காஞ்சிபுரத்தை சேர்ந்த 16 வயது பள்ளி மாணவி, விடுமுறை காரணமாக திருவண்ணாமலை மாவட்டம் பிரம்மதேசம் அருகிலுள்ள கல்பட்டு கிராமத்தில் தனது பாட்டி வீட்டில் தங்கியிருந்தார். அமைதியாக இருந்த அந்த கிராம சூழல், ஒரு இரவில் அதிர்ச்சிகரமான கொடூரச் சம்பவத்தால் சிதறிப்போனது.

இந்தச் சம்பவம் நடைபெற்ற இரவில், தனியாக இருந்த மாணவியை குறிவைத்த அதே பகுதியை சேர்ந்த சில இளைஞர்கள் முதலில் பேச்சில் ஈர்த்துள்ளனர். பின்னர் மிரட்டல் மூலம் அவரை கட்டுப்பாட்டுக்குள் கொண்டு வந்து அருகிலிருந்த தோட்டப்பகுதிக்கு பலவந்தமாக அழைத்துச் சென்றுள்ளனர்.

அங்கு, மனிதநேயத்தையே கேள்விக்குள்ளாக்கும் வகையில், 8 பேர் கொண்ட கும்பல் மாணவியை மீதான கொடூரத் தாக்குதலில் ஈடுபட்டு, பின்னர் சுவடு தெரியாமல் தப்பியோடியுள்ளனர்.மன உளைச்சலும் உடல் வேதனையும் தாங்க முடியாமல் வீட்டிற்கு திரும்பிய மாணவி, தன்னிடம் நிகழ்ந்த துயரத்தை உறவினர்களிடம் வெளிப்படுத்தியதும் குடும்பத்தினர் அதிர்ச்சியில் உறைந்தனர்.

உடனடியாக அருகிலுள்ள மருத்துவமனைக்கு அழைத்துச் செல்லப்பட்ட அவர், உடல்நிலை கவலைக்கிடமாக இருந்ததால் மேல்சிகிச்சைக்காக காஞ்சிபுரம் அரசு மருத்துவமனைக்கு மாற்றப்பட்டார். தற்போது அவருக்கு தீவிர சிகிச்சை அளிக்கப்பட்டு வருகிறது.இந்த சம்பவம் குறித்து தகவல் கிடைத்ததும், மாவட்ட அளவிலான காவலர்கள் உடனடியாக சம்பவ இடத்திற்குச் சென்று விரிவான விசாரணையில் ஈடுபட்டுள்ளனர்.

குற்றச்செயலில் ஈடுபட்டவர்களை அடையாளம் காணும் முயற்சிகள் தீவிரப்படுத்தப்பட்டு, அந்த பகுதியில் பாதுகாப்பு பலப்படுத்தப்பட்டுள்ளது. மேலும், சிகிச்சை பெற்று வரும் மாணவியிடம் நேரடியாக தகவல்கள் சேகரித்து, குற்றவாளிகள் குறித்து முக்கியமான விபரங்கள் அறியப்பட்டுள்ளதாக தெரிவிக்கப்படுகிறது.

மேலும், கல்பட்டு கிராமத்தில் இந்த சம்பவம் பெரும் அதிர்ச்சியையும் பதற்றத்தையும் ஏற்படுத்தியுள்ள நிலையில், சந்தேகத்தின் பேரில் சிலரை காவலர்கள் கைப்பற்றி தீவிர விசாரணை நடத்தி வருகின்றனர். பாட்டி வீட்டிற்கு வந்த சிறுமியை குறிவைத்து நடைபெற்ற இந்த மனிதத்தன்மையற்ற செயல், சமூகத்தின் மனச்சாட்சியை உலுக்கும் அளவிற்கு பரபரப்பை கிளப்பியுள்ளது என்று தெரிவிக்கப்படுகிறது.