முன்னணி ஆன்லைன் உணவு விநியோக நிறுவனம் ஸ்விகி தனது பிளாட்ஃபார்ம் கட்டணத்தை உயர்த்தியுள்ளது. இதுவரை ரூ.12 வசூலித்து வந்த நிலையில், தற்போது அது ரூ.14 ஆக உயர்த்தப்பட்டதாக நிறுவனம் அறிவித்துள்ளது. இது 17 சதவீத உயர்வாகும்.

அதிக தேவை காணப்படும் குறிப்பிட்ட பகுதிகளில் சோதனை அடிப்படையில் இந்த மாற்றம் மேற்கொள்ளப்பட்டுள்ளதாகவும், பண்டிகைக் காலத்தை முன்னிட்டு ஆர்டர்கள் அதிகரித்ததால் தற்காலிகமாகவே இந்த கட்டண உயர்வு அமல்படுத்தப்பட்டுள்ளதாகவும் ஸ்விகி விளக்கியுள்ளது.

ஸ்விகி தனது பிளாட்ஃபார்ம் கட்டணத்தை கடந்த சில ஆண்டுகளில் அடிக்கடி உயர்த்தி வந்துள்ளது. 2023 ஆம் ஆண்டில் வெறும் ரூ.2 ஆக இருந்த இந்த கட்டணம், இரண்டு ஆண்டுகளில் ரூ.14 ஆக உயர்ந்துள்ளது. இதன் மூலம் 600 சதவீதம் அதிகரிப்பு ஏற்பட்டுள்ளது.

மறுபுறம், ஸ்விகியின் முக்கிய போட்டியாளரான Zomato தற்போது பிளாட்ஃபார்ம் கட்டணத்தை ரூ.10 மட்டுமே வசூலித்து வருகிறது. இதனால், வாடிக்கையாளர்கள் இடையே ஒப்பீட்டு நிலை ஏற்பட்டுள்ளது.

புதிய கட்டண உயர்வால், அதிகமாக ஆன்லைன் உணவு ஆர்டர் செய்வோர் மீது கூடுதல் சுமை ஏற்படுகிறது. ஆனால், பண்டிகை காலத்தில் அதிகரித்திருக்கும் ஆர்டர்களை சீராக கையாளவும், சேவையின் தரத்தை மேம்படுத்தவும் இந்த நடவடிக்கை அவசியம் என நிறுவனம் வலியுறுத்தியுள்ளது.

இந்த முடிவு நீண்ட காலமாக தொடருமா அல்லது பண்டிகை காலத்திற்கு பிறகு பழைய கட்டண நிலைக்கு திரும்புமா என்பது குறித்து நிறுவனம் இதுவரை தெளிவுபடுத்தவில்லை.