நடிகர் விஜய்யின் தமிழக வெற்றிக் கழகத்தில் (தவெக) துணை நடிகர்கள், தொழில்நுட்பக் கலைஞர்கள் உட்படச் சின்னத்திரை மற்றும் திரையுலகப் பிரபலங்கள் பலரும் இணையவுள்ளதாக நடிகர் ஜீவா ரவி தெரிவித்துள்ளார்.

ஜீவா ரவியின் பேட்டி:
அண்மையில் செங்கோட்டையனுடன் தவெகவில் இணைந்த நடிகர் ஜீவா ரவி, செய்தியாளர்களிடம் பேசுகையில், "துணை நடிகர்கள், டெக்னீஷியன்கள், உதவி இயக்குநர்கள், நடன இயக்குநர்கள் என ஒரு பெரிய திரை பட்டாளத்துடன் தலைவர் விஜய் முன்னிலையில் தவெகவில் இணையப் போகிறேன்" என்று உற்சாகமாகக் கூறினார்.

ஆர்வத்துடன் களப்பணி:
"நானாக யாரையும் அழைக்கவில்லை. பதவியே வேண்டாம்; தலைவர் விஜய்யுடன் களப்பணி செய்தால் போதும் எனக் கேட்டு அவர்களாகவே முன்வருகின்றனர். சினிமா மற்றும் சின்னத்திரை பிரபலங்கள் பலரும் எங்களுடன் இணையவுள்ளனர். நிறைய நல்ல விஷயங்கள் நடக்கவுள்ளன" என்றும் அவர் தெரிவித்தார்.

2029 இலக்கு:
தற்போது தேர்தலில் போட்டியிடத் தனக்கு வாய்ப்பில்லை என்றும், அரசியலைக் கற்றுக்கொண்டு வரும் 2029ஆம் ஆண்டு தேர்தலில் போட்டியிடுவேன் என்றும் ஜீவா ரவி தெரிவித்தார்.

முன்னாள் அமைச்சர் செங்கோட்டையன் மற்றும் நாஞ்சில் சம்பத் போன்றோர் இணைந்த நிலையில், திரைப்பிரபலங்கள் பலர் திரளாக இணையவிருப்பது தவெகவுக்கு அரசியல் ரீதியாக முக்கியத்துவம் வாய்ந்ததாகப் பார்க்கப்படுகிறது. இணையும் பிரபலங்கள் குறித்த முழு விவரம் விரைவில் வெளியாகும் என எதிர்பார்க்கப்படுகிறது.