இயக்குநர் ஹெச். வினோத் இயக்கத்தில் நடிகர் தளபதி விஜய் நடிப்பில் உருவாகி வரும் படம் ஜன நாயகன். விஜய்யின் சினிமா வாழ்க்கையின் கடைசி படமாக உருவாகும் இந்த படத்தில், பூஜா ஹெக்டே, பாபி தியோல், பிரகாஷ் ராஜ், பிரியாமணி, கெளதம் மேனன், மமிதா பைஜு, டிஜே அருணாச்சலம் உள்ளிட்ட பலர் நடித்துள்ளனர். இசையமைப்பாளராக அனிருத் ரவிச்சந்தர் பணியாற்றுகிறார்.பெரும் பட்ஜெட்டில் கேவிஎன் புரொடக்ஷன்ஸ் நிறுவனம் தயாரித்து வரும் இத்திரைப்படம், 2026 ஜனவரி 9ம் தேதி வெளியாக உள்ளது.

ஜன நாயகன் படத்திற்குப் பிறகு சினிமாவிலிருந்து முழுமையாக விலகுவதாக அறிவித்துள்ளார் விஜய். தனது அரசியல் கட்சியான தமிழக வெற்றிக் கழகம் சார்பில் வருகிற 2026 சட்டமன்றத் தேர்தலில் முதல்வர் வேட்பாளராக களமிறங்கவிருக்கிறார். மதுரை, மேலூர், திருப்பரங்குன்றம், உசிலம்பட்டி, திருமங்கலம் தொகுதிகளில் போட்டியிட உள்ளார்.

இதற்காக முதற்கட்டமாக 100 ஊர்களுக்கு விஜய் அரசியல் சுற்றுப்பயணம் மேற்கொள்ளவுள்ளார். இந்தப் பயணம் தஞ்சாவூரிலிருந்து தொடங்கப்படும் எனக் கூறப்படுகிறது.

விஜய் தனது கேரியரின் உச்சத்தில் இருக்கும் தருணத்தில் சினிமாவை விட்டு விலகுவது, தமிழ்சினிமாவுக்கு மிகப்பெரிய இழப்பாகவே கருதப்படுகிறது. தற்போது பாக்ஸ் ஆபிஸில் 200 கோடி ரூபாய் வசூல் எளிதாகக் கிடைக்கும் ஒரே நடிகர் விஜய்தான் என்பதால், தயாரிப்பாளர்களுக்கு இது பேரதிர்ச்சியாக உள்ளது.

அத்துடன், இந்தியாவில் அதிக சம்பளம் பெறும் நடிகர் என்ற சாதனையைவும் விஜய் படைத்துள்ளார். ஜன நாயகன் படத்திற்காக அவருக்கு ரூ.275 கோடி சம்பளம் வழங்கப்பட்டுள்ளது. இதுவரை எந்த இந்திய நடிகரும் இவ்வளவு பெரிய தொகையை சம்பளமாக பெற்றதில்லை. ரஜினி, ஷாருக்கான், அமீர் கான் போன்றோர் லாபத்தில் பங்கெடுத்துக்கொள்வார்கள். ஆனால் விஜய், லாபத்தில் பங்கு வேண்டாம் எனக் கூறி, நேரடியாக சம்பளம் பெற்றுள்ளார் என்பது குறிப்பிடத்தக்கது.

விஜய்யின் கடைசி படம் என்பதால், ஜன நாயகன் மீது பான் இந்தியா அளவில் மிகப்பெரிய எதிர்பார்ப்பு நிலவுகிறது. இதுவே ப்ரீ ரிலீஸ் பிசினஸிலும் பிரதிபலிக்கிறது.

ஓடிடி உரிமையை அமேசான் பிரைம் ரூ.121 கோடிக்கு பெற்றுள்ளது.சாட்டிலைட் உரிமையை சன் டிவி ரூ.55 கோடிக்கு கைப்பற்றியுள்ளது.இதனுடன், ஆடியோ உரிமை, திரையரங்கு உரிமை, ஓவர்சீஸ் உரிமைகளும் பெரும் டிமாண்டில் உள்ளன.

இதனால் ரிலீஸுக்கு முன்பே தயாரிப்பு செலவை மீறி வசூல் செய்திருப்பதால், ஜன நாயகன் பிளாக்பஸ்டர் ஹிட் எனக் கருதப்படுகிறது.

இந்த படத்தில், தவெக பொதுச்செயலாளர் புஸ்ஸி ஆனந்த் சிறப்பு தோற்றத்தில் நடித்துள்ளதாக தகவல் வெளியாகி உள்ளது. இதற்கான அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது.