தமிழக அரசியல் களம் நாளுக்கு நாள் சூடுபிடித்து வரும் நிலையில், ஆளுங்கட்சி மற்றும் எதிர்க்கட்சிகள் இடையே எம்.எல்.ஏ.க்களை இழுக்கும் அரசியல் குற்றச்சாட்டுகள் தீவிரமடைந்துள்ளன. குதிரை பேர அரசியல், சட்டமன்ற உறுப்பினர்களை விலைக்கு வாங்கும் முயற்சி, ஆட்சியை கவிழ்க்கும் சதி உள்ளிட்ட விவகாரங்கள் அரசியல் வட்டாரத்தில் பெரும் விவாதத்தை ஏற்படுத்தி வருகின்றன.

த.வெ.க. தரப்பில், தங்களது சட்டமன்ற உறுப்பினரை ரூ.180 கோடி கொடுத்து விலைக்கு வாங்க முயற்சி நடைபெற்றதாகவும், அதற்கு பின்னணியில் முன்னாள் அமைச்சர் செந்தில்பாலாஜி மற்றும் அவரது சகோதரர் அசோக்குமார் இருப்பதாகவும் குற்றச்சாட்டுகள் முன்வைக்கப்பட்டுள்ளன.

இதன் தொடர்ச்சியாக, த.வெ.க. அரசை கவிழ்க்கும் நோக்கில் குதிரை பேர அரசியல் நடைபெறுவதாக தி.மு.க. மீது ஆளுங்கட்சி குற்றம்சாட்டி வருகிறது.இதற்கு பதிலடியாக, தி.மு.க. தரப்பும் தங்களது சட்டமன்ற உறுப்பினர்களை ஆளுங்கட்சி கவர முயற்சிப்பதாக குற்றச்சாட்டுகளை முன்வைத்துள்ளது.

இதேவேளை, இதுவரை அ.தி.மு.க.வைச் சேர்ந்த ஆறு சட்டமன்ற உறுப்பினர்கள் பதவியை ராஜினாமா செய்து த.வெ.க.வில் இணைந்துள்ளதும், இது வெளிப்படையான குதிரை பேர அரசியல் என அ.தி.மு.க. குற்றம்சாட்டி வருகிறது.

இந்த பரபரப்பான அரசியல் சூழ்நிலையில், தமிழகத்தில் நடைபெறுவதாக கூறப்படும் குதிரை பேர அரசியலை உடனடியாக தடுக்க நடவடிக்கை எடுக்க வேண்டும் என்றும், அமைச்சரவைக் கூட்டத்தில் அரசு சாராத இரு நபர்கள் பங்கேற்றதாக எழுந்துள்ள புகார் குறித்து ஆளுநர் ஆர்.வி. அர்லேகர் விசாரணை நடத்த வேண்டும் என்றும் தி.மு.க., அ.தி.மு.க., பா.ஜ.க. ஆகிய எதிர்க்கட்சிகள் ஒரே நாளில் ஆளுநரிடம் தனித்தனியாக மனு அளித்துள்ளன.

இந்த விவகாரம் குறித்து ஈரோட்டில் செய்தியாளர்களை சந்தித்த அமைச்சர் செங்கோட்டையன், 'தமிழகத்தில் குதிரை பேர அரசியலுக்கு அடித்தளம் அமைத்ததே தி.மு.க. தான்' என்று குற்றம்சாட்டினார்.மேலும், ஜெயலலிதா தலைமையிலான ஆட்சிக் காலத்தில் தாங்கள் எதிர்க்கட்சியாக இருந்தபோது, ம.தி.மு.க.வைச் சேர்ந்த ராமகிருஷ்ணனை ராஜினாமா செய்ய வைத்து தி.மு.க.வில் இணைத்ததோடு, பின்னர் அவருக்கு மீண்டும் தேர்தலில் போட்டியிட வாய்ப்பு வழங்கியதாகவும் அவர் தெரிவித்தார்.

அதேபோல், அ.தி.மு.க.வில் இருந்த அனிதா ராதாகிருஷ்ணனையும் தி.மு.க. தங்களது கட்சியில் இணைத்ததாக குறிப்பிட்ட அமைச்சர், 'குதிரை பேர அரசியலை முதலில் தொடங்கியது தி.மு.க.தான்; எங்களால் அல்ல' என்று கூறினார்.குதிரை பேரம் என்ற வார்த்தைக்கு அனைவரும் பலவிதமான விளக்கங்களை அளித்து வருவதாகவும், அதற்கு தமிழில் பொருத்தமான புதிய விளக்கத்தை தேடி வருவதாகவும், அதற்கான பதில் விரைவில் தெரிவிக்கப்படும் என்றும் அவர் நகைச்சுவையாக குறிப்பிட்டார்.

தற்போதைய அரசு வலுவான பெரும்பான்மை ஆதரவுடன் செயல்பட்டு வருவதாக தெரிவித்த அமைச்சர், கூட்டணிக் கட்சிகளான காங்கிரஸ், விடுதலை சிறுத்தைகள் கட்சி, இந்திய யூனியன் முஸ்லிம் லீக் ஆகியவற்றிற்கு அமைச்சரவையில் உரிய பிரதிநிதித்துவம் வழங்கப்பட்டுள்ளதாக கூறினார்.

மேலும், கம்யூனிஸ்ட் கட்சிகள் வெளியில் இருந்து ஆதரவு அளித்து வருவதால், ஆட்சியை காப்பாற்ற எந்தவித குதிரை பேர அரசியலும் தேவையில்லை என்றார்.'நாங்கள் உறுதியான பெரும்பான்மை ஆதரவுடன் நேர்மையான ஆட்சியை நடத்தி வருகிறோம்.

தமிழக மக்கள் விரும்பிய ஆட்சி தற்போது நடைபெற்று வருகிறது. குறைந்த எண்ணிக்கையிலான உறுப்பினர்களுடன் ஆட்சி நடத்தியவர்களுக்குத்தான் குதிரை பேரம் தேவைப்படும்; எங்களுக்கு அதற்கான அவசியமே இல்லை' என்று அமைச்சர் செங்கோட்டையன் தெரிவித்தார்.