சென்னை: தமிழக முதலமைச்சர் ஜோசப் விஜய்யின் கடைசி திரைப்படமாகக் கூறப்படும் ‘ஜன நாயகன்’ திரைப்படம், அறிவிக்கப்பட்ட வெளியீட்டு தேதியைத் தாண்டியும் இன்னும் தணிக்கைச் சான்றிதழ் பெறாத நிலையில், அதன் வெளியீடு மீண்டும் கேள்விக்குறியாகியுள்ளது. வழக்குகள், மறு தணிக்கை கோரிக்கைகள், அரசியல் விவாதங்கள் மற்றும் படத்தின் முழு காட்சிகள் இணையத்தில் கசிந்த சம்பவம் உள்ளிட்ட தொடர் பிரச்சினைகள் படக்குழுவுக்கு பெரும் சவாலாக மாறியுள்ளதாக சினிமா வட்டாரங்கள் தெரிவிக்கின்றன.

கேவிஎன் தயாரிப்பு நிறுவனம் தயாரித்துள்ள இந்தப் படம், கடந்த ஜனவரி 9-ஆம் தேதி வெளியாகும் என முதலில் அறிவிக்கப்பட்டிருந்தது. ஆனால் பல்வேறு காரணங்களால் படம் தொடர்ந்து தள்ளிப்போய்க்கொண்டே இருக்கிறது. இதற்கிடையில், படம் முழுமையாக இணையத்தில் கசிந்தது தயாரிப்புக் குழுவுக்கு மேலும் அதிர்ச்சியை ஏற்படுத்தியது.

இந்தச் சூழலிலும், திரைப்படத்தை விட தேர்தல் முக்கியம் எனக் கருதி விஜய் தனது அரசியல் பிரசாரத்தில் முழுமையாக கவனம் செலுத்தி, பின்னர் தமிழக முதலமைச்சராகப் பதவியேற்றார். எனினும், அவரது கடைசி படமாகக் கருதப்படும் ‘ஜன நாயகன்’ இன்னும் வெளியீட்டை எதிர்நோக்கிக் காத்திருக்கிறது.

இந்நிலையில், ஜூன் 19-ஆம் தேதி படத்துக்கு தணிக்கைச் சான்றிதழ் கிடைக்க வாய்ப்பு உள்ளதாக சினிமா வட்டாரங்களில் தகவல்கள் வெளியாகியுள்ளன. இதனால் தயாரிப்புக் குழுவினருக்கும் ரசிகர்களுக்கும் மீண்டும் நம்பிக்கை ஏற்பட்டுள்ளது.

படம் தாமதமானதால், திரைப்படத்தை வாங்கிய விநியோகஸ்தர்கள் மற்றும் முதலீட்டாளர்கள் பெரும் நிதிச் சுமையை எதிர்கொண்டுள்ளதாக கூறப்படுகிறது. சிலர் கடன் வாங்கி முதலீடு செய்த நிலையில், வட்டிச் சுமையால் பாதிக்கப்பட்டுள்ளதாகவும் தகவல்கள் வெளியாகியுள்ளன. இந்த நஷ்டத்தை ஈடுகட்டுவதற்கான வழிகள் குறித்து விஜய் தரப்பும் தயாரிப்பு நிறுவனமும் ஆலோசித்து வருவதாக கூறப்படுகிறது.

இதுவரை படம் இணையத்தில் கசிந்திருந்தாலும், “தியேட்டரில்தான் பார்க்க வேண்டும்” என்ற உறுதியுடன் பல விஜய் ரசிகர்கள் கசிந்த காட்சிகளைப் பார்க்காமல் காத்திருக்கின்றனர். எனினும், படம் மேலும் தாமதமானால் ரசிகர்களின் பொறுமை சோதனைக்குள்ளாகும் என சினிமா விமர்சகர்கள் கருதுகின்றனர்.

ஜூன் 19-ஆம் தேதி தணிக்கைச் சான்றிதழ் கிடைத்தால், ஜூன் 25 அல்லது 26-ஆம் தேதிகளில் படம் திரையரங்குகளில் வெளியாகலாம் என்ற எதிர்பார்ப்பும் நிலவுகிறது. அதே நேரத்தில், ‘ஜன நாயகன்’ படத்துக்கு ஏன் இவ்வளவு நீண்ட காலமாக தணிக்கைச் சான்றிதழ் வழங்கப்படவில்லை, அதன் பின்னணியில் உள்ள உண்மையான பிரச்சினைகள் என்ன என்பதற்கான அதிகாரப்பூர்வ விளக்கம் இன்னும் வெளியாகாதது பல்வேறு கேள்விகளை எழுப்பியுள்ளது.