சிம்புவை வைத்து இயக்குநர் வெற்றிமாறன் உருவாக்கி வரும் அரசன் திரைப்படம் தொடங்கியதிலிருந்தே பெரும் எதிர்பார்ப்பை ஏற்படுத்தியுள்ளது. நீண்டநாளாக காத்திருந்த இந்த கூட்டணி இறுதியாக அமைந்ததால் எஸ்டிஆர் ரசிகர்கள் உற்சாகத்தில் உள்ளனர். இப்படம் நிச்சயம் வித்தியாசமான வெற்றியைப் பெறும் என்ற நம்பிக்கையும் நிலவி வருகிறது.

சிம்பு தனது இரண்டாவது இன்னிங்ஸில் கவனமாக கதைகளை தேர்வு செய்து வருகிறார். மாநாடு, வெந்து தணிந்தது காடு போன்ற வெற்றி படங்களுக்குப் பிறகு வந்த பத்து தல, தக் லைஃப் படங்கள் பெரிய அளவில் வரவேற்பு பெறவில்லை என்றாலும், அவரது நடிப்புக்கு பாராட்டுகள் கிடைத்தன. இந்த நிலையில் வெற்றிமாறனுடன் இணைந்திருப்பது அவரது கரியரில் முக்கிய திருப்பமாக பார்க்கப்படுகிறது.

ஏற்கனவே வடசென்னை படத்தை முதலில் சிம்புவை வைத்து இயக்கத் திட்டமிட்டிருந்த வெற்றிமாறன், சூழ்நிலைகளால் அது சாத்தியமாகாமல் போனது. அந்த இடத்தை தனுஷ் பிடித்தார். இதனால் இந்த முறை வெற்றி–சிம்பு கூட்டணி உருவாகியிருப்பது ரசிகர்களுக்கு கூடுதல் மகிழ்ச்சியை அளித்துள்ளது.

அரசன் என பெயரிடப்பட்டுள்ள இந்த படத்தை கலைப்புலி எஸ்.தாணு தயாரிக்கிறார். அனிருத் இசையமைக்கிறார். மதுரையில் இருந்து சென்னை வருகிற கபடி வீரர் ஒருவர் பின்னர் ரவுடியாக மாறும் கதை என கூறப்படுகிறது. சில தகவல்களின் படி, இது மறைந்த ரவுடி டைகர் சிவாவின் வாழ்க்கையை மையமாகக் கொண்டிருக்கலாம் எனவும் கூறப்படுகிறது.

படத்தின் முதல் கட்ட படப்பிடிப்பில் விஜய் சேதுபதி முக்கிய வேடத்தில் நடித்தார். ஆனால் அண்மையில் அவர் படத்திலிருந்து விலகியிருக்கலாம் என்றும், அவருக்குப் பதிலாக ராணா டகுபதி இணைவார் என்றும் தகவல்கள் பரவி வருகின்றன. இதுகுறித்து அதிகாரப்பூர்வ அறிவிப்பு வெளியாகவில்லை.

இந்நிலையில், அரசன் படத்தின் ஓடிடி உரிமையை வாங்க பல முன்னணி நிறுவனங்கள் ஆர்வம் காட்டியுள்ளன. ஆனால் தயாரிப்பாளர் தாணு, தனது தயாரிப்பிலுள்ள மற்றொரு படமான ட்ரெய்ன் திரைப்படத்தையும் இணைத்து வாங்க வேண்டும் என்ற நிபந்தனை வைத்ததாக கூறப்படுகிறது. இதனால் சில ஓடிடி நிறுவனங்கள் பின்வாங்கியுள்ளன என கோலிவுட் வட்டாரங்களில் பேசப்படுகிறது.

இந்த தகவல் உண்மையானால், ஓடிடி ஒப்பந்தம் தாமதமாகும் வாய்ப்பு உள்ளது. இருப்பினும் படக்குழுவின் அதிகாரப்பூர்வ அறிவிப்புக்காக ரசிகர்கள் காத்திருக்கின்றனர். எதிர்பார்ப்பை உயர்த்தியுள்ள அரசன் திரைப்படம் எந்த தடையையும் தாண்டி திரையுலகில் பெரிய வெற்றி பெறுமா என்பது வரும் நாட்களில் தெளிவாகும்.