தமிழ் சினிமாவின் முக்கிய இயக்குநர்களில் ஒருவரான மிஷ்கின், இயக்கம் மற்றும் நடிப்பு மட்டுமின்றி இசையிலும் தொடர்ந்து தனது திறமையை வெளிப்படுத்தி வருகிறார். தற்போது விஜய் சேதுபதியை வைத்து ‘ட்ரெய்ன்’ திரைப்படத்தை இயக்கி முடித்துள்ள அவர், நடிகராகவும் பல படங்களில் பிஸியாக இருக்கிறார்.

இந்த நிலையில், தனுஷின் சகோதரி மகன் பவிஷ் நடித்துள்ள ‘லவ் ஓ லவ்’ திரைப்படத்தில் மிஷ்கின் ஒரு பாடலை பாடியுள்ளார். அப்போது பாடலில் இடம்பெற்றிருந்த ஒரு வார்த்தையை மாற்றிய அவரது செயல் தற்போது ரசிகர்கள் மத்தியில் பாராட்டுகளை பெற்றுள்ளது.

‘சித்திரம் பேசுதடி’ திரைப்படத்தின் மூலம் இயக்குநராக அறிமுகமானவர் மிஷ்கின். முதல் படமே அவருக்கு தமிழ் சினிமாவில் நல்ல அடையாளத்தை பெற்றுத் தந்தது.

அதனைத் தொடர்ந்து ‘அஞ்சாதே’, ‘நந்தலாலா’, ‘ஓநாயும் ஆட்டுக்குட்டியும்’, ‘பிசாசு’, ‘சைக்கோ’ உள்ளிட்ட பல தனித்துவமான படங்களை இயக்கினார்.

வழக்கமான தமிழ் சினிமா பாணியில் இருந்து விலகி, ஒவ்வொரு படத்திலும் புதிய காட்சியமைப்பு மற்றும் கதை சொல்லும் முறையை கையாண்டதால், தமிழ் சினிமாவின் முக்கிய இயக்குநர்களில் ஒருவராக மிஷ்கின் ரசிகர்களால் கொண்டாடப்பட்டார்.

மிஷ்கின் இயக்கத்தில் உருவான ‘பிசாசு 2’ திரைப்படத்தின் பணிகள் ஏற்கனவே முடிவடைந்துள்ளன. இருப்பினும், பல்வேறு காரணங்களால் அந்தப் படம் இன்னும் திரைக்கு வரவில்லை.

இதற்கிடையே, விஜய் சேதுபதி மற்றும் ஸ்ருதி ஹாசன் உள்ளிட்டோரை வைத்து ‘ட்ரெய்ன்’ திரைப்படத்தை மிஷ்கின் இயக்கியுள்ளார்.

கலைப்புலி எஸ்.தாணு தயாரித்துள்ள இந்தப் படம் விரைவில் திரைக்கு வரவுள்ளதாக கூறப்படுகிறது. ஏற்கனவே ரசிகர்கள் மத்தியில் பெரிய எதிர்பார்ப்பை ஏற்படுத்தியுள்ள ‘ட்ரெய்ன்’ திரைப்படத்தின் மூலம் இயக்குநராக மிஷ்கின் வலுவான கம்பேக் கொடுப்பார் என்று எதிர்பார்க்கப்படுகிறது.

இயக்குநராக மட்டுமின்றி நடிகராகவும் மிஷ்கின் தொடர்ந்து பல படங்களில் நடித்து வருகிறார்.

‘மாவீரன்’, ‘லியோ’, ‘வணங்கான்’, ‘டிராகன்’ உள்ளிட்ட பல படங்களில் முக்கிய கதாபாத்திரங்களில் நடித்துள்ளார்.

குறிப்பாக ‘டிராகன்’ திரைப்படம் மிகப்பெரிய வெற்றியை பெற்ற நிலையில், அந்தப் படத்தில் மிஷ்கினின் நடிப்பும் ரசிகர்கள் மத்தியில் நல்ல வரவேற்பை பெற்றது. இதன் மூலம் நடிகராகவும் அவருக்கு தனி அடையாளம் கிடைத்தது.

அடுத்ததாக கீர்த்தி சுரேஷ் முக்கிய கதாபாத்திரத்தில் நடித்துள்ள ‘சத்தியவான் சாவித்திரி’ திரைப்படத்திலும் மிஷ்கின் நடித்துள்ளதாக கூறப்படுகிறது.

இயக்கம் மற்றும் நடிப்பு மட்டுமின்றி இசையின் மீதும் மிஷ்கினுக்கு அதிக ஆர்வம் உள்ளது.முறையாக இசை கற்றுக்கொண்ட அவர், ‘டெவில்’ திரைப்படத்தின் மூலம் இசையமைப்பாளராகவும் அறிமுகமானார். அதற்கு முன்பாகவே பல பாடல்களை பாடியுள்ள மிஷ்கின், தனது தனித்துவமான குரலால் ரசிகர்களின் கவனத்தை ஈர்த்துள்ளார்.

மேலும், விஜய் டிவியில் ஒளிபரப்பான ‘சூப்பர் சிங்கர்’ நிகழ்ச்சியில் நடுவராகவும் அவர் பங்கேற்றுள்ளார்.இந்த நிலையில், தனுஷின் சகோதரி மகனான பவிஷ் நடித்துள்ள ‘லவ் ஓ லவ்’ திரைப்படத்தில் மிஷ்கின் ஒரு பாடலை பாடியுள்ளார்.

ஏற்கனவே பிரபலமான ‘வாடி பொட்ட புள்ள’ பாடலை இந்தப் படத்துக்காக மீண்டும் உருவாக்கியுள்ளதாக கூறப்படுகிறது. அந்தப் பாடலை மிஷ்கின் தனது குரலில் பாடியுள்ளார்.

பாடல் பதிவு நடைபெற்றபோதுதான், அதன் வரிகளில் இடம்பெற்றிருந்த ஒரு வார்த்தை குறித்து மிஷ்கின் தனது கருத்தை தெரிவித்ததாக கூறப்படுகிறது.

‘வாடி பொட்ட புள்ள’ என்ற வரியை பாடும்போது, அதில் இடம்பெற்றிருந்த ‘பொட்ட புள்ள’ என்ற வார்த்தை மிகவும் கடுமையாக இருப்பதாக மிஷ்கின் கூறியுள்ளார்.

பெண்களை குறிப்பிடுவதற்கு அந்த வார்த்தையை பயன்படுத்த வேண்டாம் என்று தெரிவித்த அவர், அதற்கு பதிலாக மென்மையான வார்த்தையை பயன்படுத்தலாம் என்று பரிந்துரைத்துள்ளார்.

“‘பொட்ட புள்ள’ என்பது ரொம்ப கடுமையாக இருக்கிறது. அதற்கு பதிலாக ‘வாடி செல்லக்குட்டி வெளியே’ என்று வைத்துக்கொள்ளலாம்” என்று மிஷ்கின் கூறியதாக தகவல்கள் வெளியாகியுள்ளன.அவரது பரிந்துரையை தொடர்ந்து பாடல் வரியும் மாற்றப்பட்டதாக கூறப்படுகிறது.

பெண்களை இழிவாக அல்லது மட்டமாக குறிப்பிடுவதாக கருதப்படும் வார்த்தையை பாட மறுத்து, அதற்கு பதிலாக ‘செல்லக்குட்டி’ என்ற மென்மையான வார்த்தையை பயன்படுத்திய மிஷ்கினின் செயல் ரசிகர்கள் மத்தியில் பாராட்டுகளை பெற்றுள்ளது.

சினிமா பாடல்களில் பெண்களை குறிப்பிட பயன்படுத்தப்படும் வார்த்தைகள் குறித்து அவ்வப்போது விமர்சனங்கள் எழுந்து வரும் நிலையில், மிஷ்கின் தானாக முன்வந்து ஒரு வார்த்தையை மாற்றியிருப்பது கவனத்தை ஈர்த்துள்ளது.

இயக்குநர், நடிகர், பாடகர் மற்றும் இசையமைப்பாளர் என பல துறைகளில் தனது திறமையை வெளிப்படுத்தி வரும் மிஷ்கின், தற்போது ஒரு பாடல் வரியில் செய்த சிறிய மாற்றத்தின் மூலம் ரசிகர்களின் பாராட்டுகளை பெற்றுள்ளார்.

‘பொட்ட புள்ள’ என்ற வார்த்தைக்கு பதிலாக ‘செல்லக்குட்டி’ என்று மாற்றிய மிஷ்கினின் செயல், சமூக வலைதளங்களில் ரசிகர்கள் மத்தியில் வரவேற்பை பெற்று வருகிறது.