2008 ஆம் ஆண்டு தொடங்கிய ஐபிஎல் வரலாற்றில் பல ஆண்டுகள் வலுவான அணியாக இருந்தாலும், ராயல் சாலஞ்சர்ஸ் பெங்களூரு (RCB) அணிக்கு கோப்பை வெற்றி கிடைக்கவில்லை. ஆனால் அந்த நீண்ட காத்திருப்பை முறியடித்து, 2025 ஐபிஎல் தொடரில் ரஜத் பட்டிதார் தலைமையிலான ஆர்சிபி அணி முதல் முறையாக சாம்பியன் பட்டத்தை வென்றது. இந்த வெற்றி ஆர்சிபி ரசிகர்களுக்கு மிகப்பெரிய மகிழ்ச்சியை அளித்தது.

இதனைத் தொடர்ந்து, 2026 ஐபிஎல் தொடரில் நடப்பு சாம்பியனாக களம் இறங்கும் ஆர்சிபி, மீண்டும் கோப்பையை கைப்பற்றும் என்ற நம்பிக்கை ரசிகர்களிடமும், முன்னாள் வீரர்களிடமும் அதிகமாக உள்ளது. அனுபவம் மற்றும் இளம் திறமைகள் கலந்து இருக்கும் அணியாக இருப்பதால், இந்த சீசனிலும் ஆர்சிபி மற்ற அணிகளுக்கு கடுமையான சவாலாக இருக்கும் என்று கூறப்படுகிறது.

இந்நிலையில், ஐபிஎல் தொடர் தொடங்குவதற்கு முன்பு ஆர்சிபி குறித்து பேசிய முன்னாள் தென்னாப்பிரிக்க வீரர் ஏ.பி.டி வில்லியர்ஸ், விராட் கோலியைப் பற்றி சுவாரஸ்யமான கருத்துகளை பகிர்ந்துள்ளார்.

அவர் கூறுகையில்,
“தற்போதைய ஆர்சிபி அணியில் உள்ள வீரர்கள் அனைவரும் சிறப்பாக செயல்படுகிறார்கள். கடந்த ஆண்டு பல போட்டிகளில் ஒவ்வொரு வீரரும் முன்வந்து அணியை வெற்றிக்கு அழைத்துச் சென்றனர். அதனால் தான் அந்த அணிக்கு கோப்பை கிடைத்தது. அது ஒரே ஒரு வீரரின் வெற்றியல்ல, அணியின் ஒட்டுமொத்த உழைப்பின் பலன்,” என்றார்.

மேலும், “இனி ஆர்சிபி அணியின் முழு சுமையையும் விராட் கோலி ஒருவரால் மட்டுமே சுமக்க முடியாது என்பது அவருக்கே தெரியும். ஆனால் அதற்காக அவரது முக்கியத்துவம் குறையவில்லை. அவர் அந்த அணியின் இதயம் போன்றவர். மைதானத்திலும் வெளியிலும் அவர் கொண்டுவரும் ஆற்றல் அளவிட முடியாதது. அணியில் உள்ள வீரர்களுக்கு அவர் பெரிய நம்பிக்கையை அளிக்கிறார். அதனால் இன்றும் அவர் ஆர்சிபி அணியின் முதுகெலும்பாகவே இருக்கிறார்,” என்று ஏ.பி.டி வில்லியர்ஸ் தெரிவித்துள்ளார்.

2026 ஐபிஎல் தொடர் தொடங்கவுள்ள நிலையில், நடப்பு சாம்பியனான ஆர்சிபி மீண்டும் கோப்பையை வெல்லுமா? என்ற எதிர்பார்ப்பு ரசிகர்களிடையே அதிகரித்து வருகிறது.