1200 கன அடியாக குறைந்த தர்மபுரி ஒகேனக்கல் நீர்வரத்து...!

தமிழ்நாடு மற்றும் கர்நாடகா காவிரி கரையோரங்களில் பெய்த மழையின் காரணமாக, தர்மபுரி ஒகேனக்கல்லுக்கு நீர் வரத்து அதிகரிப்பதும் குறைவதுமாக இருந்து வருகிறது.மேலும் கர்நாடகா காவிரி நீர்ப்பிடிப்பு பகுதிகளிலும், தமிழ்நாடு எல்லையோர காவிரி ஆற்று பகுதிகளிலும் பெய்த மழையின் அளவு குறைந்தது.

இதன் காரணமாக, பிலிகுண்டுலுவில் நீர்வரத்து நாளுக்கு நாள் குறைந்து கொண்டே வருகிறது.இந்நிலையில், நேற்று ஒகேனக்கல்லுக்கு 1500 கனஅடியாக இருந்த நீர்வரத்து, இன்று காலை 8 மணி நிலவரப்படி நீர்வரத்து 1200 கன அடியாக குறைந்துள்ளது.

இதனால் ஐந்தருவி, மெயின் அருவி, சினிபால்ஸ் உள்ளிட்ட அருவிகளில் தண்ணீரின் வேகம் குறைந்தது.இதில் நேற்று விடுமுறை நாள் என்பதால், சுற்றுலா பயணிகள் அதிகளவில் குவிந்தனர்.

மேலும், பயணிகள் குடும்பத்துடன் பரிசல் பயணம் மேற்கொண்டும், காவிரி ஆற்றின் அழகையும் ரசித்தனர்.

அதுமட்டுமின்றி, தொங்கு பாலத்தில் நின்று காவிரி ஆற்றில் பாறைகளுக்கு நடுவே விழும் தண்ணீரை ஆர்வமுடன் ரசித்து மகிழ்ந்தனர். அதன் பின்னர் அருவியில் குளித்து மகிழ்ந்தனர்.