தலைமைச் செயலகத்தில் செய்தியாளர்களைச் சந்தித்த எதிர்க்கட்சித் தலைவர் உதயநிதி ஸ்டாலின், தமிழக சட்டமன்றத்தில் நிகழ்த்தப்பட்ட ஆளுநர் உரை குறித்துத் தங்களது கடுமையான கண்டனங்களையும் விமர்சனங்களையும் முன்வைத்தார். தவெக அரசு தயாரித்துக் கொடுத்த கொள்கை விளக்க உரையை எவ்வித மாற்றுக்கருத்தும் இன்றி ஆளுநர் அப்படியே வாசித்ததைக் குறிப்பிட்ட அவர், இதன் மூலம் தவெக மற்றும் பாஜக இடையே ஏதோவொரு ரகசிய உடன்பாடு ஏற்பட்டுள்ளதோ என எண்ணத் தோன்றுவதாகத் தெரிவித்தார். கடந்த திமுக ஆட்சிக்காலத்தில் அரசு எழுதிக் கொடுத்த எந்தவொரு உரையையும் முழுமையாகப் படிக்காமல் முரண்டு பிடித்த ஆளுநர், தற்போது தவெக அரசுக்கு முழுமையாக ஒத்துழைப்பது இவர்களின் பின்னணித் தொடர்பையே காட்டுவதாக அவர் சாடினார்.

தொடர்ந்து பேசிய உதயநிதி ஸ்டாலின், தவெக அரசுக்கு என்று சொல்வதற்குச் சுயமான சாதனைகள் எதுவும் இல்லை என்றும், முந்தைய திமுக அரசின் சாதனைகளையும் கொள்கைகளையும் திருடி, அதற்கு மேல் தவெக தங்களது ஸ்டிக்கரை ஒட்டிப் போலிப் பெருமை தேடிக் கொள்வதாகவும் குற்றம் சாட்டினார். மாநிலத்தை முன்னேற்றுவதற்கான தொலைநோக்குத் திட்டங்கள் ஏதுமின்றி, தவெக ஆட்சி குறித்த சுய விளம்பரப் பெருமைகள் மட்டுமே ஆளுநர் உரையில் மலிந்து கிடந்ததாக அவர் விவரித்தார். திமுகவின் நிர்வாகம் சரியாக இல்லை என்று தவெக கூறுவது அப்பட்டமான பொய் என்றும், நிர்வாகம் சரியாக இல்லையெனில் கடந்த காலங்களில் மக்கள் நலத்திட்டங்களை எவ்வாறு தடையின்றி நிறைவேற்றியிருக்க முடியும் என்றும் வினா எழுப்பினார்.

தவெக அரசு தங்களது ஆரம்பக்காலத் தோல்விகளை மறைக்கத் திட்டமிட்டு திமுக மீது பழி போடுவதாகவும், இந்த ஆளுநர் உரை முற்றிலும் காழ்ப்புணர்ச்சி நிறைந்தது என்றும் அவர் குறிப்பிட்டார். தவெக கொடுத்த தேர்தல் வாக்குறுதிகளை எப்படி நிறைவேற்றப் போகிறார்கள் என்பதற்கான நிதி ஆதாரங்கள் குறித்தோ அல்லது முறையான செயல்திட்டங்கள் குறித்தோ ஆளுநர் உரையில் எந்தவொரு விளக்கமும் அளிக்கப்படவில்லை. கொடுத்த வாக்குறுதிகளில் இருந்து தப்பித்துக் கொள்வதற்காகவே வெள்ளை அறிக்கை என்ற வெற்று அறிக்கையைத் தவெக அரசு கையில் எடுத்துள்ளது என்றும், நிதி நிலைமை குறித்து திமுக தரப்பில் தங்கம் தென்னரசு கேட்ட எந்தவொரு முறையான கேள்விகளுக்கும் தவெக அரசிடம் தற்பொழுது வரை பதில் இல்லை என்றும் உதயநிதி ஸ்டாலின் தனது பேட்டியில் மிகக் காட்டமாகத் தெரிவித்தார்.