சென்னை அண்ணா அறிவாலயத்தில் நடைபெற்ற கட்சி இணைப்பு நிகழ்ச்சியில், செங்கல்பட்டு தொகுதியில் அ.தி.மு.க. சார்பில் போட்டியிட்ட கஜா (எ) கஜேந்திரன் தலைமையில் பலர் தி.மு.க.வில் இணைந்தனர். நிகழ்ச்சியில் உரையாற்றிய தி.மு.க. தலைவர் மு.க. ஸ்டாலின், புதிய உறுப்பினர்களை வரவேற்று பேசினார்.

திராவிட இயக்கத்தின் கொள்கைகள், சமூகநீதி மற்றும் ஜனநாயகப் பண்புகளை நம்பி தி.மு.க.வில் இணைந்துள்ள அனைவருக்கும் மனமார்ந்த வரவேற்பை தெரிவித்த அவர், 75 ஆண்டுகால வரலாற்றுப் பயணத்தையும், ஆறு முறை ஆட்சிப் பொறுப்பை வகித்த அரசியல் மரபையும் நினைவுகூர்ந்தார்.

பொதுவாக ஆளுங்கட்சியை நோக்கி அரசியல் இடமாற்றங்கள் நடைபெறுவது வழக்கம் என்றாலும், தற்போது எதிர்க்கட்சியாக இருக்கும் தி.மு.க.வை நோக்கி பலர் வருவது, பதவி அல்லது தனிப்பட்ட பலன்களுக்காக அல்ல; கொள்கை நம்பிக்கை மற்றும் சமூகப் பொறுப்புணர்வின் வெளிப்பாடு என்று அவர் குறிப்பிட்டார்.

கஜேந்திரன் தனது முந்தைய கட்சியில் விசுவாசத்துடன் செயல்பட்டதை பாராட்டிய ஸ்டாலின், எந்த இயக்கத்தில் இருந்தாலும் உண்மையான அர்ப்பணிப்பும் நம்பிக்கையும் அவசியம் என வலியுறுத்தினார். அதே விசுவாசத்துடன் தி.மு.க.விற்கும் பணியாற்றுவார் என்ற நம்பிக்கையை வெளிப்படுத்தினார்.

தி.மு.க.வின் அரசியல் வரலாற்றை சுட்டிக்காட்டிய அவர், வெற்றியும் தோல்வியும் அரசியல் பயணத்தின் ஓர் அங்கமே என்றும், எந்த சூழலிலும் மக்கள் பணியை நிறுத்தாமல் முன்னெடுத்து செல்வதே தி.மு.க.வின் அடையாளம் என்றும் தெரிவித்தார்.நெருக்கடி நிலை காலம் முதல் பல்வேறு அரசியல் சவால்களை எதிர்கொண்டு மீண்டு வந்த இயக்கம் தி.மு.க. என குறிப்பிட்ட அவர், ஜனநாயகத்திற்காக ஆட்சியையே தியாகம் செய்த வரலாறு இந்த இயக்கத்திற்கு இருப்பதாக நினைவூட்டினார்.

தற்போது ஆட்சிப் பொறுப்பில் இல்லாவிட்டாலும், மக்களின் நலன் மற்றும் ஜனநாயகப் பாதுகாப்பிற்காக தி.மு.க. தொடர்ந்து செயல்பட்டு வருவதாகவும், கட்சியின் வளர்ச்சிக்காக புதிய உறுப்பினர்கள் முழு அர்ப்பணிப்புடன் பணியாற்ற வேண்டும் என்றும் அவர் அழைப்பு விடுத்தார்.

இறுதியாக, தி.மு.க.வின் அடுத்த கட்ட எழுச்சிக்கான உறுதியை அனைவரும் ஏற்க வேண்டும் என வலியுறுத்திய அவர், புதிய உறுப்பினர்களுக்கு மீண்டும் தனது வாழ்த்துகளையும் வரவேற்பையும் தெரிவித்தார்.இவ்வாறு அவர் தெரிவித்தார்.