இந்திய திரையுலகின் இரு உச்ச நட்சத்திரங்கள்… சூப்பர் ஸ்டார் ரஜினிகாந்தும், உலக நாயகன் கமல்ஹாசனும்! 1970-களில் 20-க்கும் மேற்பட்ட படங்களில் இணைந்து நடித்த இவர்களின் கூட்டணி, ரசிகர்களுக்கு மறக்க முடியாத நினைவுகளைத் தந்தது. ஆனால் அதன் பிறகு இருவரும் தனித்தனியாகப் பயணித்தனர்.

 இப்போது — சுமார் 46 ஆண்டுகளுக்குப் பிறகு, இருவரும் மீண்டும் இணைந்து நடிக்க உள்ளனர் என்பதே கோலிவுட் மட்டுமல்ல, இந்திய சினிமா ரசிகர்களுக்கே ஒரு பெரும் சர்ப்ரைஸ்.

சமீபத்தில் சைமா விருதுகள் விழாவில் கமல், “நாங்கள் இருவரும் இணைந்து நடிக்க பல ஆண்டுகளாக முயற்சி செய்து வந்தோம். விரைவில் ஒன்றாக வருகிறோம். ரசிகர்கள் விரும்பினால் அதுவே எங்களுக்குப் பெரும் மகிழ்ச்சி” என்று கூறியிருந்தார். அதே சமயம், “எங்களுக்குள் வேறுபாடுகள் இல்லை. ஒருவரையொருவர் போட்டியாகவே பார்த்ததில்லை” என்றும் அவர் விளக்கம் அளித்தார்.

அதே நிகழ்ச்சிக்குப் பிறகு ரஜினிகாந்தும், “கமலுடன் சேர்ந்து நடிக்கிறேன். படத்தை ரெட் ஜெயண்ட் மற்றும் ராஜ்கமல் நிறுவனங்கள் தயாரிக்கின்றன. ஆனால்… இயக்குனர் இன்னும் முடிவாகவில்லை” என்று கூறியதால், ரசிகர்கள் மத்தியில் பெரிய சஸ்பென்ஸ் எழுந்தது.

முதலில், இந்த பிரம்மாண்ட மல்டிஸ்டாரர் படத்தை லோகேஷ் கனகராஜ் இயக்குவார் என்று பேச்சு பரவியது. ஆனால் ரஜினியின் இந்தக் குறிப்பால் அந்த வாய்ப்பு குறைந்து விட்டது.

 தற்போது, கோலிவுட் வட்டாரத்தில், பிரதீப் ரங்கநாதன் தான் இயக்குனராக இருக்கலாம் என்ற அப்டேட் தீவிரமாக பேசப்படுகிறது. ஏற்கெனவே அவர் ‘லவ் இன்சூரன்ஸ் கம்பெனி’ மற்றும் ‘டியூடு’ ஆகிய இரண்டு படங்களையும் முடித்துவிட்டார். அடுத்த திட்டம் குறித்து எதையும் அறிவிக்காமல் இருப்பது, இந்த சந்தேகத்தை மேலும் உறுதிப்படுத்துகிறது.

 கமல்ஹாசனும், ரஜினிகாந்தும் 46 ஆண்டுகளுக்குப் பிறகு மீண்டும் இணையும் இந்த பிரம்மாண்ட திட்டம் — ரசிகர்களுக்கு உண்மையான பண்டிகை. இயக்குனர் யார் என்பது இன்னும் மர்மமாக இருந்தாலும், ஒரே விஷயம் உறுதி… சினிமா ரசிகர்களுக்கு இது வரலாற்றுச் சுவடுகளை பதிக்கும் படம் ஆகும்.