தமிழகத்தில் வீசும் பலமான காற்று மின் உற்பத்திக்கு கைகொடுத்துள்ளது. காற்றாலை மின் நிலையங்களில் தொடர்ந்து சாதகமான உற்பத்தி நிலவியதால், நடப்பு ஆண்டின் ஏப்ரல் முதல் ஆகஸ்டு வரையிலான 5 மாதங்களில் மட்டும் 1,044.67 கோடி யூனிட் மின்சாரம் உற்பத்தி செய்யப்பட்டுள்ளதாக தெரிவிக்கப்பட்டுள்ளது.காற்றாலை மின் உற்பத்தியில் நாட்டிலேயே முன்னணி மாநிலங்களில் ஒன்றாக தமிழகம் திகழ்கிறது. குஜராத்துக்கு அடுத்தபடியாக அதிக அளவிலான காற்றாலை மின் கட்டமைப்பை தமிழகம் கொண்டுள்ளது.

மாநிலத்தில் தனியார் நிறுவனங்களால் நிறுவப்பட்டுள்ள காற்றாலை மின் நிலையங்களின் மொத்த உற்பத்தித் திறன் தற்போது 9,527 மெகாவாட்டாக உள்ளது.தமிழகத்தில் பொதுவாக மே மாதம் முதல் செப்டம்பர் மாதம் வரையிலான காலம் காற்றாலை மின் உற்பத்திக்கான முக்கிய பருவமாக உள்ளது. இந்த காலகட்டத்தில் காற்றின் வேகம் அதிகரிப்பதால், காற்றாலைகளின் சுழற்சி வேகமும் அதிகரித்து மின் உற்பத்தி கணிசமாக உயர்கிறது.

இந்த ஆண்டு வழக்கமான பருவகாலம் தொடங்குவதற்கு முன்பாகவே, ஏப்ரல் மாதத்தில் இருந்து காற்றாலைகளில் நல்ல அளவில் மின் உற்பத்தி தொடங்கியுள்ளது. காற்றின் வேகம் சாதகமாக இருந்ததால், தினசரி சராசரியாக சுமார் 8 கோடி யூனிட் மின்சாரம் கிடைத்ததாக தெரிவிக்கப்பட்டுள்ளது.நடப்பு ஆண்டில் ஏப்ரல் 1-ந் தேதி முதல் ஆகஸ்டு 31-ந் தேதி வரையிலான காலத்தில் தமிழக காற்றாலை மின் நிலையங்கள் மூலம் 1,044.67 கோடி யூனிட் மின்சாரம் கிடைத்துள்ளது.கடந்த ஆண்டு இதே காலகட்டத்தில் 1,011.20 கோடி யூனிட் மின்சாரம் மட்டுமே கிடைத்திருந்தது.

இதனுடன் ஒப்பிடும்போது, இந்த ஆண்டு கூடுதலாக சுமார் 33 கோடி யூனிட் மின்சாரம் கிடைத்துள்ளது.காற்றின் வேகம் கடந்த ஆண்டை விட சாதகமாக அமைந்ததன் காரணமாகவே இந்த கூடுதல் மின் உற்பத்தி கிடைத்துள்ளதாக தெரிவிக்கப்பட்டுள்ளது.

காற்றாலை மின் உற்பத்திக்கான பருவம் இன்னும் தொடரும் நிலையில், வரும் நாட்களில் காற்றின் வேகம் மேலும் அதிகரித்தால் மின் உற்பத்தி அளவும் கணிசமாக உயரக்கூடும் என தகவல்கள் வெளியாகியுள்ளன.காற்றாலை மின் உற்பத்தியில் ஏற்படும் இந்த உயர்வு, தமிழகத்தின் மின்தேவையை பூர்த்தி செய்வதில் புதுப்பிக்கத்தக்க எரிசக்தியின் பங்களிப்பை மேலும் அதிகரிக்கக்கூடிய வாய்ப்பை உருவாக்கியுள்ளது.

காற்றாலை மூலம் கிடைக்கும் மின்சாரம், எரிபொருள் சார்ந்த மின் உற்பத்திக்கு மாற்றாக பயன்படும் முக்கியமான புதுப்பிக்கத்தக்க எரிசக்தி ஆதாரமாக உள்ளது. காற்றின் வேகம் அதிகரிக்கும் காலங்களில் அதிக அளவில் மின்சாரம் கிடைப்பதால், தமிழகத்தின் மொத்த மின் உற்பத்தியில் காற்றாலைகளின் பங்களிப்பு முக்கியத்துவம் பெறுகிறது.

இந்த ஆண்டு ஏற்கனவே கடந்த ஆண்டை விட கூடுதலாக 33 கோடி யூனிட் மின்சாரம் கிடைத்துள்ள நிலையில், காற்றின் வேகம் தொடர்ந்து சாதகமாக இருந்தால் நடப்பு பருவத்தில் காற்றாலை மின் உற்பத்தி மேலும் உயரக்கூடும் என எதிர்பார்க்கப்படுகிறது.