தமிழகத்தின் பட்டாசு ஆலைகளில் தொடர்ச்சியாக நிகழும் வெடி விபத்துக்கள் பெரும் கவலையை ஏற்படுத்தியுள்ள நிலையில், தேனி மாவட்டத்தில் இன்று (சனிக்கிழமை, ஏப்ரல் 25, 2026) நிகழ்ந்த விபத்து மேலும் அதிர்ச்சியாயி ஏற்படுத்தியுள்ளது.

தேனி மாவட்டம் கம்பம் அருகே உள்ள காட்டுப்பள்ளி வாசல் பகுதியில் இயங்கி வரும் ஒரு பட்டாசு ஆலையில் இந்த கோர விபத்து நிகழ்ந்தது.

ஆலையின் மருந்து வைப்பறையில் (Chemical Storage Room) தொழிலாளர்கள் பணிகளில் ஈடுபட்டிருந்தபோது, எதிர்பாராத விதமாக மருந்துகள் உராய்ந்து திடீரென வெடித்ததாகக் கூறப்படுகிறது. இந்த அதிர்ச்சியில் அந்தப் பகுதியே அதிர்ந்தது. இந்தச் சம்பவத்தில் பணியில் இருந்த இரண்டு தொழிலாளர்கள் சம்பவ இடத்திலேயே உடல் சிதறி பரிதாபமாக உயிரிழந்தனர்.

மேலும் ஒருவர் மிகக் கடுமையான காயங்களுடன் மீட்கப்பட்டு, தற்போது தீவிர சிகிச்சை பிரிவில் அனுமதிக்கப்பட்டுள்ளார். தகவலறிந்து விரைந்து வந்த தீயணைப்பு மற்றும் மீட்புப் பணிகள் துறையினர், மேலும் தீ பரவாமல் தடுத்து மீட்பு நடவடிக்கைகளை மேற்கொண்டனர்.

தொடரும் ரணங்கள்:

இந்த விபத்தானது, விருதுநகர் மாவட்டம் கட்டனார்பட்டியில் கடந்த ஞாயிற்றுக்கிழமை (ஏப்ரல் 19, 2026) நிகழ்ந்த மாபெரும் விபத்தின் ரணம் மறைவதற்குள் நடந்துள்ளது. கட்டனார்பட்டி விபத்தில் 25 பேர் பலியான சோகம் இன்னும் ஆறாத நிலையில், ஒரு வார காலத்திற்குள்ளேயே மீண்டும் ஒரு விபத்து நேர்ந்துள்ளது அதிர்ச்சியை ஏற்படுத்தியுள்ளது. பட்டாசு ஆலைகளில் பாதுகாப்பு விதிமுறைகள் முறையாகப் பின்பற்றப்படுகிறதா என்ற கேள்வியை இது எழுப்பியுள்ளது.

அதிகப்படியான வெப்பம் நிலவும் இந்தக் கோடை காலத்தில், பட்டாசு ஆலைகளில் மருந்துகளின் வேதிவினை மாற்றங்கள் காரணமாக விபத்துக்கள் நிகழ வாய்ப்பு அதிகம் என்பதால், கூடுதல் எச்சரிக்கையுடன் செயல்பட வேண்டியது அவசியமாகும். அடுத்தடுத்து நிகழும் இத்தகைய விபத்துக்கள் ஏழைத் தொழிலாளர்களின் வாழ்வாதாரத்தைப் பறிப்பதோடு, அவர்களின் குடும்பங்களை நடுத்தெருவில் நிறுத்துகின்றன. தமிழக அரசு மற்றும் மாவட்ட நிர்வாகம் பட்டாசு ஆலைகளின் பாதுகாப்புத் தணிக்கையை (Safety Audit) போர்க்கால அடிப்படையில் மேற்கொண்டு, விதிமீறல்களில் ஈடுபடும் ஆலைகள் மீது கடும் நடவடிக்கை எடுக்க வேண்டும் என்பதே சமூக ஆர்வலர்களின் கோரிக்கையாக உள்ளது.