திருநெல்வேலி மாவட்டம் மேலப்பாளையத்தில் 4 வயது சிறுமி ஒருவர் நிமோனியா காய்ச்சலால் பாதிக்கப்பட்டு உயிரிழந்த சம்பவம் அப்பகுதியில் பெரும் சோகத்தையும், மக்களிடையே அச்சத்தையும் ஏற்படுத்தியுள்ளது.

நிமோனியா:

நிமோனியா என்பது நுரையீரலைத் தாக்கும் ஒரு தீவிரமான தொற்று நோயாகும். பாக்டீரியா, வைரஸ் அல்லது பூஞ்சை போன்ற நுண்கிருமிகள் நுரையீரலில் உள்ள காற்றுப் பைகளில் வீக்கத்தை ஏற்படுத்தி, அவற்றில் நீர் அல்லது சளி கோர்த்துக்கொள்ளச் செய்வதால் இந்த பாதிப்பு ஏற்படுகிறது. இதனால் மூச்சு விடுவதில் சிரமம், நெஞ்சு வலி, கடுமையான காய்ச்சல் மற்றும் இருமல் போன்றவை அறிகுறிகளாகத் தோன்றும். குறிப்பாக, நோய் எதிர்ப்புச் சக்தி குறைவாக உள்ள குழந்தைகள் மற்றும் முதியவர்களை இந்த நோய் எளிதில் தாக்கும்.

நெல்லை மேலப்பாளையம் பெரிய குத்பா பள்ளிவாசல் பகுதியைச் சேர்ந்த ரசூல் என்பவரின் மகள் ரிப்கா பாத்திமா (4). இந்தச் சிறுமிக்கு கடந்த சில நாட்களாகக் கடுமையான காய்ச்சல் பாதிப்பு இருந்துள்ளது. இதனைத் தொடர்ந்து, சிறுமியை நெல்லையில் உள்ள ஒரு தனியார் மருத்துவமனையில் சிகிச்சைக்காகப் பெற்றோர் அனுமதித்தனர். அங்கு நடத்திய பரிசோதனையில் சிறுமிக்குத் தீவிரமான நிமோனியா பாதிப்பு இருப்பது உறுதி செய்யப்பட்டது. மருத்துவர்கள் தீவிர சிகிச்சை அளித்தும் பலனின்றி, இன்று சிறுமி ரிப்கா பாத்திமா பரிதாபமாக உயிரிழந்தாள்.

சுகாதார சீர்கேடும் மக்களின் கோரிக்கையும்:

மேலப்பாளையம் மற்றும் அதனைச் சுற்றியுள்ள பகுதிகளில் நிலவி வரும் சுகாதார சீர்கேடு காரணமாகக் கொசுக்கள் உற்பத்தி அதிகரித்து, காய்ச்சல் வேகமாகப் பரவி வருவதாகப் பொதுமக்கள் குற்றம் சாட்டுகின்றனர். சிறுமியின் இறப்புக்குப் பிறகு, அப்பகுதியில் காய்ச்சலைக் கட்டுப்படுத்த மாநகராட்சி நிர்வாகம் போர்க்கால அடிப்படையில் நடவடிக்கை எடுக்க வேண்டும் என மக்கள் கோரிக்கை விடுத்துள்ளனர்.

சுகாதாரத் துறையின் ஆய்வு:

சிறுமி பலியானதைத் தொடர்ந்து, நெல்லை மாவட்ட சுகாதாரப் பணிகள் துணை இயக்குனர் டாக்டர் முரளி தலைமையிலான அதிகாரிகள் மேலப்பாளையத்தில் நேரில் ஆய்வு செய்தனர். இது குறித்து அவர் கூறுகையில், "உயிரிழந்த சிறுமிக்கு நுரையீரலில் மிகத் தீவிரமான பாதிப்பு இருந்தது. சிறுமியின் இறப்பைத் தொடர்ந்து அப்பகுதியில் உள்ள மற்ற குழந்தைகளுக்கும் மருத்துவப் பரிசோதனைகள் செய்யப்பட்டன. தற்போதைய நிலையில் வேறு எந்தக் குழந்தைக்கும் அத்தகைய தீவிர நிமோனியா பாதிப்பு கண்டறியப்படவில்லை" என்று தெரிவித்துள்ளார். எனினும், முன்னெச்சரிக்கை நடவடிக்கையாகத் துப்புரவு மற்றும் சுகாதாரப் பணிகள் முடுக்கிவிடப்பட்டுள்ளன.