ரஜினிகாந்த் நடிப்பில், கமல்ஹாசன் தயாரிப்பில் உருவாகி வரும் ‘தர்மன்’ திரைப்படத்தை அஷ்வத் மாரிமுத்து இயக்கி வருகிறார். சென்னையில் தொடங்கியுள்ள படப்பிடிப்பில் ரஜினிகாந்த் மிகுந்த உற்சாகத்துடன் கலந்துகொண்டு வருகிறார். இந்த நிலையில், ‘தர்மன்’ படப்பிடிப்பு தளத்தில் நடந்த சுவாரஸ்யமான சம்பவங்களை இயக்குநர் அஷ்வத் மாரிமுத்து பகிர்ந்துள்ளார்.

“ரஜினி சாருக்கு வயதானது போலவே தெரியவில்லை. படப்பிடிப்பு தளத்தில் துள்ளிக் குதிக்கிறார். அவ்வளவு எனர்ஜியாக இருக்கிறார்” என்று அஷ்வத் மாரிமுத்து கூறியிருப்பது ரசிகர்கள் மத்தியில் கவனத்தை ஈர்த்துள்ளது.

தமிழ் சினிமாவின் இரு பெரும் ஜாம்பவான்களான ரஜினிகாந்த் மற்றும் கமல்ஹாசன் இணைந்து ஒரு படத்தில் நடிக்க இருப்பதாக ஏற்கனவே தகவல்கள் வெளியாகியுள்ளன. அதற்கு முன்னதாக ரஜினிகாந்தை கதாநாயகனாக வைத்து ஒரு படத்தை தயாரிக்க கமல்ஹாசன் முடிவு செய்தார்.

அந்தப் படம்தான் தற்போது ‘தர்மன்’ என்ற பெயரில் உருவாகி வருகிறது. கமல்ஹாசன் தயாரிப்பில் ரஜினிகாந்த் நடிப்பது ரசிகர்கள் மத்தியில் மிகப்பெரிய எதிர்பார்ப்பை ஏற்படுத்தியுள்ளது.

இந்தப் படத்தை முதலில் கே.எஸ்.ரவிக்குமார் இயக்குவார் என்று கூறப்பட்டது. ஆனால் அந்த முயற்சி கைகூடாத நிலையில், இயக்குநர் சுந்தர்.சி படத்துக்குள் வந்தார்.

இதுதொடர்பான அறிவிப்பும் வெளியானதாக கூறப்பட்டது. ஆனால் பின்னர் சுந்தர்.சியும் படத்தில் இருந்து விலகினார். அதனைத் தொடர்ந்து இயக்குநர் சிபி சக்கரவர்த்தியின் பெயரும் இந்தப் படத்துடன் இணைத்து பேசப்பட்டது. அவரும் பின்னர் விலகியதாக தகவல்கள் வெளியாகின.

இப்படி தொடர்ந்து இயக்குநர்கள் மாறியதால், இந்தப் படம் எப்போது தொடங்கும் என்ற சந்தேகம் ரசிகர்கள் மத்தியில் உருவானது.ஒருவழியாக ‘தர்மன்’ படத்தை இயக்கும் வாய்ப்பு அஷ்வத் மாரிமுத்துவுக்கு கிடைத்தது.

‘டிராகன்’ திரைப்படம் வெற்றி பெற்ற பிறகு ரஜினிகாந்தை அஷ்வத் மாரிமுத்து சந்தித்ததாகவும், அந்த சந்திப்பின்போது அவர் கூறிய ஒரு கதை வரிதான் தற்போது முழுமையான திரைக்கதையாக உருவாகியுள்ளதாகவும் கூறப்படுகிறது.

அந்த கதை ரஜினிகாந்துக்கு பிடித்துப் போனதை தொடர்ந்து, அஷ்வத் மாரிமுத்து அதனை முழுமையாக உருவாக்கியதாக தகவல்கள் தெரிவிக்கின்றன.

‘தர்மன்’ திரைப்படத்துக்கு அனிருத் இசையமைக்கிறார். ரஜினிகாந்துடன் சிம்ரன் மற்றும் ராஷி கண்ணா உள்ளிட்டோர் முக்கிய கதாபாத்திரங்களில் நடிக்கின்றனர்.மேலும், நடிகை மீனாட்சி சௌத்ரியும் இந்தப் படத்தில் இணைந்துள்ளதாக தகவல்கள் வெளியாகியுள்ளன.ரஜினிகாந்துடன் பல முன்னணி நடிகர்கள் இணைந்து நடிப்பதால், ‘தர்மன்’ திரைப்படம் பெரிய நட்சத்திர பட்டாளத்துடன் உருவாகி வருவதாக கூறப்படுகிறது.

படத்தின் ஃபர்ஸ்ட் லுக் போஸ்டர் வெளியான பிறகு, ‘தர்மன்’ படத்தில் ரஜினிகாந்த் மருத்துவராக நடிப்பது உறுதியானதாக ரசிகர்கள் கருதுகின்றனர்.இதற்கிடையே, ஹாலிவுட்டில் பிரபலமான ‘தி குட் டாக்டர்’ வெப் சீரிஸின் ரீமேக்தான் ‘தர்மன்’ என்று சமூக வலைதளங்களில் தகவல்கள் பரவின.

ஆனால் இந்த தகவலை இயக்குநர் அஷ்வத் மாரிமுத்து திட்டவட்டமாக மறுத்துள்ளார். ‘தர்மன்’ எந்தப் படத்தின் அல்லது வெப் சீரிஸின் ரீமேக்கும் அல்ல என்று அவர் தெளிவுபடுத்தியுள்ளார்.

‘தர்மன்’ திரைப்படத்தின் தன்மை குறித்து பேசிய அஷ்வத் மாரிமுத்து, ரஜினிகாந்தின் ‘படையப்பா’ மற்றும் கமல்ஹாசனின் ‘வேட்டையாடு விளையாடு’ ஆகிய இரண்டு படங்களின் கலவையைப் போன்ற அனுபவத்தை இந்தப் படம் தரும் என்று கூறியதாக தகவல்கள் வெளியாகியுள்ளன.

இதனால் ‘தர்மன்’ திரைப்படம் மாஸ் மற்றும் கிளாஸ் அம்சங்கள் கலந்த படமாக உருவாகும் என்ற எதிர்பார்ப்பு ரசிகர்கள் மத்தியில் அதிகரித்துள்ளது.

ரஜினிகாந்தின் மாஸ் அம்சங்களுடன், அஷ்வத் மாரிமுத்துவின் தனித்துவமான திரைக்கதை பாணியும் இணைந்தால் படம் எப்படி இருக்கும் என்ற எதிர்பார்ப்பும் எழுந்துள்ளது.

ஒருபுறம் ரஜினிகாந்த் கதாநாயகன், மறுபுறம் கமல்ஹாசன் தயாரிப்பாளர் என்பதால் ‘தர்மன்’ படத்தை மிகுந்த கவனத்துடன் அஷ்வத் மாரிமுத்து கையாண்டு வருவதாக கூறப்படுகிறது.

இதற்கு முன்பு இரண்டு வெற்றிப் படங்களை கொடுத்திருந்தாலும், ‘தர்மன்’ படத்தை தனது முதல் படம் போல நினைத்து வேலை செய்து வருவதாகவும் அவர் தெரிவித்துள்ளார்.

சில நாட்களுக்கு முன்பு சென்னையில் படத்தின் படப்பிடிப்பு தொடங்கியது. இதில் ரஜினிகாந்த் உள்ளிட்டோர் நடித்த முக்கிய காட்சிகளை அஷ்வத் மாரிமுத்து படமாக்கியுள்ளார்.இந்த நிலையில், தனியார் ஊடகம் நடத்திய விருது வழங்கும் நிகழ்ச்சியில் கலந்துகொண்ட அஷ்வத் மாரிமுத்து, ‘தர்மன்’ படப்பிடிப்பு அனுபவத்தை பகிர்ந்துள்ளார்.

அப்போது பேசிய அவர், “தர்மன் திரைப்படம் எனக்கு மிகப்பெரிய பொறுப்பு. நேற்று செட்டில் ரஜினி சாரிடம், ‘இதைப் பற்றி ரொம்ப யோசித்தால் கால் நடுங்கும் சார். அதனால்தான் எதையும் யோசிக்காமல் ஜாலியாக படம் செய்கிறேன்’ என்று சொன்னேன்” என தெரிவித்துள்ளார்.ரஜினிகாந்துடன் பணியாற்றுவது மிகவும் மகிழ்ச்சியான அனுபவமாக இருப்பதாகவும் அவர் கூறியுள்ளார்.

ரஜினிகாந்தின் எனர்ஜி குறித்து பேசிய அஷ்வத் மாரிமுத்து, “அவருக்கு வயதான மாதிரியே தெரியவில்லை. ஷூட்டிங் ஸ்பாட்டில் துள்ளிக் குதிக்கிறார். செம எனர்ஜியாக இருக்கிறார்” என்று கூறியுள்ளார்.

வயதை பொருட்படுத்தாமல் படப்பிடிப்பு தளத்தில் ரஜினிகாந்த் காட்டும் உற்சாகம் தன்னை ஆச்சரியப்படுத்தியதாகவும் அவர் தெரிவித்துள்ளார்.

‘தர்மன்’ திரைப்படம் மிகவும் நேர்த்தியான படமாக இருக்கும் என்று கூறிய அஷ்வத் மாரிமுத்து, ரஜினிகாந்தின் தனித்துவமான அம்சங்களுடன் தனது இயக்குநர் பாணியும் இணைந்த படமாக இது இருக்கும் என்று தெரிவித்துள்ளார்.“ரஜினியிடம் இருக்கும் அத்தனை விஷயங்களும், என்னுடைய ஸ்டைலும் சேர்ந்து இந்தப் படம் வரும்” என்று அவர் கூறியுள்ளார்.

மேலும், “பலர் ரஜினி மற்றும் கமலுடன் படம் செய்ய வேண்டும் என்று ஆசைப்படுகிறார்கள். அவர்கள் அனைவரின் சார்பாக இந்தப் படத்தை நான் செய்கிறேன் என்றுதான் பார்க்கிறேன்” என்றும் அஷ்வத் மாரிமுத்து நெகிழ்ச்சியுடன் தெரிவித்துள்ளார்.

ரஜினிகாந்தின் மாஸ், கமல்ஹாசனின் தயாரிப்பு மற்றும் அஷ்வத் மாரிமுத்துவின் இயக்கம் என மூன்று முக்கிய அம்சங்கள் ஒன்றிணைந்துள்ள ‘தர்மன்’ திரைப்படம் ரசிகர்களின் எதிர்பார்ப்பை பூர்த்தி செய்யுமா என்பதே தற்போது கோலிவுட்டின் முக்கிய எதிர்பார்ப்பாக மாறியுள்ளது.