2026ஆம் ஆண்டு நடைபெற உள்ள தமிழக சட்டப்பேரவைத் தேர்தல் நெருங்கி வரும் நிலையில், அதற்கு முன்னதாக மாநிலங்களவை உறுப்பினர் பதவிக்கான தேர்தல் மார்ச் 16ஆம் தேதி நடைபெறவுள்ளதாக அறிவிக்கப்பட்டுள்ளது. இந்த அறிவிப்பு வெளியானதுடன், தமிழக அரசியலில் கூட்டணி சமன்பாடுகள் புதிய திருப்பத்தை எட்டியுள்ளன.

தமிழகத்தைச் சேர்ந்த ஆறு மாநிலங்களவை உறுப்பினர்களின் பதவிக்காலம் ஏப்ரல் மாதத்துடன் முடிவடைய உள்ளதால், அந்த இடங்களை யார் கைப்பற்றுவார்கள் என்பது தற்போது முக்கிய அரசியல் விவாதமாக மாறியுள்ளது.

திமுக சார்பில் திருச்சி சிவா, அந்தியூர் செல்வராஜ், என்.ஆர். இளங்கோ, டாக்டர் கனிமொழி சோமு ஆகியோரின் பதவிக்காலமும், அதிமுக சார்பில் தம்பிதுரை மற்றும் அதிமுக கோட்டாவில் தேர்ந்தெடுக்கப்பட்ட ஜி.கே. வாசன் ஆகியோரின் பதவிக்காலமும் முடிவடைகின்றன.

சட்டமன்றத்தில் உள்ள எண் பலத்தைப் பார்க்கும்போது, இந்த ஆறு இடங்களில் நான்கு இடங்கள் திமுகவுக்கும், இரண்டு இடங்கள் அதிமுகவுக்கும் கிடைப்பது கணக்கில் உறுதியானதாக கருதப்படுகிறது. ஆனால் கூட்டணி அரசியல் இந்த எளிய கணக்கை சிக்கலாக்கியுள்ளது.

அதிமுக தரப்பில், பாமக தலைவர் அன்புமணிக்கு ஒரு மாநிலங்களவை இடம் வழங்கப்படும் என ஏற்கனவே தகவல்கள் வெளியாகியுள்ளன. இதனால் அதிமுகவுக்குக் கிடைக்கும் இரண்டு இடங்களில் ஒன்று மட்டுமே மீதமிருக்கும் சூழல் உருவாகியுள்ளது.

மீதமுள்ள அந்த ஒரே இடத்தை அமமுக தலைவர் டிடிவி தினகரனுக்கு வழங்க வேண்டுமா? அல்லது தமிழ் மாநில காங்கிரஸ் தலைவர் ஜி.கே. வாசனுக்கு மீண்டும் வாய்ப்பு தர வேண்டுமா? என்ற குழப்பம் நீடிக்கிறது. இதற்கிடையில், தேமுதிக பொதுச்செயலாளர் பிரேமலதா விஜயகாந்தும், கூட்டணியில் இணைய வேண்டுமெனில் ஒரு மாநிலங்களவை எம்பி பதவி வழங்க வேண்டும் என்ற நிபந்தனையை முன்வைத்துள்ளதாக தகவல்கள் தெரிவிக்கின்றன.இதனால், அதிமுக தலைமையிடம் கூட்டணி அரசியலில் கடும் அழுத்தம் உருவாகியுள்ளது.

மறுபுறம், திமுகவுக்குக் கிடைக்கும் நான்கு இடங்களும் எளிதாக ஒதுக்கப்படக் கூடியவை அல்ல. ஏற்கனவே கூட்டணியில் உள்ள காங்கிரஸ் மற்றும் விடுதலைச் சிறுத்தைகள் கட்சி ஆகியவை மாநிலங்களவை இடத்தை கோருகின்றன.

மேலும், பாமக நிறுவனர் ராமதாஸ் அல்லது தேமுதிக திமுக அணியில் இணைந்தால், அவர்களுக்கும் இடம் வழங்க வேண்டிய நிலை உருவாகலாம் என்ற அரசியல் கணிப்புகளும் பேசப்படுகின்றன. இதனால், திமுக தலைமையும் சிக்கலான சமநிலையை பேண வேண்டிய கட்டாயத்தில் உள்ளது.

ஒருபுறம் 2026 சட்டமன்றத் தேர்தலுக்கான தொகுதி பங்கீடு பேச்சுவார்த்தைகள்; மறுபுறம் மாநிலங்களவை சீட் ஒதுக்கீடு – இந்த இரட்டை அழுத்தம் திமுகவும் அதிமுகவும் ஒரே நேரத்தில் சந்தித்து வருகின்றன.

“சட்டமன்ற தொகுதியும் வேண்டும், மாநிலங்களவை சீட்டும் வேண்டும்” என்ற கூட்டணி கட்சிகளின் கோரிக்கைகள், பிரதான கட்சிகளை முடிவெடுக்க முடியாத சூழலுக்கு தள்ளியுள்ளன.

அரசியல் பார்வையாளர்கள் கருத்துப்படி, இந்த மாநிலங்களவை தேர்தல் வெறும் மேலவை பதவிக்கான போட்டியாக இல்லாமல், 2026 சட்டமன்றத் தேர்தலுக்கான கூட்டணி அமைப்பை நிர்ணயிக்கும் முக்கிய அரசியல் கருவியாக மாறியுள்ளது.

மார்ச் 16ஆம் தேதி நடைபெறும் தேர்தல், மேலவை உறுப்பினர்களைத் தேர்ந்தெடுப்பதோடு மட்டுமல்லாமல், தமிழகத்தின் அடுத்த கட்ட கூட்டணி அரசியலையும் தீர்மானிக்கக்கூடியதாக அமையும் என மதிப்பிடப்படுகிறது.