திருமண ஏற்பாடுகள் அனைத்தும் நிறைவடைந்து, மறுநாள் மணக்கோலத்தில் நிற்க இருந்த கல்லூரி மாணவி திடீரென உயிரிழந்த சம்பவம் திருப்பத்தூர் மாவட்டத்தில் பெரும் சோகத்தை ஏற்படுத்தியுள்ளது. காதலித்து வந்த வாலிபர் மிரட்டியதால் மாணவி மனமுடைந்து இந்த விபரீத முடிவை எடுத்ததாக தெரிவிக்கப்படுகிறது.திருப்பத்தூர் மாவட்டம் வாணியம்பாடி அருகே உள்ள கொத்தக்கோட்டை கோடியூர் பகுதியைச் சேர்ந்தவர்கள் விநாயகம்–அலமேலு தம்பதி.

இவர்களது மகள் ஸ்ரீதர்ஷினி (20). இவர் கிருஷ்ணகிரி மாவட்டம் பர்கூரில் உள்ள அரசு கலை மற்றும் அறிவியல் கல்லூரியில் இரண்டாம் ஆண்டு கணினி அறிவியல் படித்து வந்தார்.ஸ்ரீதர்ஷினிக்கு அவரது பெற்றோர் திருமண ஏற்பாடுகளை செய்திருந்தனர். திருமணமும் பேசி முடிக்கப்பட்டு, நாளை (ஞாயிற்றுக்கிழமை) திருப்பத்தூர் அருகே பேராம்பட்டு மங்குண்டு பெருமாள் கோவிலில் திருமணம் நடைபெற இருந்தது.

இதையொட்டி இரு குடும்பத்தினரும் திருமண ஏற்பாடுகளில் தீவிரமாக ஈடுபட்டிருந்தனர்.இந்த நிலையில், ஸ்ரீதர்ஷினியை வாலிபர் ஒருவர் காதலித்து வந்ததாக தெரிவிக்கப்படுகிறது. மாணவிக்கு திருமணம் நிச்சயிக்கப்பட்ட தகவல் அந்த வாலிபருக்கு தெரியவந்ததைத் தொடர்ந்து, அவர் செல்போன் மூலம் மாணவியை தொடர்பு கொண்டு திருமணம் தொடர்பாக மிரட்டியதாக கூறப்படுகிறது.

இதனால் ஸ்ரீதர்ஷினி கடும் மன உளைச்சலுக்கு ஆளானதாக தெரிவிக்கப்படுகிறது. திருமண வீட்டில் மகிழ்ச்சியான ஏற்பாடுகள் நடைபெற்று வந்த நிலையில், இந்த சம்பவம் குடும்பத்தினருக்கு தெரியாமல் பெரும் சோகத்தை ஏற்படுத்தியுள்ளது.இந்நிலையில், நேற்று முன்தினம் இரவு குடும்பத்தினர் அனைவரும் வழக்கம்போல் தூங்கச் சென்றுள்ளனர்.

மறுநாள் காலையில் ஸ்ரீதர்ஷினி உயிரிழந்த நிலையில் இருந்ததை பார்த்து பெற்றோர் அதிர்ச்சியடைந்தனர். அருகில் சென்று பார்த்தபோது, அவர் விஷம் அருந்தியிருந்தது தெரியவந்ததாக தெரிவிக்கப்படுகிறது.இதுகுறித்து அதிர்ச்சியடைந்த பெற்றோர் வாணியம்பாடி தாலுகா காவலர்களுக்கு தகவல் தெரிவித்தனர்.

தகவலின் பேரில் சம்பவ இடத்திற்கு விரைந்து சென்ற காவலர்கள், மாணவியின் உடலை மீட்டு பிரேத பரிசோதனைக்காக வாணியம்பாடி அரசு மருத்துவமனைக்கு அனுப்பி வைத்தனர்.மேலும், இதுதொடர்பாக வழக்குப்பதிவு செய்து விசாரணையை தொடங்கிய காவலர்கள், ஸ்ரீதர்ஷினியின் செல்போனை கைப்பற்றி ஆய்வு செய்தனர்.

அப்போது, மாணவியை காதலித்து வந்ததாக தெரிவிக்கப்படும் வாலிபர் அவரை செல்போன் மூலம் மிரட்டியதாக கூறப்படும் தகவல்கள் கிடைத்ததாக காவலர்கள் தெரிவித்தனர்.இந்த நிலையில், மாணவியை மிரட்டியதாக கூறப்படும் உரையாடல் தொடர்பான ஒலிப்பதிவு சமூக வலைதளங்களில் பரவி வருவதாக தெரிவிக்கப்படுகிறது. இதுகுறித்தும் காவலர்கள் தொடர்ந்து விசாரணை நடத்தி வருகின்றனர்.