ஜெயிலர் படத்தின் ஆடியோ லாஞ்சுக்கு அனுமதித்த தமிழக அரசு, நடிகர் விஜய்யின் லியோ ஆடியோ லாஞ்சுக்கு அனுமதி கொடுக்காதது ஏன்? என்று, நாம் தமிழர் கட்சியின் ஒருங்கிணைப்பாளர் சீமான் கேள்வி எழுப்பியுள்ளார். 

இன்று சென்னையில் செய்தியாளர்களை சந்தித்த சீமான் தெரிவிக்கையில், "நடிகர் விஜய் தன்னுடைய பல படங்களின் இசைவெளியீட்டு விழாவை நடத்தியுள்ளார். 

இந்த லியோ படத்திற்கு மட்டும் இசைவெளியீட்டு விழா ரத்து செய்தது ஏன்? அண்மையில் ஏ.ஆர். ரஹ்மான் நிகழ்ச்சிக்கு அனுமதி கொடுத்தது காவல்துறை. அங்கு கள ஆய்வு செய்து அனுமதித்தது போல, நேரு உள்விளையாட்டு அரங்கிலும் ரசிகர்கள் வருகை குறித்து ஆய்வு செய்து அனுமதி வழங்க வேண்டும்.

ஆனால், ஏ.ஆர். ரஹ்மான் இசைநிகழ்ச்சியில் நடைபெற்ற பிரச்னையை காரணம் காட்டி, லியோ பட இசைவெளியீட்டு விழாவுக்கு அனுமதி மறுப்பது ஏன்?

அரசியல் கட்சியினர் மாநாடு நடத்தும்போது லட்சக்கணக்கானோர் கூடுவதும், அதற்க்கு பாதுகாப்பு அளிப்பதும் இதே காவல்துறை தான். 

ஏற்கனவே நேரு உள்விளையாட்டு அரங்கில் நடிகர் ரஜினியின் ஜெயிலர் பட இசை வெளியீட்டு விழாவுக்கு அனுமதி கொடுத்த அரசு, நடிகர் விஜயின் லியோ பட இசை வெளியீட்டு விழாவுக்கு ஏன் அனுமதி கொடுக்கவில்லை. 

நீருக்குள் காற்றடைத்த பந்தை எவ்வளவு அழுத்தி வைத்தாலும், அது மேலே வரத்தான் செய்யும்" என்று நடிகர் விஜய்க்கு ஆதரவாக சீமான் கொந்தளிப்புடன் தனது கருத்தினை பதிவு செய்துள்ளார்.