தமிழக வெற்றிக் கழகத் தலைவர் விஜய்யை தமிழகத்தின் அடுத்த முதல்வராக பதவியேற்க ஆளுநர் ஆர்.என். அர்லேகர் அழைப்பு விடுத்துள்ளதாக தகவல்கள் வெளியாகியுள்ளன. அதன்படி, அமைச்சரவை பதவியேற்புக்குப் பிறகு சட்டப்பேரவையில் பெரும்பான்மையை நிரூபிக்க வேண்டும் என்ற அரசியலமைப்பு நடைமுறை அடுத்த கட்டமாக இருக்கும்.

2026 சட்டமன்றத் தேர்தலில் 108 தொகுதிகளில் வெற்றி பெற்று தவெக தனிப்பெரும் கட்சியாக உருவெடுத்துள்ளது. ஆனால் தனிப்பெரும்பான்மை இல்லாததால் கூட்டணி ஆதரவுடன் ஆட்சியமைக்கும் நிலை உருவாகியுள்ளது. இதன் காரணமாக, சட்டப்பேரவையில் நம்பிக்கை வாக்கெடுப்பு மிக முக்கியமானதாக மாறியுள்ளது.

பதவியேற்பு விழாவுக்குப் பிறகு முதலில் சட்டப்பேரவையில் சபாநாயகர் மற்றும் துணை சபாநாயகர் தேர்வு நடைபெறும். சபாநாயகர் பதவிக்கு ஒரே வேட்பாளர் இருந்தால் போட்டியின்றி தேர்வு செய்யப்படுவார். ஒன்றுக்கு மேற்பட்ட வேட்பாளர்கள் இருந்தால் வாக்கெடுப்பு நடத்தப்படும்.

சபாநாயகர் தேர்வு முடிந்த பிறகு, அரசு மீது நம்பிக்கை கோரும் தீர்மானம் கொண்டு வரப்படும். பொதுவாக ஆளும் தரப்பைச் சேர்ந்த ஒருவர் அந்த தீர்மானத்தை முன்மொழிவார். அதன் பின்னர் முதல்வர் தனது அரசின் நிலைப்பாடுகள் மற்றும் பெரும்பான்மை ஆதரவை அவையில் விளக்குவார்.

அதன்பின் எதிர்க்கட்சித் தலைவர்கள் மற்றும் உறுப்பினர்கள் தங்களது கருத்துகளை தெரிவிப்பார்கள். விவாதம் முடிந்ததும் நம்பிக்கை தீர்மானம் வாக்கெடுப்புக்கு விடப்படும்.

வாக்கெடுப்பு இரண்டு முறைகளில் நடைபெறலாம். பொதுவாக குரல் வாக்கெடுப்பு நடத்தப்படும். ஆனால் எதிர்க்கட்சிகள் “டிவிஷன்” (Division) முறையில் எண்ணிக்கை அடிப்படையிலான வாக்கெடுப்பு கோரினால், சபாநாயகர் அதற்கு அனுமதி வழங்கலாம்.

அந்த நடைமுறையில் உறுப்பினர்கள் தங்களது இருக்கைகளில் இருந்து ஆதரவு அல்லது எதிர்ப்பு தெரிவித்து எழுந்து நிற்பார்கள். சட்டப்பேரவை செயலாளர் ஒவ்வொரு பிரிவிலும் எண்ணிக்கை பதிவு செய்து சபாநாயகரிடம் சமர்ப்பிப்பார்.

அதன்பிறகு சபாநாயகர் இறுதி எண்ணிக்கையை அறிவித்து தீர்மானம் நிறைவேறியதா இல்லையா என்பதை அறிவிப்பார்.

நம்பிக்கை தீர்மானம் நிறைவேறினால் அரசு தொடர்ந்து செயல்படும். தோல்வியடைந்தால், அரசு பெரும்பான்மையை இழந்ததாக கருதப்பட்டு ஆளுநரிடம் தகவல் அனுப்பப்படும். அதன் பிறகு அடுத்த அரசியல் நடவடிக்கைகள் குறித்து ஆளுநர் முடிவு எடுப்பார்.

குறிப்பாக பெரும்பான்மை மிகச் சிறிய வித்தியாசத்தில் இருக்கும் சூழலில், ஆளும் தரப்பும் கூட்டணி தரப்பும் தங்கள் அனைத்து எம்.எல்.ஏ.க்களும் அவையில் பங்கேற்பதை உறுதி செய்ய வேண்டியது அவசியமாகும். தமிழக அரசியலின் அடுத்த முக்கிய தருணமாக இந்த நம்பிக்கை வாக்கெடுப்பு பார்க்கப்படுகிறது.