தமிழக அரசியல் களம் தற்போது ஒரு மாபெரும் ‘கிளைமேக்ஸ்’ காட்சியை நோக்கி நகர்ந்து கொண்டிருக்கிறது. 2026 சட்டமன்றத் தேர்தல் முடிவுகளுக்குப் பிறகு ஒரு வாரமாக நீடித்து வரும் ஆட்சி அமைப்பதற்கான இழுபறி, இப்போது யாரும் எதிர்பார்க்காத ஒரு புதிய திசையை எட்டியுள்ளது.

108 இடங்களைப் பெற்று தனிப்பெரும் கட்சியாக இருக்கும் தமிழக வெற்றிக் கழகம் (தவெக), ஏற்கனவே காங்கிரஸ் மற்றும் இடதுசாரி கட்சிகளின் ஆதரவுடன் 116 என்ற பலத்தைப் பெற்றிருந்தது.

இந்தச் சூழலில், விசிக தலைவர் திருமாவளவன் தனது ‘நிபந்தனையற்ற ஆதரவை’ உறுதி செய்துள்ளதாகவும், அதற்கான கடிதத்தை தவெக நிர்வாகி ஆதவ் அர்ஜுனா பெற்றுக்கொண்டதாகவும் வெளியாகும் தகவல்கள் விஜய்யை 118 என்ற ‘மேஜிக் நம்பருக்கு’ கொண்டு சென்றுள்ளன.

இதனைத் தொடர்ந்து, நீலாங்கரையில் இருந்து பட்டினம்பாக்கம் இல்லத்திற்குத் தனது முகாமை மாற்றியுள்ள விஜய், அங்குத் தனது மிக முக்கியமான தளபதிகளுடன் அடுத்தகட்ட மூலோபாயங்களை வகுத்து வருகிறார்.

ஆனால், தமிழக அரசியலின் அஸ்திவாரத்தையே ஆட்டங்காணச் செய்யும் ஒரு செய்தி தற்போது காட்டுத்தீயாகப் பரவி வருகிறது. அதிமுக-வின் மூத்த தலைவர்களான சி.வி. சண்முகம், எஸ்.பி. வேலுமணி மற்றும் விஜயபாஸ்கர் ஆகியோர் தலைமையிலான ஒரு குழு, இன்னும் சில நிமிடங்களில் பட்டினம்பாக்கம் இல்லத்தில் விஜய்யைச் சந்தித்து தங்களது ஆதரவைத் தெரிவிக்க உள்ளதாகக் கூறப்படுகிறது.

எடப்பாடி பழனிசாமி இன்று காலை நடத்திய கூட்டத்தில் 5 எம்.எல்.ஏ-க்கள் பங்கேற்காத நிலையில், அவர்கள் சி.வி. சண்முகம் தலைமையில் தவெக முகாமுக்கு ஆதரவு அளிக்க முன்வந்துள்ளதாக சொல்லப்படுவது மிகப்பெரிய ‘மாஸ்டர் ஸ்டிரோக்’ ஆகப் பார்க்கப்படுகிறது.

ஒருவேளை இந்தச் சந்திப்பு நிகழ்ந்து, அதிமுக-வின் ஒரு பகுதியினர் விஜய்க்கு ஆதரவு அளித்தால், அது தமிழகத்தின் அறுபதாண்டு கால திராவிட அரசியல் வரலாற்றில் மிகப்பெரிய மாற்றத்தை ஏற்படுத்தும். தவெக-விற்குத் தேவையான பெரும்பான்மைக்கு விசிக ஆதரவே போதும் என்ற நிலையில், அதிமுக நிர்வாகிகளின் இந்த வரவு விஜய்யின் பலத்தை ஊர்ஜிதப்படுத்துவதுடன், எதிர்க்கட்சிகளைப் பலவீனப்படுத்தும் ஒரு யுக்தியாகவும் அமையும். ஆளுநர் மாளிகையிலிருந்து அழைப்பு வரும் வரை நீடிக்கப்போகும் இந்த நள்ளிரவு அரசியல் நாடகம், தமிழகத்திற்கு ஒரு புதிய முதலமைச்சரைக் கொடுக்குமா அல்லது புதிய அரசியல் பிளவுகளை உருவாக்குமா என்பது இன்னும் சற்று நேரத்தில் தெரிந்துவிடும்.