திருவண்ணாமலை மாவட்டம் போளூர் தொகுதியில் தேர்தல் கண்காணிப்பு நடவடிக்கைகள் தீவிரமடைந்துள்ள நிலையில், பறக்கும் படையினர் போளூர் பைபாஸ் சாலையில் விழிப்புடன் கண்காணிப்பு பணியில் ஈடுபட்டிருந்தனர். அப்போது திருப்பதியில் இருந்து நாகர்கோவிலை நோக்கி பயணம் செய்த தனியார் ஆம்னி பேருந்து சந்தேகத்தின் பேரில் தடுத்து நிறுத்தப்பட்டது.

இதைத் தொடர்ந்து, பறக்கும் படையினர் மற்றும் காவலர்கள் இணைந்து அந்த பேருந்தில் விரிவான சோதனையை மேற்கொண்டனர். முதலில் பயணிகளின் பொதிகளை வைக்கும் பக்கவாட்டு இடங்கள் திறந்து ஆய்வு செய்யப்பட்டன. பின்னர் பேருந்துக்குள் நுழைந்து ஒவ்வொரு இருக்கையையும் கவனமாக பரிசோதித்தனர்.

அப்போது, ஒரு இருக்கை அருகே கவனத்தை ஈர்த்திருந்த பையை திறந்து பார்த்தபோது, அதில் சுமார் 10 கிலோ அளவிலான கஞ்சா மறைத்து வைக்கப்பட்டிருந்தது கண்டறியப்பட்டது. இதையடுத்து, அந்த போதைப் பொருள் உடனடியாக பறிமுதல் செய்யப்பட்டது.பேருந்தில் பயணம் செய்தவர்களிடம் தீவிரமாக விசாரிக்கப்பட்டபோதிலும், அந்த பைக்கு யாரும் உரிமை கோராததால் சந்தேகம் மேலும் அதிகரித்தது.

இதனால், திருப்பதியில் முன்பதிவு செய்யப்பட்ட அனைத்து பயணிகளின் விவரங்களையும் பறக்கும் படையினர் மற்றும் காவலர்கள் சேகரித்து, சம்பவம் குறித்து ஆழமான விசாரணை மேற்கொண்டு வருகின்றனர் எனத் தெரிவிக்கப்படுகின்றது.

மேலும், இந்த சோதனை நடவடிக்கை முழுவதும் வீடியோவாக பதிவு செய்யப்பட்டுள்ள நிலையில், அதனை ஆய்வு செய்து சந்தேகத்திற்கிடமான நபர்களை அடையாளம் காணும் பணியும் நடைபெற்று வருகிறது.

தேர்தல் காலத்தில் போதைப் பொருள் கடத்தலை தடுக்கும் வகையில் மேற்கொள்ளப்பட்ட இந்த அதிரடி நடவடிக்கை பரபரப்பை ஏற்படுத்தியுள்ளது எனத் தெரிவிக்கப்படுகின்றது.