த தலைவர் செங்கோட்டையன் நீக்கப்பட்டதைத் தொடர்ந்து, கொங்கு மண்டல வாக்கு சதவீதத்தில் மாற்றம் ஏற்படுமா என்பது குறித்து அரசியல் வட்டாரங்களில் பெரும் விவாதம் எழுந்துள்ளது. இதுகுறித்து மூத்த அரசியல் விமர்சகர் ரவீந்திரன் துரைசாமி அளித்த பேட்டி தற்போது பரபரப்பை ஏற்படுத்தியுள்ளது.

பேட்டியில் அவர் கூறியதாவது:“எடப்பாடி பழனிசாமியின் தற்போதைய நடவடிக்கைகள் அனைத்தும் கட்சி விரோதமே. அவர் ஒற்றை தலைமை பதவிக்காக, தன்னிடம் யாரும் கேள்வி கேட்க முடியாத வகையில் அதிமுக அமைப்பை மாற்றிவிட்டார். இதே காரணத்திற்காகவே ஓ.பன்னீர்செல்வத்தை நீக்கினார். ஆனால் அவர் தன்னை பாஜகவின் கட்டுப்பாட்டிலேயே வைத்திருக்கிறார்.”

ரவீந்திரன் துரைசாமி மேலும் கூறியதாவது,“ஜெயலலிதா காலத்தில் இருந்த அதிமுக வாக்காளர்களில் பாதி பேர் மட்டுமே இன்று எடப்பாடியுடன் உள்ளனர். அதிமுக தற்போது இரண்டு ஜாதி கட்சியாக மாறிவிட்டது. தென்மாவட்டங்களில் கட்சி டெபாசிட் கூட இழந்தது. சசிகலா, தினகரன், ஓபிஎஸ் ஆகியோர் முக்குலத்தோர் வாக்குகளைப் பிரித்து விட்டனர். இப்போது செங்கோட்டையனும் அதே பாதையில் நடந்து, கொங்கு மண்டலத்தில் குறைந்தபட்சம் சில சதவிகித வாக்கு பாதிப்பை எடப்பாடிக்கு ஏற்படுத்துவார். அந்த சதவிகித பாதிப்பே எடப்பாடிக்கு பெரிய சறுக்கலாக மாறும்.”

அவர் மேலும் கூறினார்:“செங்கோட்டையனும், அண்ணாமலையும் ஒரே கருத்தில் உள்ளவர்கள் — ‘எடப்பாடியை வீழ்த்தினால்தான் தங்கள் அரசியல் வாழ்வு தொடங்கும்’ என்பது அவர்களின் நோக்கம். இந்த இரண்டு பேராலும் அதிமுக தற்போது உள்ள நிலையை இழக்க நேரிடும்.
அதிலும் கொங்கு மண்டல வேளாளர் வாக்குகள் செங்கோட்டையனின் நீக்கத்தால் அதிமுகவிலிருந்து விலகும் வாய்ப்பு அதிகம்.”

அதிமுகவின் தற்போதைய நிலையை விளக்கி அவர் கூறினார்:“10.5 சதவீதம் ஒதுக்கீடு விவகாரத்தால் முக்குலத்தோர் சமூகத்தினர் ஏற்கனவே அதிமுகவுக்கு விரக்தியாக உள்ளனர். இப்போது மூத்த தலைவர்கள் நீக்கப்பட்டதால், எடப்பாடிக்கு எதிர்ப்பு மேலும் உயரும். பாஜக சீட் பகிர்வில் அதிமுக சரியாக நடக்காவிட்டால், அண்ணாமலை கூட எடப்பாடிக்கு எதிராகப் போவார்.”

அவர் கடுமையாக எச்சரித்தார்:“எடப்பாடி பழனிசாமியை முன்வைத்து ஸ்டாலினை எந்தக் காலத்திலும் தோற்கடிக்க முடியாது — 2026-லயும் இல்லை, 2031-லயும் இல்லை. வேறு ஒருவரை முதல்வர் வேட்பாளராக நிறுத்தினால் மட்டுமே கூட்டணி வெற்றி பெறும். ஆனால் எடப்பாடி அதை ஒருபோதும் ஒப்புக் கொள்ள மாட்டார்.”

முடிவில் ரவீந்திரன் துரைசாமி கூறியது —“எடப்பாடிக்கு தற்போது கட்சியின் 20% பலம் இருக்கலாம்; ஆனால் பாஜகவுக்கு தனித்து நிற்கும் சக்தி இருக்கிறது. இதை அவர் நன்றாகவே அறிந்து வைத்துள்ளார். அதனால் பாஜகவை உதற முடியாது, ஆனால் தன்னிச்சையாக வெற்றி பெறவும் முடியாது.”அவரது இந்தக் கருத்துகள் தற்போது அதிமுக, பாஜக, மற்றும் செங்கோட்டையன் ஆதரவாளர்கள் மத்தியில் பரபரப்பை ஏற்படுத்தியுள்ளது.