தமிழக வெற்றிக் கழகத் தலைவர் விஜய்யின் பிரசாரப் பயணத்தை மீண்டும் சேலத்தில் இருந்து தொடங்குவதற்காக, டிசம்பர் 4-ஆம் தேதி பொதுக்கூட்டம் நடத்த அனுமதி கோரி த.வெ.க. நிர்வாகிகள் வியாழக்கிழமை சேலம் மாநகர காவல் ஆணையர் அலுவலகத்தில் மனு அளித்துள்ளனர்.

கோரிக்கையும் பின்னணியும்

கடந்த செப்டம்பர் 27-ஆம் தேதி கரூரில் விஜய் பிரசாரம் செய்தபோது ஏற்பட்ட கூட்ட நெரிசலில் சிக்கி 41 பேர் உயிரிழந்தனர். இந்த அசம்பாவித சம்பவத்தைத் தொடர்ந்து, விஜய்யின் பிரசாரப் பயணம் தற்காலிகமாக ஒத்திவைக்கப்பட்டிருந்தது.

இந்நிலையில், சேலம் மத்திய மாவட்டச் செயலாளர் தமிழன் ஆ. பார்த்திபன் தலைமையிலான நிர்வாகிகள் நேற்று மனு அளித்தனர்.

அனுமதிக்கான கோரிக்கை இடங்கள்:

சேலம் கோட்டை மைதானம்

போஸ் மைதானம்

கெஜ்ஜல்நாயக்கன்பட்டி ஆகிய மூன்று பகுதிகளில் ஏதேனும் ஒரு இடத்தில் டிசம்பர் 4-ஆம் தேதி பொதுக்கூட்டத்தில் கலந்துகொண்டு விஜய் பிரசாரம் செய்ய அனுமதி அளிக்குமாறு மனுவில் கோரப்பட்டுள்ளது.

தற்போதைய நிலவரம்

டிசம்பர் 4-ஆம் தேதி கார்த்திகை தீபம் என்பதால், பிரசாரத்திற்கு அனுமதி அளிப்பது குறித்து போலீஸார் ஆலோசனை நடத்தி வருகின்றனர் என்று தகவல்கள் தெரிவிக்கின்றன. இதற்கிடையில், விஜய் பிரசாரத்துக்கு அனுமதி மறுக்கப்பட்டதாக ஊடகங்களில் வெளியான தகவல் உண்மையல்ல என்று மத்திய மாவட்ட த.வெ.க. செயலாளர் தமிழன் ஆ. பார்த்திபன் தெரிவித்துள்ளார்.