சேலம் அருகே நண்பருடன் மோட்டார் சைக்கிளில் வெளியே சென்ற 10-ம் வகுப்பு மாணவன், சாலையோரம் உள்ள பகுதியில் கழுத்தை நெரித்துக் கொலை செய்யப்பட்ட நிலையில் பிணமாக மீட்கப்பட்டார். அவருடன் சென்றதாகக் கூறப்படும் நண்பரான விசைத்தறி தொழிலாளியும் சிறிது நேரத்தில் தூக்கில் பிணமாக கண்டெடுக்கப்பட்டார்.

இரு சம்பவங்கள் தொடர்பாகவும் காவலர்கள் தீவிர விசாரணை மேற்கொண்டு வருகின்றனர்.சேலம் மாவட்டம் இளம்பிள்ளை அருகே கோட்டைமேடு பகுதியைச் சேர்ந்தவர் நாகராஜ். இவருடைய மனைவி விஜயலட்சுமி. இருவரும் கூலித்தொழிலாளர்கள். இவர்களுடைய மகன் தவுசிக் (15). இவர் கே.ஆர்.தோப்பூர் அரசு பள்ளியில் 10-ம் வகுப்பு படித்து வந்தார்.

இவருக்கும், இடங்கணசாலை அருகே சிட்டனூரைச் சேர்ந்த வடிவேலின் மகனான சிவராஜ் (24) என்பவருக்கும் நட்பு இருந்து வந்ததாகத் தெரிவிக்கப்படுகிறது. சிவராஜ் விசைத்தறி தொழிலாளியாக வேலை செய்து வந்தார்.இந்த நிலையில், நேற்று முன்தினம் மாலை பள்ளி முடிந்து வீட்டில் இருந்த தவுசிக்கை, சிவராஜ் மோட்டார் சைக்கிளில் அழைத்துக்கொண்டு வெளியே சென்றுள்ளார். ஆனால், இரவு வெகுநேரமாகியும் இருவரும் வீடு திரும்பவில்லை.

இதனால் பதற்றமடைந்த இருவரது பெற்றோரும் பல்வேறு இடங்களில் தேடியுள்ளனர். நீண்ட நேரமாகியும் இருவரையும் கண்டுபிடிக்க முடியாததால், மகுடஞ்சாவடி காவல் நிலையத்தில் புகார் அளிக்கப்பட்டது.இந்த நிலையில், கே.ஆர்.தோப்பூர் சாலையில் உள்ள மேட்டுக்காடு பகுதியில், இரும்பாலை நிர்வாகத்துக்கு சொந்தமான இடத்தில் தவுசிக் கழுத்தை நெரித்துக் கொலை செய்யப்பட்ட நிலையில் பிணமாக கிடந்தது தெரியவந்தது.

இதுகுறித்து தகவல் அறிந்த அவரது பெற்றோர் சம்பவ இடத்திற்கு விரைந்து சென்று மகனின் உடலைப் பார்த்து கதறி அழுதனர். அப்போது, தவுசிக்கை சிவராஜ்தான் கொலை செய்திருக்க வேண்டும் என்று அவர்கள் தெரிவித்தனர்.இதையடுத்து காவலர்கள் சிவராஜை தேடும் பணியில் ஈடுபட்டனர். அப்போது தாரமங்கலம் அருகே பெரியபட்டி சுடுகாடு பகுதியில் உள்ள மரத்தில் சிவராஜ் தூக்கில் பிணமாக தொங்கிய நிலையில் கண்டெடுக்கப்பட்டார்.இதுதொடர்பாக மகுடஞ்சாவடி காவலர்கள் மாணவன் தவுசிக் கொலை செய்யப்பட்ட சம்பவம் குறித்து வழக்குப்பதிவு செய்து விசாரணை நடத்தி வருகின்றனர்.

அதேபோல், சிவராஜ் உயிரிழந்தது தொடர்பாக தாரமங்கலம் காவலர்கள் தற்கொலை வழக்குப்பதிவு செய்து விசாரணை மேற்கொண்டுள்ளனர்.இருவரும் நண்பர்களாக பழகி வந்த நிலையில், கடந்த சில நாட்களுக்கு முன்பு அவர்களுக்குள் தகராறு ஏற்பட்டதாக காவலர்களின் முதல்கட்ட விசாரணையில் தெரியவந்துள்ளதாகத் தெரிவிக்கப்படுகிறது. இதனால் இருவரும் சில நாட்களாக பேசாமல் இருந்ததாகவும் கூறப்படுகிறது.

நேற்று முன்தினம் தவுசிக்கை மோட்டார் சைக்கிளில் அழைத்துச் சென்றபோது, மீண்டும் இருவருக்கும் இடையே தகராறு ஏற்பட்டிருக்கலாம் என்றும், அப்போது ஆத்திரமடைந்த சிவராஜ் தவுசிக்கின் கழுத்தை நெரித்து கொலை செய்திருக்கலாம் என்றும் காவலர்கள் சந்தேகிக்கின்றனர்.

அதன்பின்னர், மாணவனை கொலை செய்துவிட்ட அச்சத்தில் சிவராஜ் தற்கொலை செய்துகொண்டிருக்கலாம் என்ற கோணத்திலும் விசாரணை நடைபெற்று வருகிறது.மேலும், இருவரும் செல்போனில் பல்வேறு இணையவழி விளையாட்டுகளில் அடிக்கடி ஈடுபட்டு வந்ததாகவும் விசாரணையில் தெரியவந்துள்ளதாகத் தெரிவிக்கப்படுகிறது.

இந்த சம்பவம் குடிபோதையில் நடந்ததா, இருவருக்கும் இடையிலான தனிப்பட்ட பிரச்சினை காரணமாக நடைபெற்றதா என்பது உள்ளிட்ட பல்வேறு கோணங்களிலும் காவலர்கள் விசாரணையை தீவிரப்படுத்தியுள்ளனர்.

உயிரிழந்த இருவரின் உடல்களும் உடற்கூராய்வுக்காக மருத்துவமனைக்கு அனுப்பி வைக்கப்பட்டுள்ளன. உடற்கூராய்வு முடிவுகள் மற்றும் தொடர்ந்து நடைபெறும் விசாரணையின் அடிப்படையில், சம்பவத்தின் முழுமையான பின்னணி தெரியவரும் என எதிர்பார்க்கப்படுகிறது.