நடைபெற்று வரும் தமிழ்நாடு சட்டப்பேரவையின் நடப்புக் கூட்டத்தொடர் நாளையுடன் (செப்டம்பர் 8) நிறைவடையும் நிலையில், இன்றைய அவை நடவடிக்கைகளின் போது காவல்துறை மானியக் கோரிக்கை மீதான விவாதத்திற்கு முதலமைச்சர் ஜோசப் விஜய் பதிலுரையாற்றினார். அப்போது திமுக மீது கடுமையான விமர்சனங்களை முன்வைத்த முதலமைச்சர், அமலாக்கத்துறை வழக்குகள், மிசா மற்றும் சர்க்காரியா ஆணையம் உள்ளிட்ட பல்வேறு விவகாரங்களைக் குறிப்பிட்டுப் பேசினார்.

முதலமைச்சரின் இந்தப் பேச்சுக்கு திமுக சட்டமன்ற உறுப்பினர்கள் அவைக்குள்ளேயே கடும் எதிர்ப்பு தெரிவித்தனர். முதலமைச்சர் உரையாற்றிக் கொண்டிருக்கும்போதே எழுந்து முழக்கங்களை எழுப்பிய திமுகவினர், பேரவையின் மையப் பகுதிக்குச் சென்று தர்ணா போராட்டத்தில் ஈடுபட்டனர். தொடர்ந்து, முதலமைச்சரின் குற்றச்சாட்டுகளுக்குப் பதிலளிக்கச் சபாநாயகர் வாய்ப்பு வழங்கவில்லை எனக் குற்றம்சாட்டி திமுக உறுப்பினர்கள் அவையிலிருந்து வெளிநடப்பு செய்தனர்.

பேரவைக்கு வெளியே செய்தியாளர்களைச் சந்தித்த எதிர்க்கட்சித் தலைவர் உதயநிதி ஸ்டாலின், "தமிழகத்தில் தவெக அரசின் 100 நாள் ஆட்சியில் சட்டம் - ஒழுங்கு முற்றிலும் சீரழிந்துள்ளதை ஆதாரங்களுடன் சுட்டிக்காட்டினோம். அதற்குப் பதிலளிக்க முடியாமல் முதலமைச்சர் விஜய் எந்தவித ஆதாரமும் இல்லாத பொய்க் குற்றச்சாட்டுகளை எங்கள் மீது சுமத்துகிறார். அவை அனைத்தும் விசாரணையில் உள்ள வெறும் வழக்குகளே. முதலமைச்சர் விஜய் மற்றும் பொதுப்பணித்துறை அமைச்சர் ஆதவ் அர்ஜுனா ஆகியோர் மீதும் வழக்குகள் நிலுவையில் உள்ளன" எனச் சாடினார்.

இதனிடையே, சட்டப்பேரவை நிகழ்வுகளுக்குப் பிறகு எதிர்க்கட்சித் தலைவர் உதயநிதி ஸ்டாலின் தனது இன்ஸ்டாகிராம் பக்கத்தில் பகிர்ந்துள்ள 'ஸ்டோரி' (Story) சமூக வலைதளங்களில் வைரலாகி வருகிறது. அதில் முதலமைச்சர் விஜய் நடிப்பில் வெளியான 'சுறா' திரைப்படத்தின் காட்சி ஒன்றைப் பகிர்ந்து, முதலமைச்சரின் சட்டமன்ற உரையை அவர் மறைமுகமாகப் பரிசேலித்து விமர்சித்துள்ளது இணையவாசிகளிடையேயும் அரசியல் வட்டாரத்திலும் பெரும் விவாதத்தைக் கிளப்பியுள்ளது.