சென்னை யானைக்கவுனி பகுதியில் 45 அடி ஆழமுள்ள கிணற்றை தூர்வாரும் பணியில் ஈடுபட்டிருந்த தந்தை மற்றும் மகன் அடுத்தடுத்து விஷவாயு தாக்குதலுக்கு உள்ளாகி உயிரிழந்த சம்பவம் பெரும் அதிர்ச்சியை ஏற்படுத்தியுள்ளது. கிணற்றுக்குள் மயங்கி விழுந்த மகனை மீட்கச் சென்ற தந்தையும் அதே விஷவாயுவில் சிக்கி உயிரிழந்தது அந்தக் குடும்பத்தினரையும், அப்பகுதி மக்களையும் சோகத்தில் ஆழ்த்தியுள்ளது.

சென்னை கொடுங்கையூர் பகுதியைச் சேர்ந்த ரவி (52). இவரது மகன் அய்யனார் (21). தொழிலாளர்களான இருவரும் இன்று புதன்கிழமை யானைக்கவுனி பகுதியில் உள்ள குடியிருப்பு ஒன்றில் அமைந்திருந்த 45 அடி ஆழமுள்ள கிணற்றை தூர்வாரும் பணியில் ஈடுபட்டிருந்தனர்.

தூர்வாரும் பணிக்காக முதலில் அய்யனார் கிணற்றுக்குள் இறங்கினார். கிணற்றின் ஆழமான பகுதியில் சென்றபோது, அங்கு தேங்கியிருந்த விஷவாயுவை சுவாசித்ததால் அவருக்கு திடீரென மூச்சுத்திணறல் ஏற்பட்டதாக தெரிவிக்கப்படுகிறது. சிறிது நேரத்தில் அவர் கிணற்றின் அடிப்பகுதியிலேயே மயங்கி விழுந்தார்.மகன் நீண்ட நேரமாகியும் மேலே வராததால் பதற்றமடைந்த ரவி, அவரை மீட்கும் நோக்கில் உடனடியாக கிணற்றுக்குள் இறங்கினார்.

ஆனால் மகனை காப்பாற்றும் முயற்சியில் இறங்கிய அவரையும் விஷவாயு தாக்கியது. இதனால் ரவியும் கிணற்றின் அடிப்பகுதியில் மயங்கி விழுந்து உயிரிழந்தார்.தந்தையும் மகனும் கிணற்றுக்குள் சிக்கியிருப்பதை அறிந்த அக்கம் பக்கத்தினர் உடனடியாக தகவல் தெரிவித்தனர். இதையடுத்து தீயணைப்பு மற்றும் மீட்புப் பணியினர் விரைந்து வந்து மீட்புப் பணியில் ஈடுபட்டனர்.

விஷவாயு அபாயம் இருந்ததால் முகக்கவசம், ஆக்சிஜன் சிலிண்டர் உள்ளிட்ட பாதுகாப்பு உபகரணங்களுடன் கிணற்றுக்குள் இறங்கிய மீட்புப் பணியினர், நீண்ட நேர போராட்டத்துக்குப் பிறகு ரவி மற்றும் அய்யனாரின் உடல்களை வெளியே கொண்டு வந்தனர்.பின்னர் இருவரது உடல்களும் உடற்கூறாய்வுக்காக அரசு மருத்துவமனைக்கு அனுப்பி வைக்கப்பட்டன.

இந்த சம்பவம் குறித்து யானைக்கவுனி காவலர்கள் வழக்குப்பதிவு செய்து விசாரணை மேற்கொண்டு வருகின்றனர். கிணற்றை தூர்வாரும் பணியின்போது போதிய பாதுகாப்பு ஏற்பாடுகள் செய்யப்பட்டிருந்தனவா, கிணற்றுக்குள் விஷவாயு இருப்பது குறித்து முன்கூட்டியே ஆய்வு செய்யப்பட்டதா என்பது உள்ளிட்ட பல்வேறு கோணங்களில் விசாரணை நடைபெற்று வருகிறது.மகனை மீட்கச் சென்ற தந்தையும் விஷவாயுவில் சிக்கி உயிரிழந்த இந்த துயர சம்பவம், யானைக்கவுனி பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது.