தமிழ்நாடு சட்டசபையின் 3-வது நாள் அமர்வு இன்று சபாநாயகர் அப்பாவு தலைமையில் நடைபெற்றது. நிகழ்வின் போது முதல்வர் மு.க.ஸ்டாலின், எதிர்க்கட்சித் தரப்பை நோக்கி உரையாற்றினார்.

அவர் கூறியதாவது: “எதிர்க்கட்சித் தரப்பில் இருப்பவராக இருந்தாலும் நயினார் நாகேந்திரனை நான் ஒருபோதும் கோபமாக பேசுவதைக் கண்டதில்லை.

விமர்சனங்களை முன்வைக்கும் போதிலும் எப்போதும் அமைதியாகவும் மரியாதையாகவும் பேசுவார். வெளிநடப்பு செய்வதிலும் கூட, சிரித்த முகத்துடன், யாருக்கும் எந்தவித எதிர்மறை உணர்வும் ஏற்படாதவாறு நடந்து கொள்வார். இது ஒரு அரசியல்வாதிக்குரிய நாகரிகமான பண்பு.

அவரின் இந்த அமைதியான நடத்தை மற்றும் அரசியல் அணுகுமுறை பாராட்டத்தக்கது. அரசியலில் கருத்து வேறுபாடுகள் இருந்தாலும், நயினார் நாகேந்திரன் தன்னுடைய பண்புடன் நடந்துகொள்வது அனைவருக்கும் ஒரு நல்ல முன்மாதிரியாக இருக்கிறது.

இன்று அவர் 65-வது வயதிற்குள் அடியெடுத்து வைக்கிறார். அவருக்கு எனது சார்பிலும், தி.மு.க. சார்பிலும், இனிய பிறந்தநாள் வாழ்த்துகளை தெரிவித்துக்கொள்கிறேன். அவர் நீண்டநாள் ஆரோக்கியமாகவும் உற்சாகமாகவும் இருந்து அரசியல், பொதுச்சேவை வழியாக மக்களுக்கு மேலும் பல செய்ய வாழ்த்துகிறேன்,” என்று முதலமைச்சர் கூறினார்.

சட்டசபை உறுப்பினர்களும் நயினார் நாகேந்திரனுக்குப் பாராட்டுகளையும் வாழ்த்துகளையும் தெரிவித்தனர்.