தமிழகத்தில் தெருக்கள், குடியிருப்புகள், நீர் நிலைகளில் உள்ள சாதிப் பெயர்களை நீக்கும் நடவடிக்கை சரியானது தான் என்றும், பெயர் மாற்றம் செய்யப்பட வேண்டிய சாதிப் பெயர்களைக் கண்டறிந்து, விடுபட்ட பகுதிகளின் பெயர்களில் மாற்றத்தைக் கொண்டுவரும் வகையில் மேலும் ஓர் அரசாணையை வெளியிடுமாறு மதுரை உயர் நீதிமன்றம் தமிழக அரசை கேட்டுக்கொண்டுள்ளது. 

மதுரையை சேர்ந்த பரமசிவம் என்பவர்,  உயர் நீதிமன்ற மதுரை அமர்வில் தாக்கல் செய்த மனு: 

''தமிழகத்தில் உள்ள குடியிருப்புகள், தெருக்கள், சாலைகள், நீர் நிலைகளுக்கு வைக்கப்பட்டுள்ள சாதிப் பெயர்களை நீக்குவதற்கான வழிகாட்டு நெறிமுறைகள் உருவாக்கி தமிழக அரசு உத்தரவிட்டுள்ளது.

இந்த உத்தரவுபடி கிராமங்கள், குடியிருப்புகள், தெருக்கள், சாலைகள், நீர் நிலைகளுக்கு உள்ள சாதிப் பெயர்களை நீக்க அரசாணை வெளியிடப்பட்டுள்ளது. சாலைகள் தெருக்கள் பெயர்களை மாற்றுவது நடைமுறையில் பல பிரச்சினைகள் உள்ளது. எனவே, அரசாணைக்கு தடை விதிக்க வேண்டும்.'' என்று கூறப்பட்டிருந்தது.

ஏற்கனவே குறித்த மனு விசாரணைக்கு வந்தது. அப்போது தமிழக அரசின் அரசாணையை செயல்படுத்த இடைக்கால தடை விதிக்கப்பட்டது. இந்நிலையில் குறித்த மனு மீண்டும் நீதிபதிகள் சி.வி.கார்த்திகேயன், ஆர்.சக்திவேல் அமர்வில் விசாரணைக்கு வந்தது.

வழக்கை விசாரித்த பின்னர் நீதிபதிகள் பிறப்பித்த உத்தரவில் குறிப்பிடப்பட்டுள்ளதாவது;

''தமிழகத்தில் உள்ள சாலைகள், தெருக்கள், குடியிருப்பு பகுதிகள், நீர்நிலைகளில் உள்ள சாதிப் பெயர்களை நீக்க கடந்த 2025-ஆம் ஆண்டு தமிழக அரசு உத்தரவிட்டதில் தவறில்லை. ​செங்கல்பட்டில் உள்ள ஹரிஜன் காலனி திருவள்ளுவர் காலனி என பெயர் மாற்றம் செய்யப்பட்டுள்ளது.

திருவள்ளுவர் ஒரு புகழ்பெற்ற மனிதர் என்பதை நாம் ஒருபோதும் மறுக்க முடியாது. அவருடைய பெயரைச் சேர்ப்பது அந்த குறிப்பிட்ட காலனியில் உள்ள தனிநபர்களின் பெருமையை மட்டுமே அதிகரிக்கும். அவரை எந்த ஓர் அரசியல் கட்சியுடனோ அல்லது இயக்கத்துடனோ நாம் தொடர்புபடுத்த முடியாது.

​இதேபோல், இருளர் காலனி, கபிலர் தெரு என மாற்றப்பட்டுள்ளது. கபிலர் என்பது ஒரு புகழ்பெற்ற மனிதரின் பெயர். ​தலைவையாளன் காலனி, ரோஜா நகர் என பெயர் மாற்றம் செய்யப்பட்டுள்ளது. இது ஒரு மலரின் பெயரைக் குறிக்கிறது.

அருந்ததியர் தெருவானது காமராஜர் நகர் என்றும், நரிக்குறவர் காலனியானது பேரறிஞர் அண்ணா தெரு என்றும் பெயர் மாற்றம் செய்யப்பட்டுள்ளது. இவர்கள் இருவரும் இந்த மாநிலத்தின் முன்னாள் முதல்வர்கள். இவர்களது பெயர்களை மாற்றுப் பெயர்களாக வைப்பதில் எந்தவிதமான பிரச்சினையும் இருக்க முடியாது. ​

வேலூரில் உள்ள ஆதிதிராவிடர் காலனி கம்பர் தெரு என்றும், திருநெல்வேலியில் உள்ள ஸ்ரீபார் காலனி பாரதிதாசன் தெரு என்றும் பெயர் மாற்றம் செய்யப்பட்டுள்ளது. இவை அனைத்தும் கவிஞர்களின் பெயர்களே தவிர, தனிநபர்களின் பெயர்கள் அல்ல. ​

காஞ்சிபுரத்தில் உள்ள அருந்ததியர் குடியிருப்பு அவ்வையார் குடியிருப்பு என பெயர் மாற்றம் செய்யப்பட்டுள்ளது. மீண்டும் கூறப்பட்ட பெயரின் மீது எந்தவித சர்ச்சை அல்லது தகராறும் எழுப்ப முடியாது.

பல இடங்களில் கக்கன் பெயர் சூட்டப்பட்டுள்ளது. மறைந்த அமைச்சர் கக்கன் நேர்மை, எளிமை மற்றும் பொது வாழ்வில் ஒழுக்கக் கொள்கைகளை உயர்த்தியதற்காக மிகவும் மதிக்கப்படுபவர் என்பது அனைவரும் அறிந்ததே. ​

எனவே, கொடுக்கப்பட்டுள்ள மாற்றுப் பெயர்கள் அனைத்தும், இந்த மாநிலத்தில் உள்ள பொதுமக்களால் மதிக்கப்படும் மற்றும் கரவிக்கப்படும் நபர்களின் நடுநிலையான பெயர்கள் என்பது தெரிகிறது.

செங்கல்பட்டில் உள்ள வண்ணார் ஏரி, கொன்றை ஏரி என பெயர் மாற்றம் செய்யப்பட்டுள்ளது. தற்போதுள்ள பெயர்களை வெளிப்படையாகப் பேசக் கூட முடியாது. அவை மிகவும் பிறரை அவமதிக்கும் வகையில் உள்ளன. மேலும், அவை பெயர் மாற்றம் செய்யப்பட்டுள்ளது மிகவும் பொருத்தமானது. மேலும், இந்த நடவடிக்கை பல ஆண்டுகளுக்கு முன்பே எடுக்கப்பட்டிருக்க வேண்டும்.

இந்த மாற்றங்களை அறிமுகப்படுத்த அரசு இத்தனை ஆண்டுகள் காத்திருந்திருக்கக் கூடாது. பெயர் மாற்றம் செய்யப்பட வேண்டிய சாதிப் பெயர்களைக் கண்டறிந்து, விடுபட்ட பகுதிகளின் பெயர்களில் மாற்றத்தைக் கொண்டுவரும் வகையில் மேலும் ஓர் அரசாணையை வெளியிடுமாறு அரசை நாங்கள் கேட்டுக்கொள்கிறோம்.

இது ஒரு தொடர்ச்சியான செயல்முறை, மேலும் இது அரசால் தொடரப்பட வேண்டும். ​ சாதிப் பெயர்களை நீக்குவதால் குழப்பம் ஏற்படும் என்று கூறப்பட்டுள்ளது. மனதளவில் சாதிப் பெயர்களைத் தக்க வைத்துக் கொண்டிருப்பவர்களின் மனதில் குழப்பம் இருக்கும்.

ஆனால் மனதிலிருந்து சாதியை நீக்கியவர்களின் மனதில் எந்தக் குழப்பமும் இருக்காது. இந்த நடவடிக்கையில் காலப்போக்கில் எந்த சிரமமும் இருக்காது. ​இந்த அரசாணை சமூக நீதி மாற்றத்துக்கு மிகவும் பொருத்தமானது. எனவே, அரசாணைக்கு விதிக்கப்பட்ட தடை ரத்து செய்யப்பட்டு, மனு தள்ளுபடி செய்யப்படுகிறது.'' என்று நீதிபதிகள் உத்தரவிட்டுள்ளனர்.