1949-ம் ஆண்டு திருவாரூர் மாவட்டம் மன்னார்குடியில் பிறந்த நடிகர் ராஜேஷ், தமிழ் சினிமாவிலும் தொலைக்காட்சிகளிலும் பல்வேறு விதமான கதாபாத்திரங்களில் திகழ்ந்தவர். பள்ளி ஆசிரியராக தனது வாழ்க்கையை தொடங்கிய இவர், 1974-ல் வெளியான ‘அவள் ஒரு தொடர்கதை’ திரைப்படத்தில் சிறிய கதாபாத்திரம் மூலம் திரையுலகிற்குள் நுழைந்தார்.

1979-ல் வெளியான ‘கன்னிப்பருவத்திலே’ திரைப்படத்தில் கதாநாயகனாக நடித்தது அவரது திரையுலக பயணத்தில் முக்கிய முன்னேற்றமாக அமைந்தது. அதன் பின்னர் தொடர்ந்து பல திரைப்படங்களில் ஹீரோவாகவும், பின்னர் குணச்சித்திர வேடங்களிலும் பிசியாக நடித்தார்.

கமல்ஹாசனுடன் இணைந்து ‘சத்யா’, ‘மகாநதி’, ‘விருமாண்டி’ போன்ற புகழ்பெற்ற திரைப்படங்களில் திறமையாக நடித்துள்ளார். தனது கதாபாத்திரங்களை உணர்வோடு கொண்டு சென்ற அவரது நடிப்பு, ரசிகர்களிடையே தனி இடத்தை பெற்றது.

பிறப்பால் கிறிஸ்தவராக இருந்தாலும், பெரியார் சித்தாந்தங்களில் தீவிர நம்பிக்கை கொண்டிருந்தார். சோதிடம் தொடர்பான புத்தகங்கள், கட்டுரைகள் எழுதியுள்ளார். மேலும் ஆங்கில நடிகர்களின் வாழ்க்கை வரலாறுகளை தமிழில் எழுதுவதிலும் ஈடுபாடு காட்டினார்.

1987 முதல் 1991 வரை அரசியலிலும் தீவிரமாக ஈடுபட்டு, எம்.ஜி.ஆர் மனைவி ஜானகியை ஆதரித்து செயல்பட்டார். வெள்ளித்திரையைக் கடந்தும், சின்னத்திரையிலும் திகழ்ந்தவர். குறிப்பாக ஜீ தமிழ் தொலைக்காட்சியில் ஒளிபரப்பாகும் ‘கார்த்திகை தீபம்’ தொடரில் முக்கிய கதாபாத்திரத்தில் நடித்து வந்தார்.

40 ஆண்டுகளுக்கும் மேல் திரையுலகில் பயணித்த நடிகர் ராஜேஷ், இன்று (மே 29) உடல் நலக்குறைவால் காலமானார். மூச்சுத் திணறல் காரணமாக உயிரிழந்ததாக தகவல்கள் தெரிவிக்கின்றன.

இவரது மறைவு திரையுலகையும், ரசிகர்களையும் பெரும் சோகத்தில் ஆழ்த்தியுள்ளது. தனிப்பட்ட பாணியுடன் பல்வேறு வேடங்களை செய்தவர் ராஜேஷ், தமிழ்சினிமா வரலாற்றில் நீங்கா பெயராக இருந்து வருவார்.