தமிழக வெற்றிக் கழக அரசின் முதல் வேளாண் பட்ஜெட் இன்று சட்டப்பேரவையில் தாக்கல் செய்யப்பட உள்ள நிலையில், விவசாயிகள் மற்றும் நெசவாளர்கள் மத்தியில் பல்வேறு புதிய அறிவிப்புகள் வெளியாகும் என்ற எதிர்பார்ப்பு அதிகரித்துள்ளது.

பொது பட்ஜெட்டைத் தொடர்ந்து, வேளாண்மைத் துறை அமைச்சர் வினோத் இன்று வேளாண் நிதிநிலை அறிக்கையை தாக்கல் செய்கிறார். தேர்தல் வாக்குறுதிகளில் இடம்பெற்ற பல திட்டங்கள் இதில் இடம்பெறுமா என்ற எதிர்பார்ப்பில் விவசாயிகள் காத்திருக்கின்றனர்.

அரசு வட்டாரங்களில் வெளியாகும் தகவல்களின்படி, சொந்தமாக நிலம் இல்லாமல் குத்தகை அடிப்படையில் விவசாயம் செய்து வரும் விவசாயிகளுக்காக 'உழவர் உரிமை அட்டை' வழங்கும் திட்டம் அறிவிக்கப்படலாம் என்று கூறப்படுகிறது. இந்த அட்டையைப் பெறும் தகுதியான பயனாளிகளுக்கு ஆண்டுதோறும் ரூ.10,000 நேரடி வங்கிக் கணக்கில் வழங்கும் திட்டமும் அறிவிக்கப்படலாம் என எதிர்பார்க்கப்படுகிறது.

அதேபோல், சொந்த நிலம் வைத்துள்ள உழவர் குடும்பங்களுக்கு ஆண்டுதோறும் ரூ.15,000 விதைப்புக் கால நிதியுதவி வழங்கும் தேர்தல் வாக்குறுதி குறித்த அறிவிப்பும் வெளியாகலாம் என தகவல்கள் தெரிவிக்கின்றன.

இதனுடன், விவசாயம் சார்ந்த விசைத்தறித் துறையினரின் நீண்டகால கோரிக்கையான 500 யூனிட் இலவச மின்சாரம் வழங்கும் திட்டம் குறித்த அறிவிப்பும் இடம்பெறுமா என்ற எதிர்பார்ப்பு எழுந்துள்ளது. மேலும், சோலார் மின்சார அமைப்புகளுக்கு மானியம் வழங்கும் திட்டமும் பரிசீலனையில் இருப்பதாக கூறப்படுகிறது.

விவசாயிகள் தரப்பில், நெல் கொள்முதல் விலையை குவிண்டாலுக்கு ரூ.3,500 ஆகவும், கரும்புக்கான ஆதார விலையை டன்னுக்கு ரூ.4,500 ஆகவும் உயர்த்த வேண்டும் என்ற கோரிக்கையும் வலியுறுத்தப்பட்டு வருகிறது.

அதேநேரத்தில், நெல் சேமிப்புக்காக நவீன கிடங்குகள் அமைத்தல், கொள்முதல் நிலையங்களில் ஈரப்பதம் என்ற பெயரில் வசூலிக்கப்படும் சட்டவிரோதக் கட்டணங்களை தடுக்க நடவடிக்கை எடுப்பது, தென்னை விவசாயிகளுக்கு நேரடி நிதியுதவி வழங்குவது, காவிரி–வைகை–குண்டாறு இணைப்புத் திட்டத்தை விரைவுபடுத்துவது உள்ளிட்ட கோரிக்கைகளும் இந்த வேளாண் பட்ஜெட்டில் கவனம் பெறும் என எதிர்பார்க்கப்படுகிறது.

எனினும், மேற்கண்ட திட்டங்கள் அனைத்தும் அதிகாரப்பூர்வமாக அறிவிக்கப்படவில்லை. இவை அரசு வட்டாரங்களில் வெளியாகும் தகவல்கள் மற்றும் விவசாய அமைப்புகள் முன்வைத்துள்ள கோரிக்கைகளின் அடிப்படையிலான எதிர்பார்ப்புகளாகும். எந்தெந்த திட்டங்கள் உண்மையில் இடம்பெறும் என்பது இன்று தாக்கல் செய்யப்படும் வேளாண் பட்ஜெட்டின் மூலம் தெளிவாகும்.