தமிழக சட்டமன்றத் தேர்தல்கள் நெருங்கி வரும் சூழலில், மாநிலம் முழுவதும் அரசியல் களத்தில் சூடு அதிகரித்து வருகிறது. இந்த நிலையில், வாக்காளர்களின் தற்போதைய மனநிலையை விரிவாக ஆய்வு செய்த ஒரு ரகசிய அறிக்கை, மாநில உளவுத்துறை முகமைகள் மூலம் முதல்வர் மு.க. ஸ்டாலினிடம் சமர்ப்பிக்கப்பட்டுள்ளதாக தகவல்கள் வெளியாகியுள்ளன. “சுடச்சுட” முதல்வர் மேஜைக்கு சென்றதாக கூறப்படும் இந்த ரிப்போர்ட், தமிழக அரசியல் நிலவரம் குறித்து முக்கியமான சிக்னல்களை வெளிப்படுத்தியுள்ளது.

அந்த அறிக்கையின் முதல் முக்கிய அம்சமாக, முதலமைச்சர் மு.க. ஸ்டாலினின் தனிப்பட்ட செல்வாக்கு மாநிலம் முழுவதும் மிக வலுவாக இருப்பதாக குறிப்பிடப்பட்டுள்ளது. அனைத்து சமூகக் குழுக்களிடையிலும், அனைத்து பகுதிகளிலும் அவரது ஆளுமை பரவலாக ஏற்றுக்கொள்ளப்பட்டுள்ளதாக ரிப்போர்ட் தெரிவிக்கிறது. வாக்காளர்கள் அவரை எளிதில் அணுகக்கூடியவர், அமைதியான நிர்வாகி, பொறுப்புணர்வுடன் செயல்படும் முதல்வர் என்ற வகையில் பார்க்கின்றனர். மாநில அளவில் அவரது நம்பகத்தன்மைக்கு இணையான வேறு தலைவர் தற்போது இல்லை என்பதும், இது திமுகவுக்கு தேர்தலில் பெரிய பலமாக இருக்கும் என்பதும் குறிப்பிடப்பட்டுள்ளது.

இரண்டாவது முக்கியக் கணிப்பு, அதிமுக பொதுச் செயலாளர் எடப்பாடி கே. பழனிசாமி தொடர்புடையது. அவர் தனிப்பட்ட முறையில் நல்ல பெயரை பெற்றிருந்தாலும், ஆட்சி அமைக்கும் அளவிற்கு மக்களிடையே ஆதரவு இல்லை என அறிக்கை சுட்டிக்காட்டுகிறது. குறிப்பாக, எடப்பாடி தலைமையிலான அரசு அமைந்தால் அது பாஜக கட்டுப்பாட்டின் கீழ் இயங்கும் என்ற எண்ணம் பொதுமக்கள் மத்தியில் அதிருப்தியை ஏற்படுத்தியுள்ளதாக கூறப்படுகிறது. இந்த காரணத்தால் அதிமுக–பாஜக கூட்டணிக்கு மக்களிடம் பெரிதான வரவேற்பு இல்லை என்றும், பாரம்பரிய அதிமுக தொண்டர்களே கட்சியின் தற்போதைய அரசியல் திசை குறித்து குழப்பத்திலும், ஏமாற்றத்திலும் உள்ளதாக ரிப்போர்ட் தெரிவிக்கிறது.

மூன்றாவது முக்கிய அம்சமாக, நடிகர் விஜய் இளம் வாக்காளர்களிடையே குறிப்பிடத்தக்க தாக்கத்தை ஏற்படுத்தியுள்ளதாக உளவுத்துறை ஆய்வு கூறுகிறது. முதல் முறை வாக்காளர்கள் மற்றும் இளைஞர்கள் மத்தியில் அவருக்கான ஈர்ப்பு வலுவாக உள்ளது. உணர்வுப்பூர்வமாக பலர் அவருடன் தங்களை இணைத்துக் கொள்கிறார்கள் என்றும், அவர் சுமார் 20 சதவிகித வாக்குகளை பெறக்கூடும் என்றும் கணிக்கப்பட்டுள்ளது. அதே நேரத்தில், அவரது அரசியல் திசை மற்றும் நீண்டகால திட்டம் குறித்து இன்னும் ஒரு பகுதி இளைஞர்கள் முடிவெடுக்காமல் இருப்பதும் குறிப்பிடப்பட்டுள்ளது. இருப்பினும், அரசியல் அரங்கில் விஜய் வலுவான அறிமுகத்தை அளிப்பார் என்ற மதிப்பீடு ரிப்போர்ட்டில் இடம்பெற்றுள்ளது.

பிராந்திய ரீதியாகப் பார்க்கும்போது, வட மாவட்டங்கள், காவிரி டெல்டா பகுதி மற்றும் தென் தமிழகத்தின் பல பகுதிகளில் திமுக வலுவாக செயல்படும் என்று எதிர்பார்க்கப்படுகிறது. இந்த பகுதிகளில் கட்சியின் அமைப்பு பலமும், வாக்காளர்களின் விசுவாசமும் இன்னும் உறுதியான நிலையில் இருப்பதாக தெரிவிக்கப்பட்டுள்ளது.

அதே சமயம், இந்த ரிப்போர்ட் ஒரு முக்கிய எச்சரிக்கையையும் முன்வைக்கிறது. திமுக பொறுமையுடனும், அமைதியுடனும், கட்டுப்பாட்டுடனும் செயல்பட வேண்டும் என்று அறிவுறுத்தப்பட்டுள்ளது. குறிப்பாக, பாஜக ஆதரவு கொண்ட நிதி மற்றும் அரசியல் சக்திகள், ஆளும் கூட்டணியைப் பலவீனப்படுத்தவும், பிரிக்கவும் தீவிரமாக முயற்சிக்கும் சூழலில், கூட்டணியை ஒருங்கிணைத்து வைத்திருப்பது மிக அவசியம் என்றும் குறிப்பிடப்பட்டுள்ளது. தேர்தல் நெருங்க நெருங்க, தொடர்ச்சியான களப்பணி மற்றும் கூட்டணி மேலாண்மை தான் இறுதி வெற்றியை தீர்மானிக்கும் முக்கிய காரணிகளாக அமையும் என்றும் இந்த உளவுத்துறை அறிக்கை வலியுறுத்துகிறது.