2026 சட்டமன்றத் தேர்தலை முன்னிட்டு தமிழக அரசியல் களம் தீவிரமடைந்து வருகிறது. குறிப்பாக அதிமுக – பாஜக கூட்டணிக்குள் தொகுதி பங்கீடு தொடர்பான திரைமறைவு ஆலோசனைகள் வேகமெடுத்துள்ளதாக தகவல்கள் வெளியாகியுள்ளன.

தமிழகத்தில் தங்களின் வாக்கு வங்கி விரிவடைந்துள்ளதாக மதிப்பீடு செய்துள்ள பாஜக, இம்முறை அதிக தொகுதிகளில் போட்டியிட வேண்டும் என்ற முடிவில் இருப்பதாக கூறப்படுகிறது. சென்னையின் தி.நகர் பகுதியில் உள்ள பாஜக மாநில தலைமையகமான கமலாலயத்தில் நடைபெற்ற ஆலோசனைக் கூட்டத்தில், வெற்றி வாய்ப்பு உள்ளதாக கருதப்படும் தொகுதிகள் குறித்து விரிவான மதிப்பீடு செய்யப்பட்டதாக தகவல்கள் தெரிவிக்கின்றன. இந்தக் கூட்டத்திற்கு தேசிய அமைப்பு பொதுச் செயலாளர் பி.எல். சந்தோஷ் தலைமை தாங்கினார்.

அந்த மதிப்பீட்டின் அடிப்படையில், அதிமுகவிடம் 60 தொகுதிகளை கோரி பேச்சுவார்த்தை நடத்த வேண்டும் என்ற கருத்து முன்வைக்கப்பட்டதாக கூறப்படுகிறது. இருப்பினும், பேச்சுவார்த்தையின் இறுதி கட்டத்தில் குறைந்தது 40 தொகுதிகளையாவது பெற வேண்டும் என்பது பாஜக தலைமையின் முக்கிய இலக்காக உள்ளதாக அரசியல் வட்டாரங்கள் தெரிவிக்கின்றன.

இதற்கிடையில், கடந்த தேர்தலில் பாஜக குறைந்த எண்ணிக்கையிலான தொகுதிகளில் போட்டியிட்ட அனுபவத்தை நினைவில் கொண்டு, இம்முறை கட்சியின் அரசியல் செல்வாக்கை உயர்த்தும் வகையில் அதிக இடங்களைப் பெற வேண்டும் என்ற எண்ணம் பாஜக தரப்பில் வலுப்பெற்றுள்ளதாக கூறப்படுகிறது. தொகுதி வாரியான அமைப்பு மாற்றங்கள், புதிய பொறுப்பாளர்கள் நியமனம், களப்பணிகளை தீவிரப்படுத்துதல் போன்ற நடவடிக்கைகளும் ஆலோசிக்கப்பட்டதாக தகவல்கள் வெளியாகியுள்ளன.

ஆனால், அதிமுக தலைமையிலோ வேறுபட்ட அணுகுமுறை நிலவுகிறது. கடந்த தேர்தலில் போட்டியிட்ட தொகுதி எண்ணிக்கையை குறைக்க முடியாது என்ற நிலைப்பாட்டில் எடப்பாடி பழனிச்சாமி இருப்பதாக கூறப்படுகிறது. கூட்டணியில் பாஜக மட்டுமின்றி பிற கட்சிகளும் இடம் பெற வாய்ப்பு உள்ளதால், ஒவ்வொரு கட்சிக்கும் சமநிலையாக தொகுதிகளை ஒதுக்க வேண்டிய கட்டாயம் உருவாகியுள்ளது.

மேலும், கூட்டணியில் புதிய கட்சிகள் இணையும் சாத்தியம் உள்ளதால், தொகுதி பங்கீடு கணக்கீடு இன்னும் சிக்கலானதாக மாறியுள்ளது. இதனால் பாஜக கோரிய 60 தொகுதிகள் மட்டுமின்றி 40 தொகுதிகளும் வழங்கப்படுமா என்ற கேள்வி எழுந்துள்ளது. அரசியல் கணக்கீட்டின் அடிப்படையில், பாஜக எதிர்பார்ப்பை விட குறைவான தொகுதிகள் ஒதுக்கப்படலாம் என்ற மதிப்பீடும் நிலவுகிறது.

இந்நிலையில், திமுகவும் அடுத்த வாரம் முதல் கூட்டணி பேச்சுவார்த்தைகளை தொடங்க உள்ளதாக தகவல்கள் வெளியாகியுள்ளன. அதனால் தமிழக அரசியல் சூழல் மேலும் சூடுபிடித்துள்ளது.

அதிமுக – பாஜக இடையிலான தொகுதி பங்கீடு பேச்சுவார்த்தை எந்த திசையில் நகரும் என்பது வரும் நாட்களில் தெளிவாகும் என அரசியல் பார்வையாளர்கள் கணிக்கின்றனர்.