தமிழக அரசியல் வரலாற்றில் ஒரு புதிய சகாப்தம் இன்று அதிகாரப்பூர்வமாகத் தொடங்கியுள்ளது. கடந்த மே 4-ஆம் தேதி தேர்தல் முடிவுகள் வெளியானது முதல், "யார் அடுத்த முதலமைச்சர்?" என்ற கேள்விக்கு விடை தேடி ஒட்டுமொத்தத் தமிழகமுமே தவம் கிடந்தது. கடந்த ஐந்து நாட்களாக நிலவி வந்த அரசியல் இழுபறிகள், இடியாப்பச் சிக்கல்கள் மற்றும் நள்ளிரவுப் பேச்சுவார்த்தைகள் எனப் பரபரப்பின் உச்சகட்டத்தில் இருந்த சூழல், நேற்று இரவுடன் ஒரு முடிவுக்கு வந்தது. 119 எம்.எல்.ஏ-க்களின் பலத்துடன் தமிழக வெற்றிக் கழகத் தலைவர் விஜய் ஆட்சி அமைக்க ஆளுநர் அழைப்பு விடுத்ததைத் தொடர்ந்து, இன்று காலை பதவியேற்பு விழா மிகப்பிரம்மாண்டமாக நடைபெற்றது.

வரலாற்றுச் சிறப்புமிக்க தருணம்:

சென்னை நேரு உள்விளையாட்டு அரங்கமே விழாக்கோலம் பூண்டிருந்தது. தவெக தொண்டர்களின் மஞ்சள் மற்றும் ஊதா நிறக் கடலுக்கு நடுவே, சரியாக 10 மணியளவில் ஆளுநர் ராஜேந்திர விஸ்வநாத் அர்லேகர் மேடைக்கு வருகை தந்தார். அவரைத் தொடர்ந்து மேடையேறிய தவெக தலைவர் விஜய், ஆளுநர் வாசிக்க, அவரது வழிகாட்டுதலின்படி பதவிப் பிரமாணம் எடுத்துக் கொண்டார்.

அரங்கத்தை அதிரவைத்த முழக்கம்:

விஜய் தனது உறுதிமொழியைத் தொடங்கும்போது, "சி. ஜோசப் விஜய் எனும் நான்..." என்று உச்சரித்த அந்த நொடி, நேரு உள்விளையாட்டு அரங்கமே நிலைகுலைந்து போகும் அளவிற்குத் தொண்டர்களின் ஆரவாரம் விண்ணைப் பிளந்தது. சுமார் 60 ஆண்டுகால திராவிடக் கட்சிகளின் ஆட்சிக்கு மாற்றாக ஒரு புதிய முகம் அரியணையில் ஏறுவதைக் காணத் திரண்டிருந்த லட்சக்கணக்கான மக்கள், உணர்ச்சிப் பெருக்கில் கண்ணீர் மல்கத் தங்கள் தலைவரை வாழ்த்தினர்.

அரசியல் மாற்றம்:

பதவிப் பிரமாணத்தை முடித்த கையோடு, ரகசியக் காப்புப் பிரமாணத்தையும் விஜய் ஏற்றுக் கொண்டார். இதன் மூலம் தமிழகத்தின் முதலமைச்சராகப் பொறுப்பேற்றுள்ள அவர், மக்களாட்சித் தத்துவத்தின்படி இனி வரும் ஐந்து ஆண்டுகளுக்குத் தமிழகத்தை வழிநடத்த உள்ளார். திரையுலகில் ஒரு உச்ச நட்சத்திரமாக ஜொலித்தவர், இன்று நிஜ வாழ்வின் அதிகார மையமான முதலமைச்சர் இருக்கையில் அமர்ந்திருப்பது ஒரு சினிமாத்தனமான வெற்றியாக இல்லாமல், கடுமையான உழைப்பு மற்றும் அரசியல் வியூகங்களின் பலனாகவே பார்க்கப்படுகிறது.

முன்வரிசையில் அவரது பெற்றோர் எஸ்.ஏ.சி மற்றும் ஷோபா சந்திரசேகர் ஆகியோர் நெகிழ்ச்சியுடன் அமர்ந்திருக்க, அருகிலேயே நடிகை திரிஷா உள்ளிட்ட திரைத்துறைப் பிரபலங்களும் இந்த வரலாற்று நிகழ்வுக்குச் சாட்சியாக நின்றனர். பதவியேற்பு முடிந்ததைத் தொடர்ந்து, முதலமைச்சர் விஜய் நேராகத் தலைமைச் செயலகமான புனித ஜார்ஜ் கோட்டைக்குச் சென்று தனது முதல் கோப்பில் கையெழுத்திடுவார் என எதிர்பார்க்கப்படுகிறது.