இயக்குநர் பாலா இயக்கத்தில் வெளியான சேது திரைப்படம் தமிழ் சினிமாவில் ஒரு திருப்புமுனை படமாகக் கருதப்படுகிறது. அந்த படத்தில் நாயகியாக நடித்த அபிதா, முதல் படத்திலேயே தனது இயல்பான நடிப்பால் ரசிகர்களின் மனதில் இடம்பிடித்தார். ஆனால், அந்த வெற்றிக்குப் பிறகு அவர் சினிமாவை விட்டு விலகியதன் பின்னணியில் பல வேதனையான சம்பவங்கள் இருந்ததாக தகவல்கள் தெரிவிக்கின்றன.

1985 ஆம் ஆண்டு சென்னையில் பிறந்த அபிதாவின் இயற்பெயர் ஜெனிலா. மலையாள குடும்பத்தைச் சேர்ந்த அவர், சிறுவயதிலேயே சீரியல் படப்பிடிப்பைக் காண சென்றபோது, ஒரு இயக்குநரின் கவனத்திற்கு வந்து சின்னத்திரையில் நடிக்கத் தொடங்கினார். கிரிமினல், ஜன்மம் எக்ஸ், மானசா போன்ற தொடர்களில் நடித்த அவர், பின்னர் சில படங்களில் சிறிய கதாபாத்திரங்களில் தோன்றினார்.

அந்த காலகட்டத்தில் இயக்குநர் பாலா அவருக்கு சேது பட வாய்ப்பை வழங்கினார். அப்போது ஜெனிலா என்ற பெயரை ‘அபிதா’ என மாற்றியது பாலாவே. படப்பிடிப்பின்போது பல கஷ்டங்களையும், கடுமையான பயிற்சிகளையும் எதிர்கொண்டதாக கூறப்படுகிறது. ஒரு கட்டத்தில் இயக்குநரின் கடுமையான கண்டிப்பால் மனவேதனை அடைந்தாலும், தாயின் ஊக்கத்தால் மீண்டும் படத்தில் நடித்தார். படம் வெளியானபின் அபிதாவுக்கு பாராட்டுகள் குவிந்தன.

ஆனால் அதன் பின்னர் ஏற்பட்ட கிசுகிசு செய்திகள் அவரது வாழ்க்கையில் பெரிய அதிர்ச்சியை ஏற்படுத்தின. குறிப்பாக சீறிவரும் காளை படத்தில் நடித்தபோது, நடிகர் ராமராஜன் – நளினி விவாகரத்துக்கு அபிதாவே காரணம் என்ற ஆதாரமற்ற செய்திகள் சில பத்திரிகைகளில் வெளியானது. மேலும், ஒரு பத்திரிகை நிறுவனம் தவறான செய்தி வெளியிடாமல் இருக்க பணம் கேட்டதாகவும் கூறப்படுகிறது. பணம் வழங்க மறுத்ததால் அவதூறு தலைப்புகளில் செய்திகள் வெளியாகி, அபிதா கடுமையான மன உளைச்சலுக்கு ஆளானார்.

இந்த சூழ்நிலை அவரை சினிமாவை விட்டு விலகச் செய்தது. ஒரு கட்டத்தில் உயிரை மாய்த்துக்கொள்ள கூட நினைத்ததாக பின்னர் பகிர்ந்துள்ளார். நீண்ட இடைவெளிக்குப் பிறகு, 2007 முதல் 2013 வரை ஒளிபரப்பான திருமதி செல்வம் தொடரில் ‘அர்ச்சனா’ கதாபாத்திரம் மூலம் மீண்டும் ரசிகர்களைச் சந்தித்தார். அத்தொடரில் நடித்துக்கொண்டிருந்தபோதே சுனில் என்பவரை திருமணம் செய்துகொண்டார்.

பின்னர் பொன்னூஞ்சல், தங்கமான புருஷன் போன்ற தொடர்களில் நடித்தார். இரண்டு குழந்தைகள் பிறந்தபின் சில ஆண்டுகள் இடைவேளை எடுத்த அவர், பின்னர் மீண்டும் சின்னத்திரைக்கு திரும்பி தற்போது தொடர்களில் நடித்துவருகிறார்.

முதல் படத்தில் வெற்றி கண்ட நடிகை, அவதூறு மற்றும் மன அழுத்தங்களால் சினிமாவை விட்டு விலக வேண்டிய நிலை ஏற்பட்டது அவரது வாழ்க்கையின் வேதனையான அத்தியாயமாக பார்க்கப்படுகிறது. அதேசமயம், மீண்டும் எழுந்து நிற்கும் அவரது மனவலிமையும் குறிப்பிடத்தக்கதாகும்.