தமிழ்நாட்டில் பல மாதங்களாகவே திமுக கூட்டணிக்குள் உள்ளக முரண்பாடுகள் மற்றும் அதிருப்திகள் குறித்து விமர்சனங்கள் எழுந்து வரும் நிலையில், காங்கிரஸ் எம்.பி. மாணிக்கம் தாகூர் பதிவிட்டுள்ள ஒரு ட்வீட், மாநில அரசியல் களத்தில் புதிய விவாதத்தைத் தூண்டியுள்ளது. கூட்டணி அரசியல் குறித்த அவரது கருத்துகள், திமுக கூட்டணியில் உள்ள காங்கிரஸ் கட்சியின் எதிர்பார்ப்புகள் என்ன என்பதையும், ‘அதிகாரப் பகிர்வு’ என்ற கோரிக்கை எவ்வளவு தூரம் செல்லும் என்பதையும் கேள்விக்குறியாக்கியுள்ளது.

தமிழ்நாட்டில் 9 காங்கிரஸ் எம்.பிக்கள் உள்ள நிலையில், கரூர் மாவட்டத்தில் அமைச்சர் செந்தில் பாலாஜி – காங்கிரஸ் எம்.பி. ஜோதிமணி இடையிலான மோதல் போக்கு வெளிப்பட்ட நாளிலிருந்தே, திமுக–காங்கிரஸ் உறவில் விரிசல் ஏற்பட்டதாக அரசியல் வட்டாரங்களில் பேசப்பட்டது. இதனைத் தொடர்ந்து, முன்னாள் மத்திய அமைச்சர் அழகிரி ‘கூட்டணி ஆட்சி’ என்ற கோஷத்தை முன்வைத்ததும், திமுக தலைமைக்கு எரிச்சலை ஏற்படுத்தியதாக கூறப்பட்டது. இதேபோல், சட்டப்பேரவை காங்கிரஸ் தலைவர் ராஜேஷ்குமாரும், மாநில தலைவர் செல்வப்பெருந்தகையும் ‘ஆட்சியில் பங்கு’ என்ற கருத்தை முன்வைத்தனர்.

மேலும், பெரம்பலூர் மாவட்ட காங்கிரஸ் கமிட்டி தலைவர் ஆர்.வி.ஜே. சுரேஷ், “காங்கிரஸ் இல்லாமல் திமுக 234 தொகுதிகளிலும் தோல்வி அடையும்; காங்கிரஸ் தனித்து போட்டியிடவும் தயாராக உள்ளது” என கூறியதும், திமுக தரப்பில் அதிருப்தியை ஏற்படுத்தியதாக தகவல்கள் வெளியாகின. இதற்கு மேலாக, சில காங்கிரஸ் எம்.பிக்களுக்கு உள்ளாட்சி அமைப்புகளில் உரிய ஒத்துழைப்பு இல்லை, அலுவலக வசதி செய்து தரப்படவில்லை, சில திமுக நிர்வாகிகள் இடையூறு செய்கிறார்கள் என்ற புகார்களும் அடுக்கடுக்காக வெளிவந்தன. இதனால், திமுக–காங்கிரஸ் உறவு கடைசி கட்டத்தில் சுமூகமாக இல்லை என்ற பேச்சுகள் வலுத்தன.

இந்தச் சூழலில்தான், காங்கிரஸ் எம்.பி. மாணிக்கம் தாகூர், ஒரு தேர்தல் கருத்துக் கணிப்பு முடிவை தனது ‘எக்ஸ்’ (முன்னாள் ட்விட்டர்) பக்கத்தில் பகிர்ந்து, அதனுடன் முக்கியமான கருத்தையும் பதிவு செய்தார்.
அதில்,
“தமிழ்நாட்டில் கூட்டணியே அரசியல் உண்மை. ஒவ்வொரு கட்சிக்கும் தங்களுக்கான வாக்கு ஆதரவு உள்ளது. கூட்டணி இல்லாமல் தமிழ்நாட்டில் யாரும் வெல்ல முடியாது. அதே நேரம், இப்போது அதிகாரம் மட்டும் அல்ல – அதிகாரப் பகிர்வும் விவாதிக்க வேண்டிய நேரம் வந்துவிட்டது தானே?”
என்று அவர் குறிப்பிட்டிருந்தார்.

இந்த கருத்து, திமுக தலைமையின் கவனத்தை பெரிதும் ஈர்த்துள்ளதாக அரசியல் வட்டாரங்கள் தெரிவிக்கின்றன. தேசிய அளவில் திமுக–காங்கிரஸ் உறவு இணக்கமாக இருந்தாலும், தமிழகத்தில் வேட்பாளர் தேர்வு, சீட் பங்கீடு, தொகுதி ஒதுக்கீடு உள்ளிட்ட விவகாரங்களில் காங்கிரஸுக்கு அதிருப்தி இருப்பது தெளிவாகத் தெரிகிறது.

இதற்கு முன்பே, மார்க்சிஸ்ட் கம்யூனிஸ்ட் கட்சியின் மாநில தலைவர் சண்முகம், “கூட்டணி பலத்தால்தான் திமுக வென்றது; கூட்டணி இல்லையெனில் திமுகவுக்கே இழப்பு அதிகம்” என்று வெளிப்படையாக கூறியிருந்தார். இதையடுத்து, “அப்படியென்றால் கம்யூனிஸ்ட் கட்சிகள் 234 தொகுதிகளிலும் தனித்து போட்டியிடலாமே?” என்ற கேள்விகள் சமூக வலைதளங்களில் எழுந்தன.

அதேபோல், விசிக தலைவர் திருமாவளவன் முன்வைத்த ‘ஆட்சியில் பங்கு, அதிகாரத்திலும் பங்கு’ என்ற கோஷமும் ஒரு கட்டத்தில் பெரும் சர்ச்சையை உருவாக்கியது. பின்னர், விசிக திமுக கூட்டணியில் இணக்கமாக தொடரும் என அவர் விளக்கம் அளித்ததுடன் அந்த விவாதம் ஓய்ந்தது. தற்போது, அதே போன்ற குரல் காங்கிரஸ் தரப்பிலிருந்து வெளிப்படத் தொடங்கியுள்ளதாக அரசியல் விமர்சகர்கள் கருதுகின்றனர்.

“கூட்டணி இல்லாமல் தமிழகத்தில் யாரும் வெல்ல முடியாது” என்ற மாணிக்கம் தாகூரின் கூற்று, திமுகவுக்கு ஒரு அரசியல் அழுத்தமாகவே பார்க்கப்படுகிறது. அதே நேரத்தில், சிறுபான்மையினர் வாக்குகளை ஒருங்கிணைப்பதில் காங்கிரஸின் பங்கு திமுகவுக்கு முக்கியமானது என்பதால், வரும் தேர்தலில் காங்கிரஸுக்கு கூடுதல் தொகுதிகள் வழங்கப்படலாம் என்றும் சில அரசியல் விமர்சகர்கள் கணிக்கின்றனர்.

திமுக–காங்கிரஸ் கூட்டணியில் இந்த ‘அதிகாரப் பகிர்வு’ விவாதம் எங்கு சென்று முடியும் என்பது, வரவிருக்கும் நாட்களில் தமிழக அரசியல் களத்தில் முக்கிய பேசுபொருளாகவே தொடரும்.