கடந்த 2011-ஆம் ஆண்டிற்கு முன்பு பணி நியமனம் பெற்ற ஆசிரியர்கள் கட்டாயம் ஆசிரியர் தகுதித் தேர்வு (TET) எழுதித் தேர்ச்சி பெற வேண்டும் என்ற உச்ச நீதிமன்றத் தீர்ப்பினால் ஆசிரியர்கள் மத்தியில் ஏற்பட்டுள்ள அச்சத்தைப் போக்கும் விதமாக, தமிழ்நாடு அரசு உரிய நடவடிக்கை எடுக்கும் என முதல்வர் மு.க. ஸ்டாலின் உறுதியளித்துள்ளார்.

உச்ச நீதிமன்றத் தீர்ப்பை எதிர்த்துத் தமிழக அரசு சீராய்வு மனு தாக்கல் செய்துள்ளது குறித்து, பள்ளிக் கல்வித் துறை அமைச்சர் அன்பில் மகேஸ் பொய்யாமொழி நேற்று அண்ணா அறிவாலயத்தில் முதல்வரைச் சந்தித்துக் கலந்தாலோசனை செய்தார்.

ஆலோசனை: ஆசிரியர் சங்க நிர்வாகிகளுடன் தான் நடத்திய கலந்தாய்வுக் கூட்டம் குறித்து அமைச்சர் விளக்கினார். அப்போது, ஆசிரியர்களின் நலனைக் காக்க உரிய நடவடிக்கை எடுக்கப்படும் என்றும், "திராவிட மாடல் அரசு எந்த சூழ்நிலையிலும் ஆசிரியர்களைக் கைவிடாது" என்றும் முதல்வர் ஸ்டாலின் உறுதியளித்தார். இச்சந்திப்பின்போது, நாடாளுமன்ற உறுப்பினரும் மூத்த வழக்கறிஞருமான பி. வில்சன் உடனிருந்தார்.

வழக்கின் பின்னணி

அண்மையில் உச்ச நீதிமன்றம் அளித்த தீர்ப்பில், தமிழகத்தில் அரசு மற்றும் அரசு உதவி பெறும் பள்ளிகளில் 1 முதல் 10-ஆம் வகுப்பு வரை கற்பிக்கும் அனைத்து ஆசிரியர்களும் பணியில் தொடரவும், பதவி உயர்வு பெறவும் டெட் தேர்வு கட்டாயம் என்று உத்தரவிட்டது.

இந்தத் தீர்ப்பை மறுபரிசீலனை செய்யக் கோரி அகில இந்திய ஆசிரியர்கள் கூட்டணியினர், டெட் தேர்வில் இருந்து விலக்கு அளிக்கக் கோரிப் பிரதமர் மோடிக்குத் தபால் மூலம் மனுக்கள் அனுப்பி வருகின்றனர்.