கன்னியாகுமரி மாவட்டம் ஆரல்வாய்மொழியில் சொத்து பிரச்சினையால் நீடித்த குடும்பத் தகராறு திடீரென கொலைச் சம்பவமாக மாறியது. அதிகாலையில் ஏற்பட்ட வாக்குவாதம் முற்றிய நிலையில், அண்ணி சப்பாத்திக் கட்டையால் தாக்கியதில் 66 வயதான கொழுந்தன் பரிதாபமாக உயிரிழந்தார். கொலைக்குப் பிறகு அண்ணி தலைமறைவானதால், அவரை பிடிக்க காவலர்கள் தீவிர தேடுதல் வேட்டையில் இறங்கியுள்ளனர்.

ஆரல்வாய்மொழி பகுதியைச் சேர்ந்தவர் நதியா. இவரது கொழுந்தன் பாலகிருஷ்ணன் (66). இருவருக்கும் இடையே சொத்து தொடர்பான பிரச்சினை காரணமாக கடந்த சில நாட்களாக கருத்து வேறுபாடு இருந்து வந்ததாகத் தெரிவிக்கப்படுகிறது. உறவினர்கள் தலையிட்டு சமரசம் செய்தபோதிலும், அவர்களுக்கிடையேயான மோதல் தொடர்ந்து நீடித்ததாகக் கூறப்படுகிறது.இந்த நிலையில், இன்று அதிகாலை இருவருக்கும் இடையே மீண்டும் வாக்குவாதம் ஏற்பட்டுள்ளது.

வாக்குவாதம் தீவிரமடைந்த நிலையில், ஆத்திரமடைந்த நதியா சமையலறையில் இருந்த சப்பாத்திக் கட்டையை எடுத்ததாகத் தெரிவிக்கப்படுகிறது.அதனைத் தொடர்ந்து பாலகிருஷ்ணனை அவர் சரமாரியாக தாக்கியதாகத் தெரிவிக்கப்படுகிறது. இதில் தலையில் பலத்த காயமடைந்த பாலகிருஷ்ணன் ரத்த வெள்ளத்தில் கீழே விழுந்தார்.

சிறிது நேரத்திலேயே அவர் சம்பவ இடத்திலேயே உயிரிழந்ததாகத் தெரிவிக்கப்படுகிறது.பாலகிருஷ்ணன் உயிரிழந்ததை அறிந்த நதியா அங்கிருந்து தப்பிச் சென்று தலைமறைவானதாகத் தெரிவிக்கப்படுகிறது. இதனால் அதிர்ச்சியடைந்த அக்கம்பக்கத்தினர் சம்பவம் குறித்து காவலர்களுக்கு தகவல் அளித்தனர்.

தகவலின்பேரில் சம்பவ இடத்துக்கு விரைந்த ஆரல்வாய்மொழி காவலர்கள், பாலகிருஷ்ணனின் உடலை மீட்டு உடற்கூறாய்வுக்காக ஆசாரிபள்ளம் அரசு மருத்துவமனைக்கு அனுப்பி வைத்தனர்.இதுதொடர்பாக வழக்குப்பதிவு செய்து விசாரணை மேற்கொண்டு வரும் காவலர்கள், தலைமறைவான நதியாவை பிடிக்க நடவடிக்கை எடுத்துள்ளனர்.

மாவட்ட காவல் கண்காணிப்பாளர் உத்தரவின்பேரில் தனிப்படை அமைக்கப்பட்டு, பல்வேறு இடங்களில் தீவிர தேடுதல் நடைபெற்று வருகிறது.சொத்து தகராறில் தொடங்கிய குடும்ப மோதல் கொலையில் முடிந்த சம்பவம் ஆரல்வாய்மொழி பகுதியில் பெரும் அதிர்ச்சியையும் பரபரப்பையும் ஏற்படுத்தியுள்ளது.